9-10 Junsi israelítalachi Miya Diosi Salomonca painue. Diosiri Salomonbe palu ne quiraica jominue. Junsi itsantica jominue: Uyan diosi tinunlaca se tituna! tica jominue. Tsanque paca josatiya, Salomonni yachi tencabi Miya Diosica se tino deito, yachi mantaca merátunue. 11 Jun tenchi Miya Diosi Salomonbe itsantinue: La nube trato quica jonunca nu seque nenatue. La mantá cuwaca junca merántiya quitunue. Junni jun tenchi la nuchi familiala mantá taminca jera manjosoleyanae yape nuchi alicala israelítalachi miya itolajosa. Ya mantaca josoleto, nube peayudaiminchi mancuwanae tinue. 12 Junni nuchi apaca duque laquirato, nu casonnasari camanjosoletuanae. Nuchi nao miya josa tsanqueyanae tinue. 13 Juntonan nuchi naochi mantaca tsanle jera josoletuanae. Jerale israelítalachile nechi man bolonbi camantasa cariyanae. Junsi Jerusalén pueblocanan camantasa cariyanae la wenteca jun puebloca. Tsanqueyanae nuchi apa Davica laquiratosiri.

26 Junni aman tsachi manca, Jeroboam mumun, yari miya Salomonchi contra inue. Jeroboanni Nabachi nao jominue. Yari Salomonchi cotole mantamin jominue. Sereda pueblobi nechi tsachi jominue; Efraínchi alica israelita jominue. Yachi ayan Zerúa biuda jominue.

29 Junni manca mate Jeroboam Jerusalenbi nechi loca jominue. Junni minute jinasa, Diosichi mantate pamin tsachi manca tulainue. Yari Ahías mumun jominue; Silo pueblobi nechi jominue. Yari casan panu nan jun jinaminue. Junni yala palucasiri witate raminlanue. 30 Junni Ahíari yachi casan panuca cato chilenue. Chunca palu piti quinue. 31 Junsi Jeroboanbe itsantinue:

—Nen, in chunca piti tsanpa. Israelítalachi Miya Diosi nube itsanque pánae: Amana Salomón chunca palu bolon israelítalaca mantanae. Junnan in tsanpaca pitito nuchi chunca piti cuwaca joe. Aman jun tsanquenan la Diosi chunca bolon israelítalaca Salomónchica josoleto, nuchi cuwachinayoe tinae tinue yape nu yalachi miya josa.

32 Juntonan jerale israelítalaca Salomónchibi nechi josoletiyoe tinae tinue. Yachi apa Daviri labe duque seque mantaimin jomin jonan, yaca laquirato, man bolon israelítalaca puranae tinae tinue (Judachi alicalabe Benjaminchi alicalabe). Davichi alicala yalaca mantalaquichunae. Junte nechi Jerusalén pueblocanan puranae yape Davichi alicala yacanan pemantalaquisa. Jun pueblo la jerale israelítalachi pueblobi nechi wenteca jun pueblo joe tinae tinue. 33 Salomonla laca puraca jonan, yala mantá taminca josolechinayoe. Astoret moldeca se tilatinae sidóniolachi diosica. Junsi Quemos moldeca se tilatinae moabítalachi diosica. Junte nechi Milcom moldecanan se tilatinae amonítalachi diosica. Lachi caleri seque nenatumin icala joe. La mantaca junca merátumin icala joe; yachi apa David cuwenta itolajoe tinae tinue.

34 Juntonan Salomón casonnasanan yachi mantaca camanjosoletuanae. Ya casonnaminnan, israelítalachi miya cajochunae tinae tinue. Yachi apaca laquirato tsanqueyanae yari labe seque mantaimin jomin jonan. 35 Juntonan Salomonchi nao miya jonunbi manjosoleyanae. Junni Jeroboam, yachi mantaca josoleto, nuchi mancuwanae tinae tinue yape nu chunca bolonchi miya josa. 36 David labe seque mantaimin jonan, yaca wentecayoe. Junsi Jerusalenca wentecayoe yape lachi sen pueblo josa. Junni Davichi alicala jun pueblobi camantalaquinasa, David patsanan junbi mantamin cuwenta jochunae. Lachi cale tseno cuwenta jochunae Davica mantenhichun. Juntonan yalari junbi mantalaquitunari, ya tseno piyaca cuwenta jochunae. Jun tenchi Jerusalenca josoletuto, Davichi alicalachinan manpuranae tinae tinue yape yalari camantalaquisa.

40 Junni Salomón junca miisi, Jeroboanca totechi tinue. Junnan Jeroboam Egíptoca sujinue miya Sisáchica. Junni Jeroboam Egíptobi chuminue Salomón puyano fecári.

41 Salomón duque titiya uyan cosa quinue. Junni duque titiya pánaminue duque miranun fiquica. Aman junca in pilabi chuteca itonan, manca pilabi chuteca joe “Salomón titiya quica jonunca” tinun pilabi. 42 Salomón junpalu chunca wata fecári jerale israelítalaca mantanue Jerusalenbi chuto. 43 Junni ya puyanunbi Jerusalenbi menalaquinue. Ya pueblo Davichi pueblo tinun jominue. Junni Salomón puyacabi yachi nao Roboam israelítalachi miya manhinue.