17 Junni Acari Elíaca quirato, itsantinue:

—¿Nuri israelítalaca tsancari padeseisa carinaco? tinue.

18 Junni Elíari itsanque beco manpanue:

Lari padeseisa caritiyoe tinue. Nu, junsi nuchi familialabe, tsancari padeseisa carilaquinae tinue. Miya Diosi mantaca junca merátuto yaca telaquepocala joe tinue; junsi Baal diosi tinun moldelaca se tito culto quiminla joe tinue. 19 Amananan israelítalaca Carmelo tinun dubi layaisa mantade! tinue. Junsi junpalu patsa mante chunca Baálichi mantate pamin tsachilaca jasa caride! Junsi junpalu patsa Asera tinun moldechi tenchi paminlacanan pejasa caride! tinue. (Ya Asera tinunchi tsachilaca Acachi sona Jezabéliri cuidaimin jominue.)

20 Junni miya Acari Carmelo tinun duca israelítalaca jera layailaisa fiqui erenue. Baal, Asera tinun diosilachi mantate paminlacanan pelayailaisa fiqui erenue. 21 Junto Elíari israelítalachile quelo féto itsantinue:

—¿Nulari numasi fecári palu cosaca tenca cano jolajoyun? tinue. Miya Diosiri tsa Diosi jonari, yabe nenalarade! tinue. Junsi Baal tsa Diosi jonari, yabe nenalarade! tinue.

Junni jun tsachilari niyaquenantiya beco manpatulajonue. 22 Junsi Elíari capato itsantinue:

—Jerale Miya Diosichi tenchi paminlale nechi la mancari casonnayoe tinue. Juntonan Baálichi tenchi paminlari junpalu patsa mante chunca jolajoe tinue. 23 Junni tsan jonari, unila wala palucaca chiquilachi cuwalaquede! tinue. Junsi yalari manca wentenola jochunae; junsi lanan manca canae tinue. Junsi walaca totelaquichunae, junsi pitilaquichunae, junto te jamo nanlaquichunae. Juntonan nin chutetuntsan jochunae tinue. Aman lanan tsanquenan walaca toteto pitiqueyanae; junsi te jamo nanqueyanae tinue nin quituminnan. 24 Junni yalari yalachi diosi tinunlabe nin eresa panhalaquichunae; junni lanan tsanquenan Miya Diosibe nin eresa tiyanae tinue. Junni nun diositotiya meráto nin erenari, miintsan jochunae tinue ya tsa Diosi joeque.

Junni jerale israelítalari yaca meráto, beco manpato, se joe. Tsanquintsan joe latinue. 25 Junni Elíari junpalu patsa mante chunca Baálichi tenchi paminlabe itsantinue:

—Nulari duque joto, walaca caquenan calaquede! tinue. Junsi jera selaquede! nin chutetuminnan. Junto nulachi diosi tinunlabe nin eresa panhalaquede! tinue.

26 Junni yalari wala manca calaquinue. Junni jera sequetobi, Baálibe nin eresa panhalaquinue. Quepenanle nechi quitsa ma fecári Baálibe panhalaquinue. Itsantinaminlanue: Baal, ninca erede! Junsi suca mesa quica jun awinta suloto tiwinpolenaminlanue. Juntonan duque otinasanan, beco patunue. Niyannantiya quitunue. 27 Junni quitsa ma quelo inasari, Elíari Baálichi tsachilaca lucarito, yalabe itsantinue:

—Fe sonba otilatide! Diosi jotori, fe sonba otinari meráchunae. O pansile tenca cato chunae, o pansile trabajaquebi jica jonhoe, o uyanchi nuwiri jica jonhoe. Pansile catson tsonae; mansoncarinola jochunae tinue.

28 Junni Baálichi tsachilari caotinaminlanue. Junsi Baal meráchunae tito, yalachi mite tencachiquenan cuchiluchi wanenaminlanue. Junni asansiri jominlanue. 29 Junsi quitsa ma poletobi, quebi fecári otito suloto, loco cuwenta inaminlanue. Tsanlainasanan, tinantiya merátunue, junsi natiya patunue. Aman ma cura jun órate israelítalachi mite animalilaca toteto Diosichi cuwantsan jominue. 30 Junnan Elíari jerale tsachilabe itsantinue:

—Lachi quelole jalaide! tinue.

