Corebe junsi yachi amicolabe Diosica pailainunca
16
1-2 Junni israelítala niyanlanantiya chutunun tobi nenato, yala manca Coré mumun jominue Levichi alica. Junni Coreri Izhárichi nao jominue junsi Coátichi nieto. Junni man mate Corebe, junsi pemanca tsachilabe, Moiseca pailainue. Ya tsachilari Datán manca, Abiram manca, On manca jominlanue. Aman Datanbe Abiranbe Eliachi naola jominlanue. Junsi Onni Pelétichi nao jominue. Ya Rubenchi alica jominue. Junni Corebe, Datanbe, Abiranbe, Onbe Moiseca pailainue. Junsi palu patsa mante chunca israelita tsachila Moisechi contra ito, yalabe peayudailainue. Yala palu patsa mante chunca israelítalari epe tsachila itominlanue; yalachi bolonbi mantamin jominlanue. Junsi yalari man weyan tsachilaca payimin jominlanue. Jeralela yalaca sen tsachila jolajoeque tenca camin jominlanue. 3 Junto yala jeralela layaito, Moisebe Aarónbechica jito, itsanlatinue:—Nula polencari mantachi timinla joe. Amanale nechi monantiya weyanlaca fe joyoeque tenca catuntsan joe. Nulasiri Miya Diosi wenteca junla itolajoe. Jerale israelítalaca Diosi wenteca joe latinue. Miya Diosiri chiquila piyanlelabe perae; nulabesiri itoe. ¿Niyaito nulari Miya Diosichi tsachilaca fe joyoeque tenca calaquinayun, junsi weyanlaca fe mantá tachi tilatinayun?
—Miya Diosi patsa wentemin joe mo yachi mantaca tano jonunca. Miya Diosi wenteca jun tsachisiri Diosichi mantate titiya quino podeichunae tinue. Junni meralaquede! Ayuna quepenan Miya Diosinan jera micuwachunae mo mo yachi jolajonunca. 6 Junni ayuna nulari itsanquinola joe. Coré, nu, junsi jerale nube pejominla nida tanjanola joe tinue jun nidabi insienso lucuca nin pochun. 7 Junto jun nidabi nin coma polaquina! Junsi aman insienso lucu poto, aman Miya Diosichi cale tsorelaquina! Junni Miya Diosi micuwachunae moca ya wenteca jonunca yape yachi mantá tan josa. Junni nula Levichi alicalari junca quirato, miino podeilaichunae tinue.
8 Junsi Moiseri Corélabe itsanque panue:
—Nula Levichi alicalari, meralaquede! tinue. 9-10 Israelítalachi Diosi Levichi alicalacasiri wentenue yape yachi cale rato yachi yabi trabajaquilaquisa. Junnan nulari jerale israelítalachi tenchi Diosichi cale titiya quilaquinae. Aarónlari patelela jolajoe; nula weyan Levichi alicalari patelelaca ayudaiminla joe. Junni Coré, Miya Diosiri nuca patele suwatutonan, nuca, junsi weyan Levichi alicalaca, yachi cale trabajaquisa munarae. ¿Yari duque sen cosa jotun? ¿Na cosa jochinan? ¿Nulachi tenchi Diosi duque quica jotun? ¿Junni ti quichun nulari junca michi itoe tito patele cuwenta mantamin jono munaralarayun? tinue. 11 Nulari Aaronca seitonque palaquituna! Yari nulaca natiya seiton quitue. Nulari layaito pailaito, Aaronchi contra paitulajoe; Miya Diosica pailainae tinue.
12 Junsi Moiseri Datanca, junsi Abiranca, jasa tisa erenue. Junni aman yalari itsanque fiqui manherelaquinue:
—Jalaitiyoe tilatinue. 13 Egipto sen to josanan, Moisés chiquilaca junbi nechi laricae. Jun tobiri titiya fino duque jominhe. Tsara sen ano finoca tenfetuminnan cantsan jominue latinue tiri pica canun cuwenta. Juntonan junbi nechi laricato, inte tanjaca joe yape in niyanlanantiya chutunun postote puyalaisa. Tsancari seiton quetobi, amanari chiquilaca mantamin jochi tinae tilatinue. ¿Ti joyoeque tenhinato? tilatinue. 14 Amana tinantiya fino iton toca chiquilaca tanjaca joe tilatinue. Nin wita quinun posto itoe uba witanantiya quichun. Juntonan Moiseri chiquilaca yabe pejiniisa munarae tilatinue quirano podeitonla cuwenta. Te, yachica natiya jalaitiyoe tilatinue.
