Job manan manpanunca
42
Miya Diosiri pánamin deinunsi, Jori itsantinue:2 Lari mirayoe nuri ticatiya jera quino poden joeque.
Niyaque tenca canatiya, nu jera mirae.
3 Lari nuchi sen fiquica seitoeque pano itomanyoe.
Tsanque pánato, lari tenca iton joyoequeri micuwanamanyoe.
Lari tsanque pánato, entendeitunun cosaca pánamin joanue.
Ya cosalari duque uraran jonan, lari natiya miitomin jomanyoe.
4 Diosi, la panhanasa nasi merása tenjae.
La panhanasa, nuri laca micaride!
5 Junni lari amana fecári nuca meracachiri miramanyoe.
Juntonan amanari tsarasica mirayoe lachi cacachi quiranun cuwenta.
6 Junto amanari lari tsanque paca jomanyoeque mantenhito, uyan tala tenca mancanayoe.
Junto lari nuca seitonque panun tenchi laqui joyoeque micuwachun,
To jopo jamo ninfu quepoto chudichinayoe tinue.
Diosiri Joca manaman oco tsachi josa carinunca
7 Jori Miya Diosibe tsantinunbi, aman Diosi Elifábeman itsantinue:
—Nuri, junsi nuchi paluca amicolari, laca pánato tsarasica patulajoe. Labe mantaimin Jori tsarasica pae; juntonan nulari tsarasica palaquitue. Jun tenchi nulabe duque pa joyoe. 8 Junni aman nulari sieteca wala toro, junsi sieteca opisaca cato, labe mantaimin Jóchica tanjalaide! Junto junte toteto, lachi cuwalaquede! epe cuwanun cuwenta. Junte nechi aman labe mantaimin Jori nulachi tenchi labe rocaichunae. Junni lari ya rocaicaca meráto, nulaca casticaquituanae. Nulari laca tsarasica patulajoe labe mantaimin Job cuwenta. Jun tenchi nulaca casticaquintsan jominlae. Juntonan Jori nulachi tenchi rocainan, casticaquituanae tinue.
9 Junni Elifabe Bildabe Zofáriberi Miya Diosi niyaque mantaca jonunca quilaquinue. Junni Job yalachi tenchi rocainan, Miya Diosiri jera perdonainue.
10 Junni Jori yachi amicolachi tenchi Diosibe rocainunbi, Diosiri Joca manaman oco tsachi mansuwanue. Ticatiya matu taminca man tsansi fécari tan mansuwanue. 11 Junni aman jerale yachi acola, soquila, junsi yachi amicola, junsi jerale Joca matu quiramin jominla quirabi manjalainue. Junto yachi yabi wa fiesta quilaquinue. Junto jeralela palaquinue Miya Diosiri Joca tsaracari laqui tintsancari padeseisa carieque. Junto aman jeralela cala manca epe cuwan, junsi oro aniyo epe cuwan, quilaquinue.
12 Job tsancari padeseinunbi, Miya Diosiri duque duque bendesiquinue matuca fécari. Junni Jori chunca junpalu mili opisa tamin manhinue. Junsi cameyo sota mili, wala palu mili, junsi buro man mili, tamin manhinue. 13 Junsi aman sieteca naola, namala pemanca tamin manhinue. 14 Caque sona náca Jemima mumun polaquinue; aman jun beneleca Cesia mumun polaquinue. Junsi aman debica Kerenhapuc. 15 Jun jerale tote Jochi namala tsansi uraran moso sonala itominlanue. Junni Jori ya namalachi erensia pecuwanue yachi naolachi cuwentanan.