Aaronchi tola sununca
17
Junni Miya Diosiri Moisebe itsantinue: 2-3 Jerale israelítala tala mantaminlaca bolon cura tola mande mande tanjalaisa mantade! tinue. Junni jerale nechi chunca palude tola jochunae. Junni nuri yala mantaminlachi mumunca jera chutena! tinue yalachi tolabi. Junni Levílachi tolabiri Aaronchi mumunca chutena! tinue. 4 Junto ya chunca palude tolaca lachi cale layainun jali ya tamochi tsorena! lachi tsara sen tamochi. Lachi cajon cale la nulabe tulainunte tsorena! tinue. 5 Junni lari mande tolabi luli isa cariyanae. Junto ya luli ica jun tola tsacuminca la wenteca jun jochunae tinue. Tsanquechinayoe yape israelítalari nulaca pa nenano tsanle deilaisa.6 Junni Moisés Diosi pacaca manpolarinan, israelítalari bolon cura tola mande mande tanjalainue. Junni tsanqueri chunca palude tola jominue. Junni chunca paludele nechi Aaronchi mande pejominue. 7 Junni Moiseri jun chidelaca cato, Diosi joeque tenhinun jali yabi tsorenue Miya Diosichi cale.
8 Junto aman ayuna nanchi Diosichi tsara sen tamochi manquirabi wilainue. Jun quiranari Aaronchi tolari suca jominue. Ya tolari Levichi alica israelita bolonchi jominue. Junni jun tolari suto, junbi japisunan, junsi lulinan, junsi pucanan ica jominue. Ya tolari almendra chide jominue. Junni almendra puca raminue. 9 Junni Moiseri jera tolaca junbi nechi manlarinue Miya Diosichi cale nechi. Junsi aman jerale israelítalachi quirawonue. Jun quiralaquinunbi, mantaminlari yalachi tolaca mande mande jera mancalaquinue.
10 Junni aman Miya Diosiri Moisebe itsantinue: Aaronchi tolaca manaman mantsorede! tinue. La Miya Diosichi cale tsoreto sede! tinue yape in seiton tsachilari ya tolaca quirato tenhilaisa lari Aaronca wenteca joeque. Junni tsanquina! tinue yape yalari laca seitonque palaquitusa, lari yalaca jera totetuchun.
11 Junni Moisés Miya Diosi niyaque mantaca jonatiya, jun tsannan jera quinue.