—Uyan quiraque seide! yape lachi sona joeque miilaitusa. Junsi, Silo puebloca jito, Ahíachica jide! Yari Diosichi mantate pamin tsachi joe. Junto matulenan labe paca jominhe la in tobi miya ino joeque. 3 Junsi chunca bibu tanjide! Man frasco china pi, junsi uyan finocanan tanjide! Ahíachi epe cuwachun. Junto yabe panhade! tinue chiquilachi nao niyan ino jonunca.

4 Junni Jeroboanchi sona jun tsanque jera seitobi jinue. Junto Sílobi fesi, Ahíachi yaca jinue. Junni Ahías quirano podeiton inaminue unicachique. 5 Juntonan Miya Diosiri yaca tenhisa carinue Jeroboanchi sona janaeque. Yachi nao quiyanpun jonan, yari niyan ino jonunca panhabi janaeque tenhisa carinue. Junsi Diosi Ahíabe itsanque panue: Jeroboanchi sona uyan quiraque seito janae yape mo jonunca miino podeitusa. Junsi Diosi Ahíabe ya sona fanasa niyaque manpano jonuncanan panue.

6 Junni Ahías ya sona tamolante wiyachinaminca tenhisi, itsantinue:

—Jeroboanchi sona, wiyaniide! ¿Niyaito nene pano muquin uyan tsachichi sona joyoeque? Diosi laca mantaquee nube sonba fiqui pasa. 7 Junni nuchi yaca manjiniide! Junto Jeroboanbe itsanque pana! tinue israelítalachi Diosi paca junca. Jeroboanbe Diosi itsanque pánae: La Jeroboanca epe tsachi jominca wenteto, miya suwacayoe tinae lachi israelita tsachilaca mantasa. 8 La miya Davichi familialachi mantaca manjosoleyoe tinae ya mantaca nuchi mancuwachun. Juntonan nuri David cuwenta labe mantaitue. Yari laca seque obedeseito la munaranuncasiri quimin jominue.

9 Nu miya caitosanan, weyanlari miya jominlanue; yala weyanlari seque mantaitumin jominlae. Juntonan nu Jeroboam, mantá catobi yalaca fécari mantaituchi tinae. Junsi nu jutsa quee Diosi nuca pa isa. Fieroca moldela quisa carito, yalaca diosila joe tito la tsa Diosica purae. 10 Jun tenchi la nuca casticaquino joyoe tinae, junsi nuchi familialaca, peyunla, ticatiya. Nuchi alicala in tobi chuminlaca jera puyasa cariyanae. Unilalaca nin mancacatiya son puratuanae. Nuchi alicalaca jera quechinayoe peca tapecasinun cuwenta. 11 Junni nula tala puyanunbi menantiya quitulajochunae. Pueblobi puyaca junlaca susu filaquichunae; uyante puyaca junlaca baro filaquichunae tinae tinue. Junni Miya Diosi tsanhichunaeque paca jonan, jun tsanhichunae tinue. Jeroboanbe Diosi tsanque pánae tinue.

12 Junni nu, yachi sonabe tsanque pánayoe: Nuchi yaca manjide! Pueblobi manwinasa, nuchi na puyachunae. 13 Junsi israelítala jeralela warelaquichunae ya na tenchi. Yaca menalaquichunae. Juntonan Jeroboanchi alicalale nechi ya nasiri menaichunae. Ya nasiri israelítalachi Miya Diosichi cale sen jominue tinue.

14 Man mate Diosi uyan tsachica israelítalachi miya mansuwachunae tinue. Aman ya tsachi miya itobi, Jeroboanchi alicalaca jera totechunae. Moora tsanhisa carichunae tinue. Ahías Jeroboanchi sonabe tsanque panue.

17 Junni tsantinunsi, Jeroboanchi sona manjinue Tirsa puebloca. Junni yachi yabi manwinasale, ya na puyanue. 18 Junni náca menato, jerale israelítala yachi tenchi duque warelaquinue. Miya Diosi yachi mantate pamin Ahíachise tsanque paca jominue; junni jun tsannan inue.

19 Junni Jeroboam duque quera quicaamin jominue. Junsi uyan cosanan titiya quimin jominue. Junni ya titiya jera quica junca israelita miya jominlachi pilabi jera chuteca joe. 20 Jeroboam palu chunca palu wata miya joto mantanaminnan puyanue. Ya puyacabi yachi nao Nadab miya manhinue.

21 Junnasa Roboam, Salomonchi nao, Judá tobi miya jominue. Junni Roboanni junpalu chunca man wata tan joto miya ino patinue; junsi chunca siete wata fecári Jerusalenbi mantanue. Aman Miya Diosiri israelítalachi tobi jera pueblole nechi Jerusalén puebloca wenteca jominue yape tsachilari junbi Diosi chue latisa. Aman Roboanchi ayanni Naama mumun jominue; amonita sona jominue. 22 Junni Roboanni miya jono mate Judá tobi chuminlari Miya Diosichi cale duque seiton quimin jominlanue. Matu unicala jutsa quica jominlaca fécari seiton quimin jominlanue. Tsan joto, Miya Diosica fécari paisa carilaquinue.

25 Junni Roboanni mante wata mantanasanan, Egipto miya yachi tobi nechi jato Jerusalenbi chuminlaca quera quinue. Junni ya miyachi mumunni Sisac jominue. Junni Sisachi soldadolari Roboanchi soldadolabe quera quicaalaquinue. 26 Junto Roboanchi yabi, junsi Diosichi yabi wito, duque mica cosalaca jera tarinlaquinue. Ticatiya jera tanjilainue. Aman Salomonni miya jono mate óroca isainun escudonan quiran duque quisa carica jominue. Junni Egipto soldadolari ya escudocanan jera josoleto tanjilainue.

30 Aman Roboanchi soldadolari Jeroboanchi soldadolabe numasitiya quera quicaato chuminlanue. 31 Junsi Roboam puyanunbi Jerusalenbi matu unicala menaranunte menalaquinue miya Davichi pueblobi. Yachi ayanni, Naama mumun, Amón tobi nechi jominue. Junni Roboam puyanunbi yachi nao Abianni miya manhinue.