4 —Roboam, nuchi apa Salomón duque sonba trabajaquisa carimin jominue. Junni aman nu chiquilabe duque sen joto, chiquilaca layan trabajaquisa carituna! Tsan jotori chiquilachi miya jochunada.

5 Junni Roboanni itsantinue:

—Nulari manjinilaide! Peman ma poletobi manjalaina! labe cuenta manquebi.

Junni tsachila manjilainue.

6 Junni miya Roboanni yachi apa casonnasa ayudaimin unicalabe cuenta quinue. Roboam unicalabe itsanque panhanue:

—Nulari panilaquede! ¿Israelítalabe niyaque manpano jowan? tinue.

7 Junni jun unicalari itsanque palaquinue:

—Tsachila pánaminca meráto, seque manpánari, yala numasitiya nube mantailaichunae latinue.

8 Juntonan Roboam unicala payinunca merátunue. Yabe parejo uwaito ayudaiminlabe panhanue. 9 Yalabe itsanque panhanue:

—¿Niyaque nula laca payino jolajoyun? tinue. Tsachila laca yalabe sen josa tilatinae. Lachi apa cuwenta duque trabajaquisa caritusa tilatinae. ¿Niyaque la manpano jowan? tinue.

10 Roboanbe parejo uwaiminlari itsanque palaquinue:

—In tsachilabe itsanque manpano joe: Lachi apari nulaca duque sonba mantamin jominue. La mantimini fe duque sonba mantaqueyanae tintsan joe latinue. 11 Yari nulaca duque sonba trabajaquisa carie. La mantimini fe duque sonba trabajaquisa cariyanae tintsan joe latinue. Yari coreachi asota quinue; la mantimini po chun silichi asota queyanae tintsan joe latinue.

12 Junni peman mate Jeroboanbe weyan israelítalabe Roboánchica manjalainue ya mantacaca meráto. 13 Juntonan Roboanni duque seitonque sonba manpanue unicala payica junca merátuto. 14 Uyanla payica jonunca pato itsantinue:

—Lachi apa duque sonba trabajaquisa carimin jominue; lari junca fe duque sonba trabajaquisa cariyanae tinue. Lachi apari coreachi asota quinue; la mantimini po chun silichi asota queyanae tinue.

15 Miya Diosi jera cuidainaminue. Yari Ahíaca matunan Sílobi nechi ereca jominue Jeroboanbe cuenta quisa, ya israelítalachi miya manhino joeque pasa. Junni israelítalari miya Roboam seitonque sonba pánaminca merátuchi tilatinue. Yalari yaca quepoto, Jeroboanca miya mansuwachi tilatinue. Junni Miya Diosi jera tsanhisa carinaminue yachi fiqui jera tsarasi patisa. 16 Junni israelítalari, miya Roboam yalaca merátunan, itsanque palaquinue:

—Nu Roboam, miya Davichi nieto jotonan, chiquilachi miya itochunae. Davichi familialabe man junni itolajoyoe. Junni chiquila jeralela chiquilachi yaca manjilaichinayoe. Davichi familiala yalachi boloncari cuidailaichunae.

Tsantitobi, Judachi bolon iton israelítalari jera manjilainue yalachi yaca. 17 Junni Roboam Judachi bolonlacari mantanaminue. Weyan israelítalari Judá bolonla itonlanan, judálachi tote pechuminlanue. Junni Roboam yalacanan mantanaminue.

18 Aman Adoranni miyachi tenchi inpuesto cala casa carimin jominue. Junni Roboam Adoranca israelítalachica manan manherenue yape ya calaca cuwalaquisa. Junnan Roboanbe mantaituchi timinlari Adoranca su walacachi quito totelaquinue. Junni Roboam junca meráto, calu muricanun carobi we loto, yalaca jelechi Jerusalenca sujinue. 19 Tsanque israelítala miya Davichi familialaca paito, yalaca puralaquinue yape yalaca mantatusa. Amana ma fecári israelítala tala Judachi bolon, chican jolajoe.

20 Junni israelítalari Jeroboam manjaca jonunca tenhilaito, yaca jasa carito, jeralelachi cale wirucarito, yaca israelítalachi miya suwalaquinue. Judálasiri Davichi familialabe camantainaminlanue.

25 Junni Jeroboam miya ito, Siquem tinun puebloca mansesa carito, junbi chuminue. Siquem Efraín to dubi joe. Junsi Penuel puebloca jito, ya pueblocanan mansesa carinue. 26-27 Junsi Jeroboam itsanque tenca canue: Miya Diosichi ya Jerusalenbi chue Judá tobi. Aman Roboam junbi miya joe. Junni israelítalari Diosichi epe cuwachun Jerusalenca jilaitori, miya Roboanbe amico manhilaichunae. Junni yabe amico manhitori, laca toteto, yabe manan mantailaichunae. Tsanque Davichi familiala Israel tobi chuminlacanan manaman mantá talarachunae.

28 Junni Jeroboam yabe ayudaiminlabe tenpalaquetobi, paluca wala na molde óroca quisa carinue. Tsanquesi, israelítalabe itsantinue:

—Israelítala, meralaquede! tinue. Nulari Jerusalenca michi jilaie tinue. Amanale nechi Jerusalenca jino itolajoe. In paluca wala na nulachi diosila jolajoe. Yalari nulaca Egíptobi nechi manlarilaquinue tinue.

29 Junni ya wala na molde quisa carica junca Jeroboanni mancaca Betel pueblobi, mancaca Dan pueblobi, chutesa carinue. 30 Jun tenchi israelítala ya moldeca se tito jutsa quilaquinue. Ya molde manca duque nuwiri jominue Dan pueblobi. Junni jun fecárinan jito, yaca se tinun tenchi Miya Diosichi cale duque wa jutsa jominue. 31 Junsi Jeroboam du puntabi ya quisa carinue ya seiton moldelaca se tichun. Junsi weyan tsachilaca patele suwanue yape ya moldelaca se tilatisa. Diosi Levichi alicalacari patelela jonola joe tica josanan, Jeroboam uyanlacanan patele suwaniquinue.