2 —Tsachilaca erede! yape Canaán tobi nosa quiracalaquisa. Ya toca lari nula israelítalachi cuwanae tinue. Junni chunca paluca mantá tan tsachilaca erede! tinue israelita bolon cura manca manca larito.

3 Junni Miya Diosi tsanque mantaca jonan, Moiseri junca tsanto chunca paluca tsachilaca erenue. Niyanlanantiya chutunun Parán tobi chuminnan, ya chunca paluca mantá tan israelítalaca erenue yape Canaán toca quiracalaquisa.

17 Junni Canaán toca nosa quiracasa erechinato, Moiseri ya chunca paluca israelítalabe itsantinue:

—Jilaide! tinue. Neguev tinun tose poleto, du minu lolaina! tinue. 18 Junsi sele quiracalaquina! tinue. Jun tobi chumin tsachilari sonban jolajonunca o cumana jolajonunca, junsi duque jolajonunca o nari jolajonunca jera quiracalaquina! tinue. 19 Tsa yabi chularanunca, o jali yabi chularanunca, pueblo awinta serica jonunca o itonunca, junsi tocanan quiracalaquina! sen to jonunca o seiton jonunca. 20 Junsi titiya waquenan, duque ti pucatiya imin jonunca o itumin jonuncanan, junsi duque chide pele chun jonunca o layan iton jonunca, sele quiracalaquina! tinue. Junto natiya jeleratulajona! Junni jun tobi nechi manjanato, jun tobi puca ica jominca tanjalaina! tinue.

Junni Moisés yalaca Canaán toca quiracasa ereno malateri uba luinano ma jominue. 21 Junni ya quiracabi jimin israelítalari jun toca man nanchi nechi man nanchi fecári jera quiracalaquinue. Zin tinun niyanlanantiya chutunun postole nechi Rehob tinun posto fecári nenato manjalainue. (Rehob Hamat quelole jominue.)

25 Junni junpalu chunca ma jun tobi quiracade nenato, israelítala chunun postoca manjalainue. 26 Moisebe Aaronbe weyan israelítalaberi Parán tote chuto yalaca méraminlanue Cades tinun postote. Junto yalari manjato jera quiracaya jonunca cuenta quilaquinue. Junsi jun pueblobi nechi uba tanjato quirawolaquinue. 27 Junto aman Moisebe itsanlatinue:

—Nu chiquilaca ereca jun to minu jilaiyoe. Junni jun tobiri duque ano fino joe; cupi, china pi jun to joe latinue. Junni in uba, titiya, jun tobi ica puca joe tilatinue. 28 Juntonan jun tobi chuminlari duque sonban tsachila jolajoe. Junsi wa pueblo joto, pueblo awinta wa serica dorae tilatinue. Junsi duque, duque uwan tsachilacanan junbi quiralaquiyoe; Anácachi alicala jolajoe tilatinue. 29 Junni Neguev nan tala quiracalaquiyoe. Junchi amalecítala chularae. Junsi du nan tala quiranari, hetéolanan, jebuséolanan, amorréolanan chularae. Junsi lamari quelote, junsi Jordán pi quelote, cananéola chularae tilatinue.

30 Junni ya chunca paluca quiracabi jiminlari tsanque pánasanan, yala manca jominue, Caleb mumun; yari panue. Jerale Moisechi cale raminlaca jera nosaisa carito itsantinue:

—Junni ya toca josolelaquisa! tinue. Ya toca josoleno podeino jolajoyoe tinue. Chiquilari junbi chuminlaca fe poden jolajoyoe tinue.

31 Junni Calebe pejica jominlari yaca meráto itsanlatinue:

—Te, chiquilari fe lono podeino itolajoyoe latinue. Ya tsachilari chiquilaca fe sonban jolajoe latinue. 32 Junsi jun dubi chuminla duque seiton jolajoe. Yalari man quera quicaatosiri chuminla joe. Junsi jun tobi chumin tsachilari duque uwan tsachila jolajoe tilatinue. 33 Junni jun tobi tsachilari Anácachi alicalanan jolajoe tilatinue. Chiquilari yalachi cate nenato, tiri isu cuwenta tenhilaiyoe tilatinue. Junsi yalanan chiquilaca quirato, jun tsanquenan tenhito quiranaminlae tilatinue.