2 Juntonan Miya Diosiri Josuebe itsantinue: Lari Jericó puebloca nuchi cuwapochinayoe tinue. Junbi mantamin miyabe, junsi yachi soldadolabeca jera nuchi cuwapochinayoe tinue. 3 Junni nula israelita soldadolari Jericó pueblo awinta ma cura man awinpolara ilaina! sota ma fecári. 4 Junsi Diosichi cajonca petannenalarana! tinue. Jun cajón caquele sieteca patelela tutu tan jinola joe. Unila opisa cachica tutu quica junlaca tanola joe. Tsanque ma cura man awinpolara inola joe sota ma fecári. Junni aman siete ma inunbi, siete awinpolara inola jochunae. Junni siete awinpolara inato, patelelari tutu quinola jochunae. 5 Junni tutuca wanca quilaquinasa, nulari sonba otilatina! tinue. Junni tsanque otinunsile Jericó pueblo awinta wa serica jominni wecaito arajito darapatachunae. Junni tsanque jera arajinasale, nulari jun pueblobi tuca wilaina! tinue.

6 Diosi tsanque panunsi, Josueri, ya Nun tinunchi naori, patelelaca layasuwato, yalabe itsantinue:

—Diosichi cajonca cato jilainasa, sieteca patelelari tutu tan, jun cajón caquele jilaide! tinue.

7 Junsi aman jerale israelítalabe itsantinue:

—Jilaide! tinue. Pueblo awinta awinpolelaide! tinue. Quera quicaano minlari jun cajon caquele jilaide! tinue.

8 Junni Josué jera niyaque mantaca jonatiya, jun tsannan ilainue. Cajon caquele sieteca patelela tutu quede jilainue. Jun benele cajonca nana jun jinaminlanue. 9 Quera quicaaminla weyanlari patelelachi caquele jinaminlanue. Weyanlari cajon benele jinaminlanue. Junni patelelari deituto tutu quinaminlanue. 10 Junni Josueri weyan israelítalacari nosasa jilaisa tinue sonba otilatideque mantano fecári.

11 Junni israelítalari jun materi Diosichi cajonca tannenaminlabe man awinta ito manjalainue. Junto aman ayuna nanchi 12 Josuélari quepenan wiruito, patelelari Diosichi cajonca calaquinue. 13 Junsi tsanquenan sieteca patelela jun cajon caquele tutu quede jinaminlanue deituto. Junsi tsanquenan quera quicaaminla weyanlari cajon caquele jinaminlanue. Weyanlari cajon benele jinaminlanue. 14 Junni jun matenan tsanquenan Jericó pueblo awinta man awinpolara isi, manjanilainue. Junni sota ma fecári tsanhilainue. 15 Junni aman siete ma ichun tseinasa, quepenannan wiruito jito, jun pueblo awinta siete neca awinpolelainue. Jun matesiri siete neca awinpolelainue. 16 Junni patelela siete nete tutu quilaquinasa, Josueri jeralelabe itsantinue:

—Sonba otilatide! tinue. Miya Diosiri ya puebloca numa chiquilachi cuwaca joe tinue. 17 Junni ya puebloca jera yucapiyarinola joe. Miya Diosi tsanque mantaca joe tinue. Juntonan Rahábica, yachi familialaca totetulajona! tinue. Ya chiquila ereca jun nosa quiracaminlaca isaica jominue tinue. 18 Jun pueblobi titiya jominca tina calaquituna! Miya Diosi jera jera yucapiyarisa mantaca joe. Ticatiya calaquinari, Diosi paito jerale israelítalaca niyantiya isa carichunae tinue. 19 Aman óroca, calaca, junsi titiya bronseca, fieroca quica juncari calaquina! Juntonan yalari nulachi itochunae; Diosichi cuwanola joe. Yari tsanque mantaca joto, ya tsacumin jochunae tinue. Josueri tsanque mantanue.

20 Junni patelela tutu quilaquinasa, israelítalari sonba otilatinue. Junni tsanque sonba otinunsile, Jericó pueblo awinta wa serica jomin jera wecaito arajito darapatanue. Junni israelítalari jun pueblobi tuca wito fe lolainue. 21 Junni aman junbi chuminlaca jera totelaquinue. Unilalaca, sonalaca, nalalaca, unicalaca, junsi wala, opisa, buro tsanlaca jera jera totelaquinue. Jericó puebloca tsanque jera yucapiyarilaquinue.

22 Junni Josueri paluca nosa quiracabi jica jominlabe itsantinue:

—Nulari Rahábichica jito, yaca, junsi yachi familialaca isaiyanae tica joto, uyanchi jera tanjilaide! tinue.

23 Junni yalari Rahábichi yaca jito, Rahábibe junsi yachi apa, ayan, cayanla, junsi jerale yachi familialaca cato, israelítala chunun quelote tanjilainue. 24 Junsi aman israelítalari óroca, calaca, junsi titiya bronseca, fieroca quica juncari jera laricato, Miya Diosichi cuwalaquinue yachi jali yabi tasa. Junsi pueblobi titiya jomincari jera nin polaquinue. 25 Junni Josueri tsanque Rahábica totesa caritunue. Rahábiri, ya piyanle unilalabetiya seiton imin sonari, yari nosa quiracabi jamin israelítalaca tsacarica jominue. Jun tenchi yaca, junsi yachi familialaca totesa caritunue. Junto Rahábiri israelítalabe pebolon inue.

27 Miya Diosiri Josuebe seque ayudainaminue. Junca jun tobi chuminla jera meralaquinue.