—Miya Diosiri Moisebesiri patucae tilatinue; chiquilabenan pacae tilatinue.

Junni Miya Diosiri yala tsantinaminlaca jera meranaminue. 3 Juntonan Moiseri weyanla cuwentanan epe tsachi jono munaraminue; fe jono natiya munaratuminue. 4 Junnasa Miya Diosiri Moisebe, Aaronbe, junsi Maríabenan cuenta quito, itsantinue:

—Nula pemannan jalaide! tinue labe tulainun sen postoca.

¿Jana Diosichi cale layainun jali ya jominuco? Aman junchi jalaisa mantanue. 5 Junni junbinan Miya Diosi jamochi nechi poyo ranunte patato, jun jali yabi winunte fanue. Junni junbi nechi pato, Aaronbe Maríabeca jalaide! tinue. Junni yala quelote fenan, 6 Miya Diosiri itsantinue:

—Meralaquede! tinue. Nula tala tsachi manca lachi mantate pamin jonari, la yabe pánae. O quipibi o quirajasa carito, yabe pánae tinue. 7 Juntonan Moiséberi tsanque pátiyoe tinue; yari uyanlaca fécari seque labe mantaimin joe tinue. 8 Junto Moiséberi quipibi pátiyoe tinue. Yabe cale cale tuca pamin joyoe tinue. Yari laca quirachunae. Labe mantaito nenamin joe. Tsan jonan, ¿nulari niyaito yaca seitonque pano jele tilatitiyun? tinue.

9 Junni Miya Diosiri Aaronbe Maríabeca paito, jun postote nechi manjinue. 10 Junni poyori Diosichi jali yabi nechi manjinasale, Aaronni Maríaca quiranasari, duque quiyan pun jominue; pucalete lepra bichi jera laca jominue. 11 Junni Aaronni Moisebe itsantinue:

—Mantamin Moisés, chiquila tenca iton joto jutsa quito, epele pato, jutsa quilaquiyoe tinue. Juntonan wa tsanni isa caritude! tinue. 12 Moisés, nuri chiquilachi soqui Maríaca quirade! tinue. Yari lepra bichi ito, quido iton jera inae puyaca naica jun cuwenta. Junni niya josatiya yaca tsanque padeseisa caritude! tinue.

13 Junni Moiseri yachi soquichi tenchi Diosibe itsanque rocainue:

—Miya Diosi, Maríaca nasi manse suwade! tinue.

14 Junni Miya Diosiri beco manpato, itsantinue:

—Nulachi apari Maríaca casticaquinato caforobi pipichi quica jomanpari, yari siete ma fecári luino jomin jonhoe. ¿Tsan joco? Junto Maríaca siete ma fecári israelítalachite nechi chican larito chutelaquede! tinue yape yari lu tenhisa. Junnasa bichi manseichunae; junto manjano podeichunae tinue.

15 Junnan Maríaca israelítalachite nechi larito, dechi chutelaquinue siete ma fecári. Junto israelítalari María manjano fecári jali yaca baletuto, juntenan chuminlanue. 16 Junni María israelítalabe chubi manjanunbi, aman manan jilainue. Jun posto Hazerot tinun jominue. Junni junbi nechi jito, Parán posto fecári jilainue tilanantiya chutunun postote. Junbi yala chunun jali ya manquito wan fecári manchuminlanue.