Nehemías chuteca jun pila
Nehemías yachi tsachila tenchi rocainunca
1
1-2 La Hacalíachi nao Nehemías in pilaca quinayoe. Miya Artajerjes palu chunca wata mantanasa, lachi aco Hanani lachibi fae. Junni yari Diciembre pebi jominue. La Susa tinun mantá tanla chunun pueblobi chumanyoe. Junnasa lachi acori Judá tobi nechi jaca jun tsachilaca lachica petanjae. Junni Jerusalenbi niyan junque panhayoe; junsi Judá tobi chumin israelítalacanan niyan jolajunque panhayoe. (Soldadolari israelítalaca bare toca tanjino materi jeralelaca tanjica itominlanue. Weyanlari chiquilachi tótenan puraica jominlanue. Junnan yala niyan jolajunquenan panhayoe.)3 Junni yalari itsanque manpalaquee: Judá tobi nechi tanjica itonla junbi padeseilainae. Yalachi tenchi duque seitoe; lu jolajoe. Jerusalén awinta wa serica jomin, juntenan amanari jera arajica jun joe; junsi jun pueblobi winun tamolan jominnan jera niyaca joe tilatie.
4 In fiquica meráto, chudito Jerusalén pueblo tenchi wareyoe. Weyan ma fecári duque laqui joto, ano fitunca ito jamochi sonnamin Diosibe rocainamanyoe. 5 Diosibe itsantiyoe: Miya Diosi, nuri sonban Diosi joto, jamochi chumin joe. Tsachilari nuca jeleranola joe. Junsi nu trato quito, nuca laquirato mantaiminlabe ticatiya queyanae titori, jun tsanquimin joe. 6 Junto la amana panhanayoe; la pánacaca merása tenjae. La mirayoe chiquila israelítala jeralela nuchi tsachila jotonan jutsa quicala joyoeque. Lachi familialanan, junsi lanan, nuchi cale jutsa quica jolajoyoe. Jun tenchi quepen, malon chiquilachi tenchi nube rocainayoe. 7 Nu pacaca merátuto, nuchi cale seiton quicala joyoe. Nuri Moiseca nuchi mantaca pila quisa carinue; junnasa chiquilari jun mantaca meraca itolajoyoe. 8 Nu paca joe chiquilaca jutsa quinari chiquilachi tote nechi larito ereyanaeque. Jun erenato, jerale tote ara cura ereyanaeque paca joe. 9 Junsi nu paca joe nuchi quelole manjalainari, junsi nu mantacaca manmeralaquinari, chiquilachi toca mantanjanae tica joe. Nu chiquilachi tobi man postoca wentenue nuchi josa. Junni nu paca joe. Chiquilari nuchi cale manjalainari, chiquilaca nuchi sen postoca mantanjanae tica joe.
10 Chiquilari nuchi jolajoyoe. Nube mantaiminla joyoe. Nuri duque sonban joto, chiquilachi matu tatalaca Egipto tobi nechi manse larinue. 11 Junto Miya Diosi, nube panhanayoe la rocainacaca merása. Chiquila layaito nuca se tino munaralarayoe. Junni chiquila panhacaca jun tsanquede! Junsi jera seque josa caride! miya Artajérjebe cuenta quinasa. Ya miyaca laca laquirasa caride! yape yari la panhanunca meráto tsanquisa. Tsanque Diosibe panhayoe.
Aman jun malate lari miya Artajérjechi copa polarimin jomanyoe yape bino cuchisa. Jun tenchi Diosibe tsanque rocainamanyoe.