Job manaman panunca
9
Junni Bildad pánamin deinunsile, Jori itsantinue:2 Lari tsanque joeque tsarasi mirayoe tinue.
Junsi lanan mirayoe monantiya Diosichi cale jutsa iton joyoe tino podeino itolajoyoeque.
3 Pansile motiya Diosibe pacaachi titori, numanan feino podeituchunae.
Man mili ne yabe pacaatori, nin man netiya feino podeicaituchunae.
4 Diosiri jera miramin joto, jera poden joe.
Junnan monantiya yachi cale fe lono podeituchunae.
5 Diosiri paito jerale dulaca wecacarimin joe.
Niyaque tsanquinanunca tenhitusanan, tsanquimin joe.
6 Diosiri toca duque wesa carimin joe.
7 Diosiri yoca quiraitude! tinari, yori quiraituchunae.
Junsi aman tsabolaca tsetulajode! tinari, tsetulajochunae.
8 Yoquidoca quinato, monantiya ayudaitusanan quinue.
Aman yari lamari latsabi nenamin joe.
9 Diosiri duque bolon tsabolaca quinue.
Junto man bolon intele josa, man bolonni uyanchi joe.
Junca Diosiri jera quica joe.
10 Diosiri ticatiya duque uraran quimin joe.
Monantiya jera miilaituchunae niyaito tsanquimin jonunca.
Diosi duque wepanantsan quinun cosala
Mituntsancari duque jolajoe.
11 Diosiri lachi cale polenasanan, lari quirano podeituichunae.
Lari tenhitusanan lachi quelole polechunae.
12 Diosiri ticatiya canari,
Monantiya catude! lachie; mancuwade! tino podeilaituchunae.
Monantiya juncari ¿Ti quichun tsanque quiyun? tinonan podeilaituchunae.
13 Diosi painari, mandeisa carino numatotiya podeituntsan jochunae.
Fe joyoe timinlaca ayudaiminlari, yachi cale luito peleiminla joe.
14 Junni Diosiri ticatiya tsan joe tinari,
¿Niyaito lari tsan itoe tino podeino joinhin?
Fiqui itoyoe yabe beco pachun.
15 Lari seiton cosa quitutonan,
Diosibe beco pano podeino itoyoe.
Yari chiquilaca miito pamin joe.
Laquirasa panhato rocainori podeiyoe.
16 Diosibe panhamanpari, junni yari labe beco manpamanpari,
Junnasatiya la panhacaca tennatueque tenca cano joinhie.
17 Diosiri duque wa wube suwabe sonba quinun cuwenta laca padeseisa carie.
Laca epenan nantanancari fuda josa carie.
18 Pansi seque sonnasa carituto,
Nin jasá casa caritue.
19 Diosiberi quicaano munaranari, yari laca duque fe sonban joe.
Junsi lari Diosibe juisio quino munaranari, monantiya yaca lachi cale suwano podeituchunae.
20 Aman lari sen joyoe titori, culpa patino joyoe tsantinun tenchi.
Jutsa itoyoe titori, ya fiquiri jutsa jochunae.
21 La sen tsachi jomanpari, tencachiqueca tennano itoyoe.
La sonnanoca tennatuno joinhie.
22 Man cosasiri capano joyoe:
Diosiri jun tsanquenan padeseisa carimin joe culpa tanlaca, junsi culpa itonlacanan.
Job tsantinue.