Diosi Israelítalachi tsachica cuwanae tinunca
11
Aman israelítala tilanantiya chutunun tobi jilainato, Miya Diosica seitonque palaquinue padeseilainayoeque. Junca meráto, Miya Diosiri nin ereto, yalachi weyan yaca niyasa carinue. 2 Junnan israelítalari duque wepanato, Moiseca atilatinue yape ayudaisa. Junni Moiseri Diosibe rocainan, nin lunamin jera manpiyanue. 3 Junte Miya Diosi paito nin ereca jonan, ya postoca Tabera mumun polaquinue nin pocaca tsantinun joe tito.4 Junni israelita itonlanan weyanlari israelítalabe pejinaminlanue. Junni yalari ano finocasiri tenca pun jominlanue. Junni weyan israelítala yalaca micato, yalanan pewareto itsanlatinue:
—Tsachica fino muquee tilatinue. 5 Egíptobiri anpun watsaca pacara quituminnan fimin jominlayoe. Junsi pepino, melon, fiban seboya, seboya paitenia, junsi asunsunan fimin jominlayoe tilatinue. 6 Junto amanari in chiran maná tinuncasiri finato, yaca jera amiicala joyoe tilatinue.
7 Aman maná tinun finori culantro ninan quiran jominue. Nasi laquebanin jominue chide pele pilunan quiran. 8 Aseite cuwenta anpun jominue. Tsachilari ma cura jito, ya maná tinunca layamin jominlanue. Junto ya maná tinunca molinochi o suchi ilimin jominlanue. Junto pibe daquin, o bibu quin, quimin jominlanue. 9 Junni ya manári quepenan quiraimin jominue. Jana suwa quitusanan japisu ataimanhe; aman ya pi janasa manánan pejamin jominue.
10 Junni Moiseri israelítala yala chununte paito warenaminlaca meránue. Junni yala tsanque pailainanan, Miya Diosinan yaca seitoe tito yalaca duque painue. Junnan Moisenan yaca seitoe tito, 11 Miya Diosibe itsantinue:
—Lari nube mantainasanan, nuri laca seitonque tae tinue. ¿Ti quichun laca tsanque seitonque tayun? tinue. ¿O laca pa joyun? tinue. ¿Laca pachi in seiton tsachilaca mantamin suwaca joyun? tinue. 12 Yalari nalala cuwenta jolajoe. Tedechi jalitato amanto tanjin tsannan cajolajoe. Juntonan lari yalachi apa, nin ayan itoyoe. Junni yalaca nalalaca cuwenta cuidaino muquetue tinue. Nu Diosi chiquilachi matu tatalabe to cuwanae tica jominue. ¿Junni ti quichun lacari in tsachilaca ya toca tanjisa carinayun? tinue. 13 Yalari lachica jaminla joe tinue. Paito warede tsachica panhade jaminla joe tinue. ¿Lari tile nechi in tsachilachi cuwachun tsancari tsachica caichunan? 14 Wari la mancari in jera tsachilaca mantamin jono podeitiyoe. In trabajo lachi tenchi polencari tenfe joe tinue. 15 Junni nu Diosi, laca in tsachilaca camantamin josa carino cajotori, laca totede! Laca tsa laquiratori, toteniquede! tinue tsancari tenfeno itochun.
16 Junni aman Miya Diosi Moisebe pato itsantinue:
—Siete chunca unicalaca wentede! tinue. Nu mirachunae mo mo mantá tantsan jonunca. Yalaca Diosichi cale layainun jali yabi winunte tanjade! tinue. Junte jato meralarade! tinue. 17 La patato, nube pato, lachi Tencaca nuchibi nechi nasi larito, yalachi cuwanae tinue yape yalanan nube pemantano podeilaisa. Junnan nuri mancasiri mantano itochunae.
18 Junto israelítalaca mantato, tenca seilaisa mantade! lachi cale jolajochun. Junto ayunanan tsachica filaquichunae tinue. Yalari paito, tsachica tamanpari se jono jonhoe tilatinae. Egíptobiri fe seque chumin jominlayoe tilatinae tinue. Aman lari meráyoe tinue tsachica fichique warenaminlaca. Junto tsachica cuwachinayoe tinue. 19 Aman man malon fisa cuwano itoyoe, nin palu ma fisa, ni mante ma fisa, ni chunca ma fisa, nin palu chunca ma fisa, cuwano itoyoe tinue. 20 Nula man pe entero tsachica filaquichunae tinue. Ficachinan, quinfu forochi manlocari, junto pubachi uta tintsancari filaquichunae tinue. Tsanque cuwachinayoe laca puraca jolajonun tenchi. La israelítalabe peramin Diosi josanan, itsanque pato warelaquee tinue: Egíptobi nechi lotumanpari, fe se jono jomin jonhoe tito warelaquee tinue. Jun tenchi tsachica uta tintsancari cuwachinayoe tinue.
