—¿Nuri nunchi nechi janayun? tinue.

Junni Satanari itsanque manpanue:

—Piyanle tote quirato nenamanyoe tinue.

3 Aman Miya Diosiri itsantinue:

—¿Lachi tsachi Job tinunca tenhinayun? Piyanle tote ya tsansi senni monantiya itolajoe tinue. Seque mantaito nenamin joto, seque nenae tinue. Laca duque jelerato respetaimin joe tinue. Seiton quituchique duque tenfemin joe tinue. Junni nuri seiton quisa carica josatiya, jutsa quitue. Yari seiton quica itosanan, yachica jera yucapiyarito cuwae. Juntonan yari laca calaquirato, jutsa caquitue tinue.

4 Junni Satanari Miya Diosibe itsanque manpanue:

—Tsachilari yalachi puca casennan jotori, nisitiya wantaiminla joe. Junto ticatiya tanunca cuwalaquichunae puyatuchique. 5 Juntonan yachi pucaca quiyanpun isa caride! Tsanquinari, nuchi cate nuca seitonque pachunae tinue.

6 Junni Miya Diosiri Satanabe itsanque manpanue:

—Se joe. Jiniide! Yaca niyantiya quiniquede! tinue. Juntonan totecachiri tina totetuna! tinue.

7 Junni Satanari Miya Diosichile nechi jito, Joca duque seiton quiyanchi quiyanpun isa carinue. Pucalete quidobi bichi jera lanue nede papale nechi misu butu fecári.

8 Junni Jori ninfu queponun postobi chudito, to nida pitichi duque pitachi marisito chuminue. 9 Junnasa yachi sonari itsantinue:

—¿Nuri ti quichun Diosibe seque canenachique tenfenayun? tinue. Nuri Diosica seitonque pato wari puyade! tinue.

10 Juntonan Jori yachi sonabe itsantinue:

—Sona, nuri epele patude! Diosi ticatiya se josa carinari, se joe timinlayoe. Aman niyaquetiya padeseisa carinanari, ¿niyaito se tituminla jowan? tinue.

Junni aman Jori tsanque duque padeseinatotiya, seitonque patunue.

11 Junni Jochi amicola pemanca yachica jilainue: Yala manca Elifaz jominue Temán tobi nechi. Manca Bildad jominue Súa tobi nechi. Manca Zofar jominue Naamati tobi nechi. Yalari Job tsanque padeseinaminca meráto, Jóchica jilaisa! tilatinue. Junni Jobe peaconpanaibi jalainue; junsi laqui jominca manpolarisa ayudaibi jalainue. 12 Junni Jóchica jato, jabile nechi quiralaquinue. Junni Jochi quiyanni duque seiton jonan, Joca case manmiilaituwiyanue. Junni aman atito warelaquinue; junsi yalachi camisaca chilelaquinue laqui jolajoyoeque micuwachun. Junsi aman to lucuca jamochi walalaquinue yalachibi to lucu josa laqui jolajoyoeque micuwachun. 13 Junsi aman Jobe parejo tobi pechudilainue. Junto man tominco enteroca man fiquitiya paca iton chuminlanue. Job tsancari animali padeseinaminca quiranaminlanue; junto tsanque pechuminlanue.