Sabá to miya sona Salomonca quirabi janunca
10
1-2 Jeralela miraminlanue Miya Diosi Salomonca duque tenca tan, respetainun suwaca joeque. Junsi Sabá to miya sonanan junca meráto, Jerusalenca jinue Salomonbe ti tenfe fiquilacatiya panhabi. Yari manpano podeino jonunca miichique panhabi jinue. Junni ya sonari Salomónchica janato, duque ticatiya tanjanue epe cuwachun. Puban pi, oro, mica suca cameyobi panarica jun tanjanue. Junni Sabá to miya sona Salomonchi cale jisi, jera cuenta polarinue titiya tenca caya jonunca. 3 Junni Salomonni ya sona panhanacaca jera manpanue. Nin man fiquitiya itominue ya pano podeitunun fiqui. Jera manpanue.4 Junni Sabá to miya sonari tenhinue Salomonni duque tenca tan joeque. Junsi jun ya quicaca quiranue duque uraran quica jominueque. 5 Junsi sen ano finaminca quiranue. Junsi yachi cotole mantá tanlacanan quiranue sen yabiri chuminla jonunca. Junsi yabe mantaiminla niyaque sonnaminla jonunca, moso tsanpa pominla jonuncanan quiranue. Junsi yachi ano cuwanaminlacanan quiranue. Junsi Diosichi yabi animali tanjito nin poto Diosichi cuwanaminlacanan quiranue. Junni ya sonari tsan jominlaca quirato, duque wepanato son tinue. 6 Junto miya Salomonbe itsantinue:
—Chiquechi tobi chuminnan meránamanyoe tinue nu tsan jonunca. Tsan jonan tenhiyoe nu duque tenca tan joeque. Junni ticatiya jera meraca jun, tsa jominue tinue. 7 Junni junbi chuminnan quereica itomanyoe. Junni amanari inchi jato chiquechi cacachinan jera quirato, aman quereiyoe. Junni chiqueri nu duque min joeque meraca jonunca, nu duque fécari min joe. Junsi duque sen cosalaca taeque meraca josanan, nu duque fécari sen cosalaca tan joe. 8 Junsi nuchi mantate mantaminla duque son jolajonae. Junsi nuchi tenchi trabajaquiminla duque son jolajonae. Numasitiya nuchi cale jolajoe nuchi sen fiquica meráchun. 9 Chique nuchi Miya Diosica se tinayoe tinue. Yari nuca sen joe tito israelítalachi miya suwaca joe tinue. Miya Diosi israelítalaca numasitiya laquirae; jun tenchi nuca yalachi miya suwaca joe tinue yape yalaca seque mantasa.