4 Ya sieteca naolari duque fiesta quimin jominlanue man nete mancachi yabi, man nete mancachi yabi. Junto yalachi pemanca soquilacanan pemeracuwamin jominlanue yape yalanan ano fin, junsi titiya cuchin, quilaquisa. 5 Junni tsanque fiesta jera quilaquinunsi, Job yachi naolaca jasa carimin jominue. Pansile fiesta quilaquinato yalachi tencabi Diosica seitonque pato jutsa quilaquin queeque tenca cato, ya naolaca jasa carimin jominue. Junni naola jalainan, Job animalica toteto Diosichi cuwato rocaimin jominue jutsa quicala jonari manperdonaisa. Tsanque yachi mite ma cura tsanquimin jominue.

6 Junni aman manca mate Diosichi anjelila Miya Diosichi cale jera layaino jominlanue. Junnasa Satanás pejanue. 7 Junni Miya Diosiri yabe itsanque panhanue:

—¿Nuri nunchi nechi janayun? tinue.

Junni Satanari itsantinue:

—Piyanle tote quirato nenamanyoe tinue.

8 Junni Miya Diosiri Satanabe itsantinue:

—¿Lachi tsachi Job tinunca tenhiyun? Piyanle tote ya tsansi senni monantiya itolajoe tinue. Seque mantaimin joto, seque nenamin joe. Laca duque respetaimin joe tinue. Junto seiton quituchique duque tenfemin joe tinue.

9 Juntonan Satanari Miya Diosibe itsantinue:

—Tsa tie. Yari nuca jelerato respetaito nenamin joe. Juntonan epe tsan itoe. 10 Nuri yaca, yachi familialaca, junsi ya titiya tanunlaca niyanantiya isa caritumin joe tinue. Yari ticatiya quinari, nu cuidaimin joe. Junnan yari duque duque oco joe. 11 Ya tanunlaca nuri jera manjosoleniquede! Tsanquinari, nuchi cate nuca seitonque pano jonhoe tinue.

12 Junni Miya Diosiri junca merasi, Satanabe itsantinue:

—Se joe. Jiniide! Job tanunca jera niyantiya quiniquede! tinue. Juntonan Jócari niyanantiya quituna! tinue.

Junni Miya Diosi tsantinunsi, Satanari jiniinue.

13 Manca mate Jochi naolari yalachi caque acochi yabi fiesta quinaminlanue soquilabenan. 14 Junte ralarasari, tsachi manca Jochi yaca jato itsantide janue:

—Witabi ticatiya waquechun walachi toca bulenaminlayoe. Junnasa burolari quelolenan tape fito wiruraminlae. 15 Junni moorari sabeo tinun seiton tsachila jalaie tinue. Junto peyunlaca espadachi jera toteto, animalica jera tarinlaquee tinue. La mancasiri se lono podeito, nube pabi jayoe tinue.

16 Junni yari jera capatusanan, mancaman jato, yari itsantinue:

—Cunta pinda patato, opisalaca junsi opisa quiraminlacanan jera totee. La mancasiri se lono podeiyoe nube manpabi jano podeichun.

17 Junni yanan tsanquenan jera capatusanan, mancaman jato, yari itsantinue:

—Caldeo tsachila peman bolon jalaito, peyunlaca espadachi jera toteto, cameyolaca jera tarinlaquee tinue. La mancasiri se lono podeiyoe nube manpabi jano podeichun.

18 Junni yari tsanquenan jera capatusanan, manca peyunman itsantide janue:

—Nuchi naola, junsi namalanan, caque acochi yabi fiesta quito ano fin, titiya cuchin, quinaminlae. 19 Junnasa moorari wa wu sonba jato, yaca jera aralee. Duque sonban wu jato, yaca wecacarito, nuchi naolachi jamo jera aralee. Yalari jera puyalainasa, la mancasiri se lono podeiyoe nube manpabi jano podeichun.

20 Junni aman Job duque laqui wiruinue. Junsi yachi camisaca chilenue yape laqui inaeque tenhilaisa. Aman junsi yachi misuca fu misu icari jera wirisinue. Junto aman Diosica se tichun tobi palo tala mutsale tsodinue. 21 Junsi itsantinue:

—Lari na inato ticanantiya iton naicayoe. Junni lari tsanquenan puyanato, ticanantiya tanjino itoyoe tinue. La titiya tanuncari Miya Diosiri jera cuwaca jominhe; junto Miya Diosinan jera mancanae tinue. Junnan Miya Diosica se tino joyoe tinue.

22 Tsanque titiya tanunca jera iton inatonan, Job jutsa quitunue, nin Diosicanan seitonque patunue.