21 Junni aman Moiseri Diosibe itsanque panue:
—Chiquila israelítalari sota patsa mili uwan unilala jolajoyoe sonalaca, nalalaca mitutonan. ¿Junni nuri tsancari tsachilachi tsachica man pe entero filaquisa cuwano joyun? tinue. 22 ¿Tile tsancari opisa o wala junhun? yape toteto jerale tsachila filaquisa. Lamaribitiya jerale watsaca canari, ¿aman michi jochunancan? tinue.
23 Juntonan Miya Diosiri beco pato itsantinue:
—¿Nuri laca cumana joeque tenca canayun? ¿Ya tsachicaca cuwano podeituchunaeque tenca canayun? tinue. Nu miichunae la paca fiqui tsanhinaminca quirato.
Siete chunca unicala Diosichi Tencachi sonbabe palaquinunca
24 Junni Moiseri weyan israelítalachica jito, Diosi niyaque paca jonunca jera manpanue. Junni siete chunca mantá tan unicalaca layato, Diosichi jali ya awinta wirucarinue. 25 Junni Miya Diosi poyobi patato, jun poyobi nechi Moisebe cuenta quinue. Junto yachi Tencaca Moiséchibi nechi nasi larito, ya siete chunca unicalachibi ponue. Junni Diosichi Tenca yalachibi winunbi, yalari Diosichi mantate palaquinue. Deituto jera pano jonunca palaquinue.
26 Junsi aman yala palucari weyanlabe Diosichi jali yaca pejica itominlanue. Manca Eldad, manca Medad, mumun jominlanue. Yalari weyan tsachila chununtenan puraica jominlanue. Juntonan Diosichi Tenca yalachibinan winan, yalanan Diosichi mantate pepalaquinaminue.
27 Junni moso manca yaca quirato, Moisebe pabi sujato itsantinue:
—Eldabe Medabe inchi jatutonan, tsachila chununte Diosichi mantate palaquinae tinue.
28 Junni ya moso tsantinasa, tsachi manca peraminue. Yari moso mánta Moisebe peayudaimin jominue. Yari Josué jominue Nun tinunchi nao. Junni yari ya moso pánaminca meráto, Moisebe itsantinue:
—Moisés, nu mantamin joto, Eldabe Medábeca tsantitusa tide! tinue.
29 Juntonan Moiseri yabe beco pato, itsantinue:
—La Diosichi tenchi pamin jonan, ¿nu uyanlaca tsanque patusa tennaco? tinue. Tsan itode! tinue. Tennatude! Yalanan tsanque pano se joe tinue. Miya Diosi jerale israelítalachi yachi Tencaca cuwato, yachi mantate pasa carimanpari, duque se jono jonhoe tinue.
30 Juntobi Moiseri ya unicalabe israelítala chunun postoca manjalainue.
Miya Diosi duque colin tsanca erenunca
31 Junni Miya Diosi lamaribi nechi wu quisa carinue. Junni ya wube duque colin tsanla jajalainue. Jun pueblo tsan quelote patilainue. Junni ya colin tsanlari tobi nechi man metro tsansite jajimin jominlanue. Duque jonan, israelítalachite nechi man malon entero jintsancari nuwiri fecári jominlanue. 32 Jun mate, junsi man quepen, junsi ayuna nanchi man malon, israelítalari colin tsanca canaminlanue. Fe pele caminla peman chunca tolo tsansi calaquinue. Junni jun to duque loban to jominue. Junni jera colin tsanca fino podeituto, tobi tsoreto patachi jequelaquinue pitaca cuwenta.
33 Juntonan aman cafilaquinasanan, Miya Diosiri duque paito, duque tsachilaca puyasa carinue. 34 Jun tenchi israelítala ya postoca Kibrot-Hataba mumun polaquinue. “Jilulachi pantiyon” tito tsantinun joe.
35 Junni israelítala Kibrot-Hatábate nechi manan manjilainue Hazerot fecári. Junte aman numari fecári chuminlanue.