Miya David in salmo chutenue.
78
Lachi tsachila, lachi mantaca sele meralaquede!La pánanunca meralaquede!
2 Duque tenca canun fiquica pachinayoe.
To quinunle nechi camerátununca micarichinayoe.
3 Jeralela meráto seque entendeinun fiquica pato,
Jun fiquichi casan cosaca micarichinayoe.
Chiquilachi apala ya fiquica cuenta quilaquee.
4 Aman chiquilanan chiquilachi nalalabenan ya fiquica cuenta quilaqueyanae Miya Diosica se tito.
Aman naino junlacanan micarintsan jochunae Miya Diosica se tintsan joeque.
Diosi poden joto, wepanantsancari seque quicaca, yalabe cuenta quilaquintsan jochunae.
Junni lari ya ura miranun fiquica manpato, jun fiquichi natiya camerátunun cosaca micarichinayoe.
5 Diosi matu mate israelítalachi mantá cuwanue.
Yalari Jacóbochi alicala joto, chiquilachi tatala jominlanue.
Diosiri panue yala niyaque nenano jonunca.
Junsi yalachi nalalacanan, nietolacanan tsanquenan micarisa tinue.
6 Tsanque micarino jominlanue yape ya nalalanan uwaitobi, yalachi nalalacaman, nietolacaman manmicarilaquisa!
Tsanque israelítalachi mantá cuwaca jominue yape Diosichi cosalaca pansilaitusa.
19 Tsan josanan, israelítala niyanlanantiya chutunun minu nenato, Diosica itsanque pato pailainue:
Diosi wa suca bole ereto, to jera doino fecári duque pi larinue.
Tsanquino poden jotonan, ¿niyanlanantiya chutunun minu ano cuwano podeichunan? tilatinue.
20 Pi cuwatonan, ¿anocanan cuwano podeichunan?
¿Junsi Diosi yachi tsachilachi tsachicacanan cuwano podeichunan? latinue.
21 Jacóbochi alicala tsanlatinan, Diosi yalaca meráto duque painue.
Diosi israelítalaca paito, nin ereto casticaquinue.
22 Yalari Diosica tennatuminlanue.
Junto Diosi ayudainaeque tenhilaitunue.
23 Juntonan Diosiri yachi tsachilabe ayudaito,
Poyo serawoto suwa quisa carinue.
24 Jun tsanquenan jamochi nechi erenato, suwa eretunue; finoca erenue.
Diosiri maná tinunca jamochi nechi patarinaminue yape tsachila bibuca cuwenta filaquisa.
38 Diosi yachi tsachilaca laquiraminue.
Yalachi jutsaca perdonaito, jera totetunue.
Duque ne paitonan, manseiniimin jominue.
Aman paitonan, jera casticaquitumin jominue.
39 Diosiri tsachilaca tenca cato, cumana joeque tenhinue.
Wu nasi quinaminnan, moora deimanhe;
Tsachilari wu cuwenta jolajoeque tenhito, duque casticaquitumin jominue.
53 Diosi israelítalaca Egíptobi nechi manlarito, seque tanjinaminue jelerasa carituto.
Junsi israelítalaca pa jominlaca lamarichi doisa carinue.
54 Diosiri yachi tsachilaca ya cuwano jun sen toca tanjinue.
Diosi quicaato fe loto, in duca josoleto yalachi cuwanue.
55 Israelítala jun tobi wilainasa, junbi chuminlaca jera sularinue.
Diosiri chunca palu bolon israelítalachi chican chican to cuwanue.
Junsi bolon cura chican sonnasa carinue.
58 Israelítalari seiton moldelaca se tinun posto quito, Diosica duque pa tenhisa carinaminlanue.
Diosica purato seiton moldeca se tinan, Diosi painue.
59 Junni Diosi israelítala niyaque nenalaranunca quirato, painue.
Yalaca duque paito, yachi yaca puranue.
60 Silo tinun pueblobi Diosica se tinun ya jominue.
Diosi junbi tsachilachite chuminue.
61 Jun yabi Diosichi cajon tsominca quiralaquito, Diosi tsara sen joto, tsara poden joto, yalabe pejoequenan tenhimin jominlanue.
Tsan josanan, Diosi paito, israelítalaca pa jomin tsachilaca ya cajonca tanjisa carinue.
62 Diosi yachi tsachilaca paito, quera quicaasa carinan,
Pa jominlari israelítalaca totelaquinue.
65 Aman nanni wanbi Diosi catson tsomin mansonhinun cuwenta inue.
Soldado manca winan ito sonba otito quicaachunae.
Diosi jun tsanquenan israelítalachi tenchi sonba quinue.
66 Israelítalaca pa jominlaca fe loto, yalaca sujisa carinue.
Junsi Diosi ya tsachilaca numasitiya luisa carinue.
67 Diosi israelítalachi sonban miya cuwanue.
Josechi bolonbi nechi tsachica mantamin josa wentetunue.
Josechi nao Efraínchi bolonbi nechicanan wentetunue.
68 Judachi bolonbi nechica wentenue.
Junsi Sion tinun ducanan laquirato wentenue junbi nechi mantachun.
69 Jun dubi Diosi yachi ya quisa carinue.
Jun yari dubi quica joto, quirasan jominue.
To cuwenta numatotiya sonba josa carinue.
70 David Diosibe mantaimin jonan, yacari israelítalaca mantamin josa wentenue.
Daviri opisa cuidaimin jominca miya suwanue.
71 Diosiri opisa cuidaimin jominca yachi tsachilaca cuidaimin suwanue.
Daviri matu niyaque opisa cuidaimin jomin joto, jun tsanquenan israelítalaca cuidainaminue.
72 Daviri sen tenca tan joto, Diosichi tsachilaca seque cuidainato, duque seque mantamin jominue.