Miya David in salmo chutenue.
69
Diosi, laca se laride!Tsachi pibi jadichinamin cuwenta joyoe.
2 Junsi wa pipa pipilubi tenpe winamin cuwenta joyoe.
Nede fenhitiyoe wiruichun.
Duque wapun pi joto, laca derin luwa tanjinae.
3 Ayudaisa otinaminnan, wari pepaito jequen ica joyoe.
Lachi Diosica quiraereto mérasanan, lachi caca jera pepa ica joe.
4 Duque tsachila laca epelenan paiminla joe.
Laca pa jominlari, lachi misubi a silica fécari duque jolajoe.
Junsi laca pa jominlari nantanancari sonban ilainae.
Yalari epenan laca seiton quichi timinla joe.
La ticanantiya tarinca itosanan, yalari tarinca junca pacara quede! timinla joe.
5 Lachi Diosi, nu mirae la tenca iton cuwenta nenamin jonunca.
Junto lachi jutsaca nu miranirae.
6 Jera quino poden Miya Diosi, nuca tennaminlaca, lachi culpa tenchi luilaitusa tenjae.
Israelítalachi Diosi, manca manca nube seque nenano munaralarae; yalaca lachi culpa tenchi palaisa munaratiyoe.
7 La nube penenamin jonun tenchi tsachila laca seiton quiminla joe.
Junsi luisa cariminla joe.
8 Lachi acolanan quiratununca cuwenta tennalarae.
Uyanchi nechi tsachilaca cuwenta tennalarae.
9 Padeseino jototiya, nuchi yaca respetaisa carino joyoe.
Nuca yucacuraminla labenan seiton jolajoe.
10 Aman ano fitunca ito warenari, yalari lucariminla joe.
11 Tsachilachi jutsa tenchi laqui nenasa, yalari laca quirato cacariminla joe.
12 Junsi respetainunla laca epele paminla joe;
Winanlanan laca lucarito canta quiminla joe.
13 Miya Diosi, nu meránasa, nube rocainayoe.
Lachi Diosi, nu duque laquiramin joto, beco manpade!
Nu tsara se larimin joto, la rocainaminca meráde!
14 Laca pa jominla pasuwalaquinasanan, mudubi winamin cuwenta joyoe.
Pi wapunbi jadinamin cuwenta joyoe.
15 Wa pibi derin luwa tanjinaca jun cuwenta joyoe.
Junsi pilu rewesa tenpe pocanaca cuwenta joyoe.
Junni lachi Diosi, laca se laride! tsanque padeseituchun.
16 Miya Diosi, manpade!
Nu sen joto, duque laquiramin joe.
Duque laquiramin joto, laca tennade!
17 La nube mantaimin jonan, laca jachicaitude!
Duque wepananayoe; we ayudaide!
18 Lachi quelo fato, laca pa jominlachile nechi se laride!
19 Nu mirae niyaque padeseica jonunca.
Laca pa jominla seiton quicala joe.
Junsi laca lucarito palaque tenca casa cariminla joe.
Nuri junca jera mirato, mo mo tsancala jonunca mirae.
20 Yala duque seiton quilaquinanan, duque duque laqui joyoe.
Junsi peleito cumana ica joyoe.
Laca laquirato ayudailaisa neyayoe; juntonan monantiya laquiratuminla joe.
21 Lachi ano cuwanayoe tito, cantsa pi cutsawolaquee.
Pi muquinasa, pele binoca cutsawolaquee.
22 Aman yalachi fiestabi ano fino junca problema josa caride!
Seque quino munaralarasanan, yalachi tenchi seitonque patisa caride!
23 Junsi yalaca quiratumin suwade!
Yalaca cumana suwato, yalachi boteca numasitiya jowinposa caride!
24 Nu yalaca paito, casticaquede!
Yalaca pa joto, padeseisa caride!
25 Yala chunun posto yape epe jonijosa!
Monantiya jun tobi chuno itolajosa!
26 Diosi, nu laca padeseisa carinasa, yalari ayudaitucalae.
Nu fudacarica junlaca yalari yucacurato cuenta quiminla joe.
27 Diosi, yalari seiton quicala jonan, nu yalaca seiton quede!
Yalaca perdonaitusa tenjae.
28 Yalachi mumun nuchi sonnanun pilabi chutecaca piyaride!
Senlachi mumunca nuchi pilabi chutenato, yalachi mumuncari chutetuna!
29 Lachi Diosi, labe ayudaina!
Quiyanpun joto padeseinasa, se larina!
30 Junto aman, Diosi, nuchi mumunca se tito canta queyanae.
Junsi acradeseito nuca se tiyanae.