Epe diosica se tino itonunca
7
Moisés israelítalabe cacuenta quinato, itsantinue: Miya Diosiri nulachi sen toca cuwachinae tinue. Amana jun tobi siete bolon tsachila chularae. Bolon cura nulaca fe joto, duque sonban jolajoe tinue. Hetéola, gergeséola, amorréola, cananéola, ferezéola, hevéola, junsi jebuséola junte chularae. Juntonan ya tsachilari nulaca fe duque sonban jolajosatiya, Miya Diosi yalaca jera suerechunae tinue yape nulari junbi wito toca josolelaquisa. 2 Nula yalabe quera quilaquinasa, Miya Diosi nulaca sonba suwato ya tsachilaca fe losa carichunae tinue.Jun quera quinato, nulari yalabe trato quituto jera totenola jochunae tinue mocanantiya laquiratuto. 3 Nulari monantiya ya tsachilabe familia ino podeilaituchunae. Nulachi naolaca o namalaca jun tobi chumin nalan nalan tsachilabe casalaisa carino itolajoe. 4 Junni tsanque casalailainari, nulachi naolaca o namalaca ya tsachilari Miya Diosica purasa carito, epe diosi joe tinunlaca se tisa carilaquichunae tinue. Jun tsanhilainari, Miya Diosi nulaca paito, moora seiton quito casticaquichunae tinue.
5 Ya tsachilari epe diosilaca se tinato, yalachi ticatiya cuwanun mesa talarae. Se tinun molde talarae. Junsi Asera tinun diosichi molde talarae. Junni nulari ya mesalaca, moldelaca, ticatiya jera yucapiyarinola joe. Junsi epe diosi joe tinun moldelacanan jera nin ponola joe. 6 Juntonan nulari uyan tsachila cuwenta itolajoe. Nulari Miya Diosichi sen tsachila jolajoe. Miya Diosi nulaca jerale tote tsachilale nechi wenteca junla joe tinue yape yachi sen tsachila jolajosa. 7 Miya Diosi nulaca laquirato wenteca joe. Juntonan nulacari duque jonun tenchi tsanca itoe. Nulari weyan bolonlaca fe na bolon nacá jolajoe. 8 Juntonan Miya Diosi nulaca laquirato wenteca joe matu nulachi tatalabe juraquito pato ayudaiyanae tica joto. Nula Egíptobi epe mantato tanun esclabo jominlaca manlarie. Duque sonba quito manlarie tinue yape Faraón tinun Egipto to miya wari mantatusa.