Artajerjes Nehemíaca Jerusalenca erenunca
2
Aman miya Artajerjes palu chunca wata mantanasa, Abril pete, miyachi bino tanjaca jominlae. Junni lari copa casi yachi cuwayoe. Aman yachi cale trabajaquinato, laqui caforo nenatumin jomin jomanyoe. Jun mate mantimini laqui jomanyoe. Junni bino cuwanasa, 2 miyari labe itsantie:—Duque laqui joeque quiranayoe. ¿Niyaito tsan joyun? Quiyanpunnan quiran itoe. ¿Pansile nu problema tananco? tie.
—Miya, nu duque sen joto, numatotiya sonnasa tenjae. ¿Niyaito laqui itono join lachi pueblo jera yucapiyaca jonari? Jerusalenbi lachi apa, junsi tatala, menaranlae; juntonan ya pueblori jera yucapiyaca joe. Junsi jun pueblobi winun tamolan jomincanan jera nin pocala joe tiyoe.
4 Miyari yaca merasi, itsantie:
—¿Ayudaichun ti quino jowan? tie.
—Miya, nube se jonari, laca laquiratori, Judá toca erede! tiyoe ya Jerusalén puebloca mansechun. Jerusalenni lachi apala, tatala menaranun pueblo joe tiyoe.
6 Miyari yachi sonaca quelole chuteto tato, itsanque panhae:
—¿Numasi fecári jichun? ¿Nisibi manjachun?
La beco manpánan, miyari laca manjisa permiso cuwae. 7 Junsi miyabe carta cuwasa panhayoe la manpoleno jun tolate cobernadorilachi cuwachun. Yo winun nan tala jino jomanyoe Eufrates pi man becochi; junto ya cartaca munaramanyoe yape cobernadorilari pasuwatuto Judá toca polarilaquisa.
8 Junte nechi manqui cartanan panhayoe Asaf tsachichi, ya miyachi jelenca cuidaiminchi. Jun cartase Asabe chide cuwasa tisa munaramanyoe. Lari peman cosa tenchi chide munaramanyoe: Diosichi ya quelole duque sen ya quintsan jominue mantaminla chularasa. Junsi Jerusalén awinta wa sericabi, pueblobi winun tamolan manquintsan jominue. Junsi la chunun yacanan quintsan jominue. Junni ya peman cosa tenchi chide cuwadeque mantasa munaramanyoe. Junni lachi Miya Diosi ya miyaca labe sen josa carinan, la munaranunca jera cuwaniquisa mantaquee.
9 Junni labe weyan israelítalabe Eufrates pi poleto jilaiyoe. Miya Artajerjes calubi chudito jimin soldadolaca chiquilabe erenue yape isailaisa. Capitanlabe, junsi uyan soldadolabe jominlanue. Junni pi poleto, junbi mantamin cobernadorilachica jito, miya ereca jun pilaca cuwayoe. 10 Junnasa mantimini paluca cobernadorilari Jerusalén puebloca natiya mansesa munaratuto, chiquilaca duque pailaie. Yalari Sanbalat, junsi Tobías, jominlanue. Sanbalat horonita tsachi jominue; aman Tobíari miyachi cotole mantamin joto, yari amonita tsachi jominue.
Jerusalén puebloca manselaquinunca
Junni yalari pa jolajosatiya, chiquilari Jerusalenbi felaiyoe. Junni Jerusalenbi fesi, jerale israelita mantaminlaca layasuwalaquiyoe.
17 Junni ya mantaminlabe itsantiyoe:
—Nula ura jera seque miralarae amana mate seitonque pasailainayoeque inte Jerusalenbi. In pueblo yucapiyaca joe. Junsi pueblobi awinta serica jonunte tamolan jomincanan nin pocala joe tiyoe. Jun tenchi amanari man layanni ito, parejo trabajaquinola joyoe. Man layanni ito, manan serica manquilaquisa! pueblo awinta, yape uyan tsachilari chiquilaca cacarito quiralaquitusa.
18 Tsantitobi, la payoe lachi Diosi labe duque sen jominheque; junsi miya Artajerjes labe pacacanan jera payoe. Junni junca merátobi weyan israelítalari trabajaquilaquisa! tilatie. Seque tenca cato trabajaquinaminlae. Junto beco beco sonba tenca suwacaalaquee. 19 Junnasa Sanbalat, Tobías, junsi Gesem tinun árabe tsachi, yalari chiquilaca cacarito quiranato, itsantilatie:
—¿Ti tenca calaquinayun? tilatie. ¿Miyabe mantaituchique quera quino tenca calaquinayun? tilatie.
20 Junnasa lari itsanque tulan payoe:
—Nulari chiquila Jerusalenbi titiya quinanunca natiya miranola itoe tiyoe. Jerusalén nulachi pueblo itoe; nulari ya puebloca tennatumin jominlae. Junsi tede potulajona! tiyoe. Jamochi sonnamin Diosibe mantaiminla joto, puebloca manselaquinayoe; jerano podeisa Diosi ayudaichunae tiyoe.