—La israelítalachi Miya Diosibe mantaimin joto, yachi mantate itsantinayoe: In watalate suwa quituchunae nin nasi nacátiya. La suwa manquisa tino fecári suwa quituchunae tinue.

2 Junni Elías tsantinunsileri, Miya Diosi yabe itsantinue: 3 Nuri inte nechi jide! tinue. Yo lanun nan tala jito, Querit tinun na pi minu tsaide! tinue Jordán pi becochi. 4 Junte na pibi pi cuchino podeichunae, junsi pichulaca ereyanae tinue yape nuchi ano tanjilaisa.

5 Junni Elíari Miya Diosi mantaca junca meráto, Querit tinun na pi quelote chubi jinue Jordán pi becochi. 6 Junni quepenanan, quebi inasa, pichulari bibube tsachicabe tanjinaminlanue. Junsi Elíari na pibi pi cuchinaminue. 7 Juntonan ma polede jinasari, jun tote suwa quitunan, ya na pinan fuinue.

8 Junnan Miya Diosiri Elíabe itsantinue: 9 Sarepta puebloca chubi jide! tinue Sidón pueblo quelole. Junbi biuda manca chuminca mantacayoe tinue nuchi ano cuwasa.

10 Junca merasi, Elíari Saréptaca jinue. Jun pueblobi wito, biuda manca te layanaminca quiranue. Junni yaca quirato otito, itsantinue:

—Pi man baso nasi tanjade! tinue la cuchichun.

11 Junni ya biudari pi cabi jinasaleri, Elíari manaman otito itsantinue:

—Bibu manca nacá nasi tanjade! tinue.

12 Junni biudari itsanque manpanue:

—Chique nuchi Miya Diosichi cale juraquito pachinayoe tinue. Bibucari natiya itoyoe tinue. Tarobi arina man chumi tsansiri tayoe tinue; junsi boteya máncabi aseite nasi nacári tayoe tinue. Te nasi layanamanyoe tinue chiquechi, junsi naochi, bibu asuwachun. Junsi ya bibu nacaca fisiri, wari ano mochi puyanilaiichunae tinue.

13 Junca meráto, Elíari itsanque manpanue:

—Jeleratude! tinue. La pánacaca meráde! Bibu quiniquede! tinue. Juntonan casale lachi bibu quito ninfu tenpe asuwade! tinue; junsi aman nulachiman quina! tinue. 14 Aman israelítalachi Miya Diosi itsantinae tinue: Nulari bibu michi tanola joe tinae tinue fichun. Miya Diosi manaman suwa quisa carino fecári, nuchi arina, aseite jeraituchunae tinae tinue.

15 Junni ya biudari Elías mantaca junca meráto, tsanquinue. Junni ya biuda, yachi familiala, junsi Elías, duque ma fecári michi ano fino taminlanue. 16 Miya Diosiri Elíabe pacari, jun tsannan inue; arinanan, junsi aseitenan, natiya jeraitunue.