Zofar panunca
11
Job pato deinunsileri, Zofáriman pato itsantinue:2 Tsancari epe fiqui paminbe beco pantsan joe.
Duque pamin jonun tenchi tsa pamin joyoe tituntsan joe.
3 ¿Tsanque epele pánato nosasa isa cariyanaeque tenca canayun?
¿Nu epele paca fiquica meráto manpalaquituchunaeque tenca canayun?
4 Nuri Diosica tuca quereinayoe tinae.
Junsi nuri Diosichi cale sen tsachi joyoeque tennae.
5 Lachiri junca Diosinan nube manpasa tenjae.
6 Junto Diosiri nisi miranunca micuwachunae.
Tsachilari miratunun fiqui jonoe; entendeinari duque sen fiqui jonoe.
Nuri Diosichi cosaca entendeica jomanpari, tenhino jomin jonhoe.
Diosi nuca nisi casticaquintsan jonunca quica itoeque tenhintsan jomin jonhoe.
7 ¿Nuri Diosichi tenfe cosalaca jera entendeimin joyoeque tenca canayun?
¿Diosi jera poden jonan, nuri jun tsannan poden joyoeque tenca canayun?
8 Diosichi cosalari yo quidoca fe jamochi joe.
Junsi puyan ocolachi postoca fécari tenpe joe.
Junnan nuri niyaquenantiya entendeino podeituchunae.
9 Diosichi cosalari toca fe jelelen joe.
Junsi lamaricanan fe jelelen joe.
10 Diosiri mocatiya dochun cabi jano jonari, junsi miito quirano jonari,
Monantiya jatusa carino podeituchunae.
11 Diosiri mirae mo nene pun jonunca; ya jutsa quinaminlaca quiranae.
O nuri Job, ¿Diosiri miitoeque tenca canayun?
12 Jelenchi nenamin buro naayanlari tsachi náca quino itolajochunae.
Jun tsanquenan tenca itonlari miraminla itolajochunae.
13 Job, nuri uyan tenca manhito, seque mannenato,
Diosibe manrocaide!
14 Duque jutsa tatori, jera mantelaquepoto jutsa manquituto nenade!
Nuchi familiala jutsa quinaminlaca quiraniquituna!
15 Tsanquitori, luratuto nenamin jochunae.
Tinantiya culpa iton nenato, sonban joto jeleratuchunae.
Zofari Jobe tsantinue.