15 Junni Moiseri junca meráto, duque painue. Junto Miya Diosibe itsantinue:
—Diosi, lari yalachica nin buro mancatiya josoletucayoe tinue. Junsi nin ticanantiya seiton quitucayoe tinue. Junto nube itsanque rocainayoe: Yalari ticatiya nuchi epe cuwanacaca tina catuna! tinue.
16 Junsi aman Moiseri Corebe itsantinue:
—Ayuna quepenan nulari Miya Diosichi cale jato ralarana! tinue nube junsi nube pejominlabe. Junsi Aaronnan junte perachunae tinue. 17 Nulari manca cura insienso lucu ponun nidaca tanjanola jochunae tinue. Junto aman jun nidabi insienso lucu ponola jochunae. Nu insienso lucu pun nida manca tachunae. Aaronnan manca tachunae tinue. Junsi nuchi palu patsa mante chunca amicolanan manca cura nida talarachunae. Junto jeralela Miya Diosichi cale wiruilaichunae tinue.
18 Junto aman ayuna nanchi manca cura nida cato, jun nidabi nin coma pun, junsi insienso lucu pun, quito, aman Moisebe Aarónbechi quelole wiruilainue. Diosichi cale layainun jali ya winunte wiruilainue. 19 Coré jerale weyan israelítalaca petanjaca jominue. Junto yalari Diosichi jali ya winunte wiruraminlanue niyan ino jonunca quirachun. Junnasa pansile nechi jeralelachi cate Miya Diosichi tsen quirainue. 20 Junto aman Miya Diosiri Moisebe Aarónbeca itsantinue:
21 —Israelítalachite nechi joqueilaide! tinue. Moora yalaca jera totechinayoe tinue.
22 Juntonan Moisebe Aarónberi tobi mutsaino fecári bontoito, Diosibe itsantilatinue:
—O Diosi, nuri jerale tsachilaca sonnasa carimin joe latinue. Aman tsachi mancari jutsa quee. ¿Junni ti quichun jerale israelítalaca paichun? latinue.
23 Junnasa Datanbe Abirambe jaca itominlanue; yala chunun jali yabi caraminlanue. Junnasa Miya Diosiri Moisebe itsanque manpanue:
24 —Piyanle israelítalabe pade! yape Corebe, Datanbe, junsi Abirambe chununte nechi joqueilaisa.
25-27 Diosi tsantinunsi, Moiseri manwiruito, yabe pemantamin israelítalabe Datánlachica jilainue. Junni Datanbe Abiranbe yalachi jali yabi nechi locala joto, jali ya winunte wiruraminlanue yalachi sonalabe, nalalabe. Junni Moiseri yala chununte jito, piyanle israelítalabe itsantinue:
—Inte Coré, Datán, Abiram seiton tsachila jolajoe. Junni yalachite nechi joqueilaide! tinue. Junto yalachica ticanantiya taquiralaquituna! tinue nulanan yalachi jutsa tenchi puyalaituchun.
—Miya Diosi laca erecae yape inca jera tsanque quisa. Inca lachi mantateri tsanquitiyoe tinue. Yape nulari miilaisa, meralaquede! tinue. 29 In tsachilari uyanla cuwenta quiyanchi puyalainari, nulari miino podeilaichunae laca Diosi ereca jun itoeque. 30 Juntonan Miya Diosi nulaca wepanarichun toca bojisa carichunae yape in seiton tsachilari, yala titiya tanunlabe, junbi jera queereilaisa. Junnan aman tenhilaichunae tsanan Diosi ereca jun joeque. Yalari tsanque to tenpe queereito, junte sonnan doilainari, aman nulari miilaichunae tinue tsanan in tsachilari Miya Diosica paisa carilaquinueque
31 Junni Moisés tsanque jera panunsileri, Corélachi tenpe to wecainiinue. 32 Junni aman jerale Corela to tenpe jera queereilainue yalachi jali yabe, junsi ya titiya tanunlabe. 33 Tsanque sonnan to tenpe jera darapatilainue yala titiya tanunlabenan. Junnunsi tori yalachi jamo jera mandoinue. Tsanque seitonlaca weyan israelítalachite nechi jera iton suwanue. 34 Junni junchi atinaminlaca meráto, man weyan quelote ramin israelítalari itsantito jera sujilainue. Chiquilanan to tenpe pequeereilaitusa! tilatinue. 35 Junni aman Coreca, Datanca, Abiranca jera totetobi, Miya Diosiri jamochi nechi nin ereto palu patsa mante chunca insienso lucuca nin pominlacanan nin poto jera totenue.
