3 Junni Elías yaca meráto, yachi tenchi seiton jonunca tenhinue. Junto junte nechi sujinue yape totelaquitusa. Casale Beerseba puebloca jinue, Judá tobi; junsi yabe mantaiminca junte purato, 4 niyanlanantiya chutunun posto minu jinue. Niyanlanantiya chutunun postoca man malon jinaminnan, enebro tinun chide pele tenpe chudinue. Puyachi tito, itsantinue: Miya Diosi, wari wantaitiyoe. Puyasa caride! Lari lachi tatalaca fe itoyoe tinue. 5 Junsi ya chide pele tenpe tsodito catsonue.

Junni anjeli manca jato, tale quito itsantinue: Cupato, ano fide! tinue. 6 Junni Elías cupato quiranari, ya tsonun misule bibu manca nin pocachi asuwaca jun tsominue; junsi pi nidabi pun chuminue. Junnan cupato yaca fin, pi cuchin, quito manaman mantsodinue.

7 Juntonan manaman Miya Diosichi anjeli jato, manaman taquiranue. Junto itsantinue: Cupato fide! Duque nuwiri jino joe. Jun fitutori, jino sonba itochunae tinue. 8 Junnan Elías manaman cupato, ano fin, pi cuchin, quinue. Ya anori junpalu chunca maca, quepen malon jino sonba cuwanue Horeb du fecári jichun. Jun dute Miya Diosi Moisebe cuenta quica jominue.

9 Junni du minu féto, wa foro tenpe wito, man quepen polenue. Jun tseinunbi, Miya Diosi Elíabe pato itsantinue:

—Elías, ¿nu inte ti quinayun? tinue.

10 Elíari beco pato itsantinue:

—Miya Diosi, nusiri ticatiya jera quino poden joe. Tsan josanan, israelítalari nube trato quica junca pansicala joe. Juntonan lari nuca duque laquirato, duque tenfecayoe yalaca nuchi cate seque nenalarasa carichique. Juntonan yalari nuchi titiya epe cuwanun mesalaca jera bolecala joe; junsi nuchi mantate paminlaca espadachi jera totecala joe. Junnan la mancari nuchi mantate pamin casonnayoe. Juntonan lacanan petotechun neyalaquinae tinue.

11 Junni yaca meráto, Miya Diosi Elíaca itsantinue:

—Forochi nechi lato, lachi cate wiruide! tinue in dute.

Junnan Elías calatusanan, Miya Diosi yachise polenue. Duque sonba wu quinan, dubi su bajilainue. Juntonan jun wubi Miya Diosi itominue. Junsi duque to wenue. Jun to weca junbinan Miya Diosi itominue. 12 To wenaca polenunbi, nin lunaca jun jominue. Jun nin lunaca junbinan Miya Diosi itominue. Jun nin lunaca jun polenunbi, man fiqui jamimin, junsi jera nosasa jominue. 13 Junni Elías ya fiquica meráto, yachi panu nannunchi yachi caforoca donue. Junsi forochi nechi loto, foro winle wiruinue. Junni man fiqui itsantinaca jun mera jominue:

—Elías, ¿nu inte ti quinayun?

14 Junni Elías yaca meráto, itsanque beco manpanue:

—Miya Diori, nusiri ticatiya jera quino poden joe. Juntonan israelítalari nube trato quica junca jera pansicala joe. Juntonan lari nuca duque laquirato, duque yalaca nuchi cate nenalarasa carichique tenfecayoe. Juntonan yalari nuchi titiya epe cuwanun mesalaca bolecala joe. Junsi nuchi tenchi paminlaca espadachi totecala joe. Junnan la mancari nuchi tenchi pamin cajoyoe. Junsi lacanan petotechun neyalaquinae tinue.

18 Juntonan Miya Diosi itsanque manpanue:

—Tsan itoe, Elías; tsan itoe. La Israel tobi siete mili tsachila labe penenaminlaca tayoe tinue. Yalari Baálichi cale telenhito rocaica itolajoe; nin motinan tica itolajoe tinue.

19 Junni Elías junte nechi manjito, Eliséobe tulainue. (Aman Eliséochi apa Safat mumun jominue.) Junni Eliséori wita minu to bulenaminue. Chunca manca peyun taminue; yala manca cura paluca wala taminlanue. Junni Eliséori yalachi benechi jinaminue; yanan paluca walachi to bulenaminue. Junni Elías Eliséochi quelo féto, yachi panu nannunca Eliséochi jamo nannue. 20 Junnan Eliseo tenhinue Elíabe peayudaimin ito pejino joyoeque. Junto walalaca purato, Elíachica sujito itsantinue:

—Lachi apaca, ayanca, motito despediibi moora jisa caride! Junto aman nube pejibi manjanae tinue.

Elías beco manpato, itsantinue:

—Se joe, jide! Juntonan la niyan quica junca pansituna! tinue.

21 Junni Eliseo jito, yachi wala palucaca toteto, to bulenun chidechi wala tsachicaca asuwato, tsachilachi filaquisa cuwanue. Juntobi Elíachi ayudaimin ito, Elíabe pejinue.