Junni Jericó puebloca quera quito jera nin pun, toten, balen quito yucapiyarino jominlanue. Junni tsanque yucapiyarinato, weyan weyan cosalacari cato Diosichi cuwano jominlanue. Tsanque Diosi mantaca jominue. Junnasa Acán mantimini yachi tencachique cato, tsaca jominue. Junni Acanni Diosi catusa tica junca cato, jutsa quinun tenchi, Miya Diosichi caleri jerale israelítala jutsa quica cuwenta jominlanue. Junni catusa tica junca canan, Miya Diosiri jerale israelítalaca pa jominue.

2 Junni Josueri weyan israelítalaca Hai tinun puebloca quiracalaquisa erenue ya pueblocanan josolechun. Aman Hai tinun pueblori Betel tinunle nechi yo lanun nan tala jominue Betavén tinun pueblo quelote. Junni israelítalari junchi jito, quiracato manjalainue. 3 Junto Josuebe itsantilatinue:

—Hai puebloca quera quichunni jera israelítalaca ereno munaratue tilatinue. Ya pueblori duque na nacá pueblo jonan, palu mili o peman mili tsachila michi jochunae tilatinue. Hai puebloca isaichun duque tsachila itolajoe tilatinue.

4 Junni tsantito, peman mili tsansiri Hai puebloca quera quebi jilainue. Juntonan yalacari Hai pueblobi chuminlanan jera fe lolainue. Junni israelítalari jera sujilainue. 5 Hai pueblobi chuminlari peman chunca sotaca israelítalaca totelaquinue. Junsi weyan israelítalacari Haibi nechi Sebarim fecári sutanjalainue. Aman dute beneito, yalaca fe lolainue. Jun tenchi israelítalari cumana tenca ito jera peleilainue. 6 Junni Josuebe junsi fe mantaminlaberi junca meráto, yalachi camisaca chilen, misubi to lucu pun, quilaquinue duque duque wepanato laqui jolajoyoeque micuwachun. Junsi aman Miya Diosichi cajon caquele telenhito, tobi mutsaito, quebi inasa fecári telenraminlanue. 7 Junto aman Josueri Diosibe itsantinue:

—Ayay, Miya Diosi, ¿ti quichun chiquilaca Jordán pica tanpolajaca jomanyun? tinue. ¿Amorréolachi cuwapochun inchi tanjaca jomanyun? tinue yape yalari jera totelaquisa. Jordán pi ja beconan puraica jomanpari, se jono jomin jonhoe tinue. 8 Ayay, Miya Diosi, tinue. Israelítalari pa jominlaca jelechi sujilainan, duque lu joyoe tinue. 9 Cananeo tinunla, junsi uyan in tote chuminlari junca meráto, yalari layaito chiquilabe quera quebi jalaichunae tinue. Junni chiquilari mancatiya sonnacaituchunae tinue. Jera puyacaichunae tinue. Junni Miya Diosi, chiquilari jera puyanari, nuca seitonque palaquichunae tinue.

10 Junni aman Miya Diosiri Josuebe itsanque panue: Manwiruide! Tobi mutsaituto, uyan cosa quino tenca cade! tinue. 11 Israelita tsachi manca la mantacaca merátuto, jutsa quee. Jun tenchi israelítala quera quicaato peleilaie. Catusa tica junca cae. Ya cosalaca o nin pun, o Diosichi cuwan, quino jotonan, caniquee. Seitono joeque miratonan tarinto, ya titiya tanunlabe parejo tsato tae tinue. 12 Jun tenchi la Diosi israelítalaca casticaquito peleisa cariyanae. Quera quicaato fe lono podeituto wari sujilaichunae tinue. Junto sujito nenalarachunae tinue. Israelítalari tsanque seiton quinan, yalacanan yucapiyarintsan joe tiyanae Jericó puebloca cuwenta. Jericobi chuminlachi cosalaca weyanca nin pun, weyanca Diosichi cuwan, quisa tica jomanyoe tinue. Junto nulari yaca tsanquino fecári, lari nulabe peitoanae tinue.