36-39 Aman Corélari insienso lucuca nin pochun duque nida taminlanue. Bronseca quica jun nida jominlanue. Junni aman Miya Diosiri Moisebe itsantinue: Eleazar Aaronchi naobe pade! yape insienso lucu pun nidaca jera manlayasa. Junto te petse puchuicacari nidabi nechi jera quepoto, nidacari seno jochunae tinue. Ya seiton tsachilari jutsa quinun tenchi tsanque puyalainue; juntonan jutsa quiminla jototiya ya nidaca lachi cuwacala jonan, ya nidalari lachi jolajoe tinue. Junto nidacari jera betsoleto, bronse pe tsan quino jochunae tinue. Junto Diosichi titiya cuwachun nin ponun mesabi jun bronse peca ocarilaquina! tinue. Junni israelítalari junca quirato, tsachila Diosibe pa jominlaca Diosiri niyaquetiya casticaimin jonunca mantenhilaichunae tinue.
Junni patele Eleazari ninbi puyaca jun tsachilachi insienso ponun nidaca jera mancanue. Junto aman Eleazar ya nidaca bronse pe tsan quisa carinue Diosichi titiya cuwanun mesabi ocarichun. 40 Junto aman Miya Diosi Moisebe niyaque paca jonatiya, patele Eleazari jun tsannan jera quinue. Junni Diosichi cuwanun mesabi bronse peca ocarica jonunca quirato israelítalari tenhinaminlanue monantiya Aaronchi alica itonlari Miya Diosichi cale féto, insienso lucuca nin pono podeino itoeque. Pansile Aaronchi alica itotonan jun mesate quelo fétori, Corebe yachi amicolabe niyanhicala jonatiya, jun tsannan ilaichunaeque tenhinaminlanue.
41 Diosi Corélaca toteca jun ayuna nanchi, piyanle israelítala Moisebe Aarónbeca itsanque palaquinue:
—Nulari Miya Diosichi tsachilaca totecala joe tilatinue.
42 Tsantiminla jeralela Moisechi, junsi Aaronchi contra layaito, Diosichi cale layainun jali ya minu quiranaminlanue. Junni aman pansile nechi Miya Diosiri jun jali yaca poyochi jera donue. Junsi Miya Diosichi tseno junte quirainue. 43 Junnasale Moisebe Aaronbe Diosichi jali yabi winunte jalainue. 44 Junnan aman Miya Diosiri Moisebe itsantinue: 45 Ya seiton tsachilachite nechi joqueilaide! tinue. Lari yalaca moora jera totechinayoe tinue.
Junca meráto Moisebe Aarónberi bontoilainue tobi mutsaino fecári. 46 Junto aman Moiseri Aaronca itsantinue:
—Nuchi nidaca cachin! tinue. Junto Diosichi mesabi nin jominca cato, jun nidabi nin poto, insienso lucucanan poto, tsachilachica jide! tinue. Junto ya tsachilachi tenchi Miya Diosibe perdon panhade! tinue. Diosiri yalaca numa duque pa joto, puyanun quiyan ereca joe tinue.
47 Junni Aaronni Moisés niyan quisa tinatiya, junca jera tsanquinue. Insienso lucu casi, israelítala bolon ito wiruranun minu sucachi jinue.
Junnasa mantimini Diosiri numa quiyan ereca jonan, weyan israelítalari wari numa puyaca jominlanue. Junni aman Aaronni ninbe insiensobe nidabi poto, Diosibe perdon panhanue israelítalachi jutsa tenchi. 48 Junto aman Aaronni puyaca jominlabe cason jominlabechi jolale wiruinue. Junni tsan inunsileri ya quiyan jerainue. 49 Ya quiyan deino fecári, chunca junpalu mili siete patsa israelítala numa puyaca jominlanue. Yalari Corebe puyaca junlale nechi chican jolajoe. 50 Junni quiyan jerainunbi, Aaronni Diosichi cale layainun jali yabi winunte manjanue Moisebe mantulaibi.