Abiam, junsi Asa, Judá tobi miyala jonunca
15
3 Junni Abianni yachi apa niyaque jutsa quimin jomin jonatiya, yanan jun tsanquenan quimin jominue. Yachi tatachi apa Daviri yachi Miya Diosica seque laquiramin jomin josanan, Abianni ya cuwenta itominue.8 Junsi Abiam puyanunbi, yacanan Jerusalenbi menalaquinue Davichi pueblobi. Junsi yachi nao Asari miya manhinue.
11 Asari Miya Diosichi cale sen jominue; yachi matu tata David cuwenta seque nenamin jominue.
Israel tobi miyala
25 Junni Judá tobi Asari palu wata mantanasanan, Israel tobi miya Jeroboam puyanue. Junni Jeroboam puyanunsi, yachi nao Nadab miya manhinue. Yari palu wata fecári mantanue. 26 Juntonan yari yachi apa cuwenta joto, Miya Diosichi cale seitonque nenamin jominue. Yachi apari uyanlacanan jutsa quimiyamin jomin jonan, Nadari jun tsannan jominue.
27-28 Junni tsantin chularasanan, Baasa tinun israelita tsachiri miya Nadaca paito yachi contra inue. Baásari Ahíachi nao jominue Isacárichi alica. Junni miya Nadabe yachi soldadolabe filistéolachica jito yalabe quera quicaalaquinue. Junni filistéolachi Gibetón tinun pueblote quera quicaalaquinato, Baásari miya Nadaca totenue. (Miya Asa peman wata Judá tobi mantanasa yaca totenue.) Yaca toteto, Baásaman israelítalachi miya manhinue. 29 Junto Baásari mantá casi, Jeroboanchi familialaca jera totenue. Matuleri Miya Diosiri yachi mantate paminca junca pasa carica jominue. Aman ya Diosichi mantate paminni Ahías mumun jominue. Sílobi chumin jominue. Junni Diosi ya Ahíaca pasa carica jominue Jeroboanchi familialaca jera totesa cariyanaeque. Junni tsantica josa, Baásari jun tsannan quinue. Nin mancatiya son puratunue.
Miya Acab
Junni jun tsanque polenunbi, Israel tobi duque uyan miya jominlanue. Baásachi nao Ela miya jominue; junsi Zímriri yaca toteto yaman miya manhinue. Juntonan Zímriri siete maleri puyanan, Omri tinun tsachiman miya manhinue. Junsi Omri puyanunbi yachi nao Acab israelítalachi tobi miya manhinue. Junni ya miyalari jeralela Diosichi cale duque seitonsiri quimin jominlanue. Acab mantimini uyanlaca fe duque seiton quimin jominue.