Junto nulari jun toca cato chutobi, la amana mantá micaricaca obedeseino jolajoe. In mantári nulachi joe. Nulachi nalalachi, nietolachi, junsi nulachi alicalachinan pejoe. Yaca seque obedeseitori, duque wata chularachunae; junsi jera seque jonan, duque nalala serato, wa bolon ino podeilaichunae. Jun tenchi in mantaca obedeseino jolajoe. Ya mantári itsanque joe tinue:

4 Israelítala, meralaquede! Miya Diosiri chiquilachi Diosi joe. Yasiri tsa Diosi joe. 5 Junnan nulari Diosica jera tencabi tsarasica laquiralarana! Misubinan tsaracari laquirato, sele tenca cato laquiralarana! Jera sonbabe yaca laquiralarana! tinue.

6 La amana pánanunca ura jera miinola joe. 7 Junto nulachi nalalaca in mantalaca micarilaquina! Junsi nula nunchi ratotiya in cosalaca cuenta quilaquina! Yabi rato, o minubi nenato, o catsochinato, o quepenan tala wiruinato, in cosalaca cuenta quilaquina! tinue. 8 In mantaca pila chuteto, tedebi telelaquina! Junsi lesubinan telelaquina! junca manquirato mantenhichun. 9 Junsi in mantalaca tutan pelebi pila chutelaquina! Junsi tamolanbinan tsanquenan pila chutelaquina! tinue.

Junni Moisés israelítalabe capánato, itsantinue: 10 Junni duque wata poleca, nulachi matu tatalabe Miya Diosi juraquito paca jominue ya sen toca cuwanaeque. Abrahanbe, yachi nao Isaabe, yachi nieto Jacóbobe tsantica jominue. Junni aman Miya Diosi ya toca nulachi cuwachinae. Jun tobiri duque uraran wa pueblola jolajoe. Ya pueblolaca nulari quica itotonan tanola joe chuchun. 11 Jun pueblobiri sen ya chularae sen cosalabe, junsi pi canun foro, uba wita, olibo pelela titiya jera. Nulari jun yalate titiya quica itotonan, pi foro quichun to towatuminnan, nin uba wita, junsi olibo pelelaca, waquetuminnan, titiya cato peyaicari fino talarachunae tinue.

12 Junni duque tato pansi chuto, nulari epe mantato tanun esclabo jominlayoeque pansitulajona! Miya Diosi nula Egíptobi esclabo jominlaca manse larica joeque natiya pansitulajona! tinue.

13 Miya Diosicari jelerato respetailaina! Yacari meralaquina! Ticatiya juraquino muquinari, Miya Diosica pato tsanlaquina! Uyan epe diosilachi mumunca palaquituna! 14 Nulachi quelote chumin tsachilari epe diosi joe tinunlaca se timinla joe; juntonan nulari tsa Diosi itoncari se tino itolajoe tinue. 15 Miya Diosiri nulabe pejoe. Motiya yaca se tituto epe diosi joe tinunlaca se tinari, yari paimin joe. Junni nulari Miya Diosica puranari, yari nulaca paito seiton quito nulachi sen tobi nechi manquepolaquichunae tinue. 16 Másabi nula seiton quito miichique tenfelaie nisi fecári Miya Diosi nulachi jutsaca wantaino jonunca. Junni nulachi sen tobi wito, natiya tsanlaquituna! 17 Junsi Miya Diosi niyaque mantanatiya, obedeseilaina! Ya mantá cuwaca juncanan jera obedeseilaina! 18 Miya Diosichi cate se jonuncari quilaquina! nulachi tenchi jera sen josa, junsi ya sen toca josoleno podeichun. Miya Diosi matu mate nulachi tatalabe pato, Ya toca cuwanae tica jominue. 19 Junsi Miya Diosiri nulaca pa junlaca nulachi cate nechi sujisa cariyanae tica joe. Junni nulari jera obedeseilainari, tsanchunae tinue.