13 Junni nuri we manwiruito, jerale israelítalabe cuenta quede! yape ayuna lachi cale jochun tenca seilainasa. La israelítalachi Miya Diosi tsantinayoe tinue. Nulari catusa tica junca calaquee tinue. Junto amanari ya caya junca nin pun, o lachi cuwan, quino fecári, nulari nulaca pa jominlaca fe lono podeilaituchunae tinue. 14 Junni jerale israelítala bolon cura ayuna lachi cale quirainola joe. Casaleri chunca palu bolonbi bolon cura fe mantá tanlasiri lachi cale janola jochunae tinue. Junni aman lari micuwanae nun bolonbi catusa tica junca cato tsato tanunca. Junni jun bolonbi nechiman wa familia cura lachi cale janola jochunae tinue. Junni lari jun bolonbi nun wa familia caya jonunca micuwanae tinue. Junni ya wa familiabi nechiman na familia cura lachi cale janola jochunae tinue. Junni lari jun wa familiabi nechi nun na familia caya jonunca micuwanae tinue. Junni jun na familiabi nechi manca cura lachi cale janola jochunae tinue. Junni lari nun tsachi caya jonunca micuwanae tinue.

15 Junni nulari ya caya suwaca jun tsachicari totenola jochunae tinue. Yaca toteto, yaca, junsi titiya tanunca jera nin ponola jochunae tinue. Ya israelítari jera israelítalaca lu tintsan quica jominue. Jun tenchi tsanque casticaquinola joe tinue. Yari Miya Diosi mantacaca merátumin jonun tenchi tsanlaquina! tinue.

16 Junni aman ayuna nanchi Josueri quepenan wiruito, jerale israelítalaca man bolon cura Miya Diosichi cale jito quiraisa mantanue. Junni Miya Diosiri Judachi bolonca micuwanue. 17 Junni aman Josueri Judachi bolonca wa familia cura Miya Diosichi cale quiraisa carinue. Junni Miya Diosiri Zérachi familia bolonbi micuwanue. Junni Zérachi familiabi nechi Zábdichi bolonbi micuwanue. 18 Junni aman Zábdichi familialari manca cura Diosichi cale quirainan, Diosi Cármichi nao Acán tinunca micuwanue. Yari Zábdichi nieto jominue Judachi bolon israelita.

19 Junni aman Josueri Acanbe itsantinue:

—Nuri lachi nao cuwenta meráto, nene patuto, tsarasica paniquede! yape jeralela Diosica se tito yaca seque tenca calaquisa.

20 Junni aman Acanni itsantinue:

—Tsarasica pato, chiquilachi Miya Diosichi cale itsanque jutsa quicayoe tinue. 21 Jericó pueblobi ticatiya jera arara quinato, Babilóniabi nechi duque uraran baren panuca, junsi duque mica cala palu patsaca, oro man piti man libra tsansi jadonca quirato caya jomanyoe tinue. Junni yalaca lachi jali ya tenpe menato tayoe tinue. Juntonan calari tenpe joe tinue.

22 Junni aman Josueri weyan israelítalaca wewe Acanchi jali yabi neyalaquisa erenue. Junni yalari neyato, junte tsato taminca felainue. Calari weyan cosa tenpe jominue. 23 Junto aman jera cato Josuéchica, junsi weyan israelítalachica mantanjalainue. Junni aman yalari junca Miya Diosichi cale tanjito quirawolaquinue. 24 Juntobi aman Acanca Acor tinun conti minu tanjilainue. Junsi yachi titiya jominca jera petanjilainue. Jericobi caya jun calaca, óroca, panuca petanjilainue. Junsi yachi jali yaca, yachi nalalaca, junsi yachi wala, opisa, buro, titiya yachi jominca jera petanjilainue. 25 Junni aman contibi felaito, aman Josueri Acanbe itsantinue:

—Tsanque lu tintsan cosa quituntsan jominue. Junni amanari lu tintsan cosa quica jonun tenchi Miya Diosiri nuca padeseisa carichunae tinue.

Aman Josueri tsantinunsile jerale israelítalari Acanbe yachi familialabeca suchi quito toteto, ya titiya tanunlabe jera nin polaquinue. 26 Junsi aman jun jamo duque duque su dulaquinue. Ya su duri amana ma fecári cajoe. Junni ya contica “Acor” tito, “Lu pasainun conti” tinun joe. Junni aman Acánlaca tsanque totelaquinunbi, Miya Diosiri wari israelítalaca pa itominue.