4 Junsi yala tala beco beco pato itsanlatinue:

—Mantamin manca wentelaquisa! tilatinue. Junsi Egíptocanan manjilaisa! tilatinue.

5 Junni yala tsanque palaquinasaleri, Moisebe Aarónberi tobi paloilainue yala jerale seiton israelítalachi cate. Wari in seiton israelítalabe podeilaitiyoeque tsanque tobi paloilainue. 6 Tsan josanan, Josuebe Calebe quiracabi jiminla pejotonan, tsachilachi nan tala itominlanue; Diosichi nan tala jominlanue. (Aman Josueri Nun tinunchi nao jominue; Caleri Jefónechi nao jominue.) Junni Josuebe Calebe yalachi tsanpaca chilelaquinue israelítalaca pachi, jun toca josolebi jituchi tilatinaeque. 7 Junto aman jerale israelítalabe pato itsanlatinue:

—Chiquila quiracaya jun tori duque sen to joe latinue. 8 Junni Miya Diosiri chiquilachi nan tala pejoto, yari chiquilaca ayudaichunae yape jun tobi wino podeilaisa. Jun tobiri tsara sen fino titiya joe cupi, china pi, titiya. 9 Junni nulari Miya Diosica seitonque patulajona! Junsi jun tobi chuminlacanan jeleralaratuna! Chiquila ya tsachilaca fe lono podeilaiyanae tilatinue. Yalacari tinantiya peayudaino itolajoe. Manan chiquilari Miya Diosica talarayoe. Junni yari chiquilaca ayudaichunae. Jun tenchi jele titulajona! tilatinue.

10 Junni Calebe Josuebe tsanque palaquinasa, weyan israelítala yalaca merátuchi tito, suchi quito totechi tilatinue. Junnasa quiranari, Miya Diosi yachi cale layainun jali yate quiraito duque tsen, tsen quinue jerale israelítala quiralaquinasa. 11 Junni Miya Diosiri Moisebe panhato itsantinue:

—¿In tsachila nisi fecári laca seitonque palaquichunan? tinue. Yalachi tenchi duque wepanato quirantsancari quicayoe. ¿Junni numasi laca tennalarachunan? tinue. 12 Junni lari yalaca casticaquito, quiyan erechinayoe tinue yape israelítalaca jera totesa. Junto Moisés, nuchi alicalacari duque serawoanae. Yalari israelítalaca fe duque, junsi fe sonban jolajochunae tinue.

13 Junni Moiseri Miya Diosibe pato itsantinue:

—Nu in israelítalaca Egíptobi nechi laricae tinue. Junsi nuchi sonbabe yalaca larito, junto nunan yalaca jera totechinae tinue. 14 Aman egíptolari junca meráto, Canaán tobi chuminlabe jera cuenta polarilaquichunae. Junni Canaán tobi chuminlanan nuca duque meracala joe. Chiquila israelítalabe nu Miya Diosi quiraica joeque meracala joe. Junsi chiquilabenan malon poyo cuwenta ito parejo jinaeque, junsi quepen tiri nin cuwenta ito jinaequenan meracala joe tinue. 15 Junni nuri nuchi tsachilaca jera totenari, uyanlari junca miisi nuca duque seitonque palaquichunae. 16 Miya Diosiri chiquila israelítalabe juraquito pato, Canaán tobi tanwiyanae tica jotonan, junbi tanwino podeituto, niyanlanantiya chutunun postote totenue tilatichunae tinue. Junni tsanque nuca seitonque palaquichunae tinue. 17-18 Junni Miya Diosi, la mirayoe nu casticaquimin joeque. Tsachi manca jutsa quinan, casticaquino joyoe tica joe. Junni ya jutsa tenchinan yachi alicalanan padeseinola joe. Nietolanan, nietolachi nietolanan, padeseinola joe. Junsi Miya Diosi, nuri man fiquinan paca joe tinue. We paituanae ticae. Jutsa quito seitonque pánaminlaca perdonaimin joyoe ticae tinue. Junni Miya Diosi, nuri tsanque paca joto, amana poden joyoeque quirawode! tinue. 19 Duque laquiramanyoe tica joto, amana in israelítala seiton quica jominlaca wantaimin joto perdonaide! tinue. Israelítala Egíptobi locale nechi duque jutsa quinaminlaca nuri jera perdonaica joe. Junto intenan jutsa quicaca perdonaide! tinue.

20 Junni Moisés tsanque rocainan, Miya Diosiri pato itsantinue: Se joe. Nu rocainan, lari israelítalaca perdonaicayoe tinue. 21-23 Junni toteno jominnan perdonaitonan, casticaquechinayoe tinue. La israelítalachi tenchi duque sen cosa quica joyoe. Junsi duque wepanato quirantsancari quicayoe Egipto tobi. Junsi inte niyanlanantiya chutunun totenan jun tsannan quiyoe. Junni israelítalari junca jera quiracala jotonan, duque seiton icala joe. Yalari labe chunca ne mantaitucala joe nisi fecári yalachi jutsaca wantaino jonunca miichique. Junto yalari nin mancatiya la cuwano jun tobi wino podeilaituchunae tinue. Matu mate lari weyan israelítalabe itsanque paca jomanyoe: Ya toca cuwanae tica jomanyoe. Juntonan in seitonlari ya toca nin quirantiya quilaquituchunae tinue. Lachi fiqui tsa patichunae. ¿Aman la sonnamin Diosi jotuan? ¿Jerale tote lasiri duque sen patsa quimin jotuan? Tsan jonari, lachi fiquinan tsa patichunae tinue.