Junni jerale tsachilari yachica quelo falainue. Junsi Elíari Diosichi titiya epe cuwanun mesaca mansenue. Jera yucapiyaca jonan, walaca catsoretuminnan mesaca manseno jominue. 31 Junni ya mesari suca quica jonan, Elíari casale chunca paluca sucaca ya mesaca mansenue. Israelítalari chunca palu bolon jominlanue; bolon cura Jacóbochi chunca paluca naolachi alicala jominlanue. (Aman Jacóboca Miya Diosi Israel mumun poca jominue.) Junni Elíari suca manca, manca bolon tenchi canue. 32 Junsi Miya Diosichi animalica nin poto cuwachun, ya sucaca mesa Miya Diosichi mantate mansenue. Junsi mante calon pi win tsansi conti quinue mesa awinta. 33 Junsi te jera seto, walaca pitito, te jamo nancarinue. 34 Junsi Elíari tsachilabe itsantinue:

—Junpalu balde pi pocato tanjalaide! Junsi ya pica animalibi, junsi tebinan folelaquede! tinue.

Jun tsanquinunbi, palu ne pi mancato folesa mantanue. Junni tsachilari tsanlaquinue. 35 Junni mesabi piri jerate fojinaminue; contibinan tuwainue. 36 Junsi animalica Diosichi cuwanun óra fanue. Jun óratenan Elíari Diosichi titiya epe cuwanun mesaca quelo féto itsantinue: Miya Diosi, nu matu tata Abrahanchi Diosi joe tinue, junsi yachi nao Isaachi, yachi nieto Israélichinan Diosi joe tinue. Junto nu israelítalachi tsa Diosi joyoeque miisa caride! tinue. Lari nube mantaiminsiri joyoe tinue. Junto nu mantaca junca la tsanquinaca junca quirawoto miisa caride! tinue. 37 Junsi Miya, la panhanaca junca quede! tinue. In tsachilari nu Diosi jonunca miilaisa tenjae tinue. Junsi nunan manaman nuchica manjalaisa tinaeque miisa caride! tinue.

38 Junni jun óratenan Miya Diosiri nin erenue. Junni nin patato, wala tsachicaca, teca, sucaca, to lucuca, junsi pi contibi pomincanan jera nin ponue. 39 Junni tsachilari yaca quirato, tobi mutsaito telenhito itsantilatinue: Miya Diosiri tsa Diosi joe latinue; Miya Diosiri tsa Diosi patsa joe latinue.

40 Junsi Elíari itsantinue:

—Junpalu patsa mante chunca Baálichi tsachilaca calaquede! tinue. Mocanantiya sujisa caritulajode! tinue.

Junnan tsachilari yalaca jera calaquinue. Junni Elíari yalaca Cisón tinun na pica tanjito, junte espadachi jera totenue.

41 Junni junte nechi Elíari miya Acabe itsantinue:

—Seque ano fin, pi cuchin, quebi jide! Wa suwa pa joe tinue.

42 Junnan Acari ano fibi jinue. Junni Elíari Carmelo tinun dubi fe jamobi lonue. Junsi junte telenhito, yachi caforoca nede boloncabi tiliino fecári bontoinue Diosibe rocaito. 43 Junni jun tsanhitobi, yabe mantaiminbe itsantinue:

—Lamari minu quiraerede! tinue.

Junnan yabe mantaiminni jito quiranue. Junsi manjato, itsantinue:

—Tinantiya quiratiyoe tinue.

Jun tsantinunsiri, Elíari itsantinue:

—Siete neca junchi quiraerede! tinue.

44 Siete neca manaman jito quiranue. Jun siete ne quiratobi, Elíachica manjasi, itsantinue:

—Tsanini suwa poyo nacá nuwiri quirasá lamaribi nechi lanae tinue.

Junni Elíari itsantinue:

—Miya Acáchica jide! Yachica jito, caroca we sesa tide! Calubi caro chucarito, suwa quito minu cayucapiyaritusanan jisa tide! tinue.

45 Junni Acab yaca merásiri, yachi carobi loto, Jezreel puebloca jinue. Jun jinasari, yo quido jera nemenle cayaito, duque wu quito wa suwa quinue. 46 Junsi Elíari nedechi sucachi jinue. Sendorica seque teleto, aman Miya Diosi duque sonba cuwanasa, Jezreel pueblobi Acaca caquenan manfenue.