Nene patuntsan joe
25
14 Wube poyobe jotonan suwa quitunari, ya poyolari epe jominue latichunae. Junni tsachi manca epe cuwanae titonan cuwatutori, yari jun poyo cuwenta jochunae.Pa jominlabenan sen jono jonunca
21 Nuca pa jomin tsachinan ano muquinasa jonari, ano fisa cuwana! Junsi pi muquinasa jonari, pica cuchisa cuwana!
22 Jun tsanquinari, nuca pa jominni duque luichunae. Junni Miya Diosiri nuchi pacara quichunae.
Pa caforo jonoca
23 Norte minu nechi wu jatori, poyoca tanjichunae yape suwa quitusa. Jun cuwentanan tsachila pa caforo jolajotori, uyanlaca jele polaquichunae yape yalachi contra palaquitusa.
Papun sona
24 Nacan ya nacabi chuno fe se joe duque wa ya tatonan papun sonabe chunobe quirachun.
Sen fiquica meráno duque se joe
25 Tsachi manca pi muquinasa pi cuchinari, duque se tenjachunae. Jun tsanquenan nuwiri nechi sen fiquica meránari, se tenjachunae.
Seitonlaca jeleratuntsan joe
26 Pi lanun forochi pipa pun jotori, to pi jonari, seitoe. Jun tsanquenan sen tsachiri seiton tsachica jele tinari, seitoe.
Tencachique sen joyoe tituntsan joe
27 Polencari china pi cuchinari, seitochunae. Jun tsanquenan tencachique sen joyoe tinari, yanan seitochunae.
Tenca manta wantainoca
28 Pueblo máncabi wa serica iton jotori, duque pelicro tachunae. Jun tsanquenan tsachi manca, tenca mánta wantaino podeitutori, seiton quinanun tenchi pelicro tachunae.