24 Juntonan Caleb tinuncari pepátiyoe; yari ya seitonla cuwenta tenca catumin joe. Yari laca seque merámin joe peleituto. Jun tenchi ya quiracabi jica jun toca yachiri cuwanae tinue. Yabe yachi familialabe yachi alicalabe jun tobi chularachunae tinue.

25 Ayuna nulari in postoca puranola jochunae. Junni mantenhilaide! Nulachile nechi ya to nan tala duque papun tsachila chularae. Yalari amalecítalabe cananéolabe jolajoe. Junni ayuna jilainato, yalachi nanchi natiya jitulajona! Necanan jito, Mar Rojo nanchi jilaina! tinue.

26 Junsi Miya Diosiri Moisebe Aarónbeca manan manpato itsantinue: 27 ¿La nisi fecári in seiton israelítala epele pánaminlaca wantaino joichunan? Laca duque seitonque pánaminlaca meranayoe tinue. 28 Junni nu Moisés, jerale israelítalachica jito, lachi tenchi itsanque pana! tinue: Nulari inte puyacaichunae tilatinanan, lari sonnamin Miya Diosi joto tsanhisa cariyanae. 29 ¿Junni jerale palu chunca wata poleca junlacari senso quino mate jera pila chudicala joco? Junni yalari laca duque seitonque paminla joto, intenan epe tobi puyalaichunae tina! tinue. 30 La tsa pato, Israelítalaca jun tobi wisa cariyanae tica jomanyoe. Juntonan amanari nulari israelítala jotonan, jun tobi chularatuchunae. Aman Caleri, ya Jefónechi nao, junsi Josué, ya Nun tinunchi nao, yalari jun tobi pewilaichunae. Junni nula weyanlari jun tobi natiya pewilaituchunae tina! tinue.

31 Junni nulachi nalalacari jun sen tobi wisa cariyanae. Nula itsanticalae: Chiquila jun tobi wichun tenfenari, jun to tsachilari chiquilaca pa joto chiquilachi nalalaca josolelaquichunae ticalae. Junni tsan itochunae. Nulari jun tobi numannan witusanan, nulachi nalalari jun tobi wito, toca josolelaquichunae. 32 Junto nula mantimini inte tinantiya chutunun tote puyalaichunae tina! tinue. 33 Junni nulachi nalala in niyanlanantiya chutunun tobi junpalu chunca wata fecári sonnanola jochunae. Opisa cuidaito, junsi wala cuidaito tsanque chularachunae nula unicala jera puyano fecári. Yalari nulachi jutsa tenchi padeseito tsanque chularachunae tina! tinue.

34 Junni jun toca quiracabi jiminlari junpalu chunca ma nenaminlanue. Jun tenchi nula casticaito junpalu chunca wata fecári nenanola joe niyanlanantiya chutunun tobi. Junni man malon tenchi man wata casticaino patilaichunae. Tsanque nula miilaichunae la Miya Diosica seitonque pánari niyantiya quimin jonunca. 35 La Miya Diosi tsantinayoe: In seiton tsachila lachi contra icala jonan, yalaca casticaquechinayoe. Junto niyanlanantiya chutunun tote jera puyalaichunae tinae tina! tinue. Miya Diosiri Moiseca mantanue israelítalaca tsanque cuenta polarisa.

36-37 Aman chunca paluca israelítala ya toca quiracabi jito manjato, yala chuncari Miya Diosica duque seitonque pade manjalainue josoletuntsan to joeque. Junnan jerale israelítalanan Miya Diosica duque seitonque pepalaquinue. Junnan Miya Diosiri ya chunca tsachilaca quiyan ereto moora jera totenue. 38 Junni toca quiracabi jica jominlari chunca puyalainan, Josuebe Caléberi casonnaminlanue. Yalari Diosica seitonque patulajonan, Diosi yalaca totetunue.

39 Junni Moiseri Miya Diosi pacaca israelítalabe jera manpánan, yalari duque laquiilainue seiton quilaquiyoeque. 40 Junni ayuna nanchi quepenanan wiruito, itsantilatinue:

—Inte duque jutsa quicala joyoe. Junni amana ya jutsaca purato, seque quito mannenato, Miya Diosi cuwanae tica jun toca josolebi jilaisa! tilatinue.

Tsantisi, du nanchi jichinaminlanue. 41 Junni Moiseri israelítala tsanque pánaminlaca meráto, itsantinue:

—Miya Diosi nulaca numa mantaca joe jun to nanchi jituto, Mar Rojo nanchi jilainaque. ¿Junni niyaito Miya Diosi mantaca junca manaman merátulajoyun? Amana nula jun tobi wichique tenfelainatotiya, se lolaituchunae tinue. 42 Junni jun toca jilaitude! Miya Diosiri nulabe peitoe. Junni nulaca pa jominlari nulaca fe lolaichunae tinue. 43 Amalecítala, junsi cananéolari, nula jino jun minute jera meralarae. Junni yalari nulabe quicaato, nulaca jera totelaquichunae tinue. Junni nulanan Miya Diosica puracala jonan, yari nulabe peitoe tinue.

44 Junni Moisés israelítalabe tsanque pánasanan, israelítalari natiya merátuto, du nanchi jinilainue jun toca josolechique. Junni Miya Diosichi cajonni juntenan purainue israelítala chununte. Junsi Moisenan junte purainue. 45 Junni amalecítala junsi cananéola jato, israelítalabe quicaato jera fe lolainan, israelítala sujinaminlaca Horma fecári sutanjito, duque israelítalaca espadachi quito fe lolainue.