91
Jana pata quinasa, tsachilari chide pele tenpe isanhilaimanhe.Jun tsanquenan jamobi chumin Diosiri, jera poden joto, yachi tsachilaca cuidaichunae.
2 Miya Diosibe itsantichinayoe:
Lachi Diosi, la nuca tennanan nuri cuidaimin joe.
Nuca tennato tiri wa sonban yabi winun cuwenta joe yape laca pa jominla niyanantiya quino podeilaitusa.
3 Nuca pa jominla pichu la ponun cuwenta seiton quichi latinari, Diosiri nuca se larichunae.
Junsi Diosiri nu duque quiyanpun jominca mansechunae.
4 Jana walpa na ayan yachi nalalaca panpe tenpe pocamanhe.
Jun tsanquenan Diosi nuca cuidaichunae.
Jana escudo tinun fiero pechi soldado doimanhe; jun tsanquenan Diosi yachi tsarasi paca fiquichi nuca isaichunae.
5 Junnan quepen niyan ino jonunca jeleratuchunae.
Junsi malon flechachi quinaminlacanan jeleratuchunae.
6 Junto tsachila quepen o malon quiyan calaquinasanan jeleratuchunae.
7 Nuchi quelote duque tsachila puyalaichunae.
Nuchi jala nan tala mili puyalaichunae.
Junsi nuchi tsa nan tala chunca mili puyalaichunae.
Aman nuri niyanantiya ituchunae.
8 Cacachiri quirachunae seitonla niyaque casticainaminca.
9 Miya Diosica tennamin joyoe laca cuidaichunaeque.
Junni nunan jamobi chumin Diosica tennamin ica joe.
10 Junto niyaquenantiya seiton quilaquichunae.
Junsi nuchi familialanan quiyailaituchunae.
11 Diosi yachi anjelilaca erechunae yape nuca cuidaisa.
Yalari nunchi jinasatiya, cuidailaichunae.
12 Nuca amanle canilaquichunae yape nuchi nede subi icatusa.
13 Luquelaca fe loto terechunae.
Pini, junsi uyan papun animali tilacatiya fe loto nedechi dilachunae.
14 Diosi yaca tennamin tsachica pato, itsantimin joe:
Laca mirato laquiramin joe.
Jun tenchi la Diosi yaca sen postote tanae timin joe yape niyanlanantiya seiton quitusa.
15 Otinari, beco manhotiyanae; junsi padeseinasa lanan yabe parejo pejoanae.
Yaca se lariyanae; junsi tsachilaca yaca respetaisa cariyanae.
16 Duque duque unica jono fecári pansi sonnasa cariyanae.
Yaca se larito, pansi josa cariyanae timin joe.