2 Junni jun Cádete israelítalari pi itominlanue cuchichun. Junto jeralela layaito, Moisebe Aarónbeca paito, 3 Moisebe itsanlatinue:

—Diosi weyan israelítalaca casticaquito totenasa, chiquilanan pepuyaca jomanpari, se jono jomin jonhoe tilatinue. 4 Chiquilari Miya Diosichi tsachila josanan, ¿ti quichun nulari chiquilaca inte tinantiya iton tote tanjalaiyun? tilatinue. ¿O chiquilaca chiquilachi animalilabe inte puyalaisa tanjacalayun? tilatinue. 5 In postori seiton joe. Tinantiya waquetuntsan joe. Nin ico peletiya itoe, nin quinto silitiya itoe, nin uba witatiya itoe, junsi nin pitiya itoe cuchichun. ¿Ti quichun Egíptobi nechi larito inte tanjacalayun? tilatinue.

6 Junni israelítala tsanlatinunsi, Moisebe Aarónberi yalaca purato Diosichi cale layainun jali yaca jilainue. Junbi féto, tamolanle wisi telenhito tobi mutsaito, Diosibe rocailainue. Junnan jamochi nechi Miya Diosi tsenue. 7 Junto Miya Diosi Moisebe itsantinue: 8 ¿Aaronchi tola suto japisu lonuco? Aman ya tolaca cato, nube Aaronbe jerale israelítalaca jasa caride! Junni jeralela layaicala josa, nuri jeralelachi cale du quelole wa suca mantato, pi lade! tilatide! tinue. Junnan subi nechi pi lachunae tinue yape nula jeralela, junsi nulachi animalilanan pi cuchino podeilaisa.

9 Junni Moiseri Diosi mantacaca meráto, ya tola Diosichi tsara sen tamobi tsominca mancanue. 10 Junsi Moisebe Aaronbe jerale israelítalaca wa sute layaisa carito, Moisés jeralelabe itsantinue:

—Nula Diosica merátuchi timinlari, laca meralaquede! ¿Ti quichun pailainayun? ¿O chiquilari in subi nechi pi larito cuwalaquisa tenjalaquin? ¿Tsanque nulachi pi cuwantsan jochunan? tinue.

11 Jun tsantisi Moiseri ya tolachi palu ne suca quinue. Junnan subi nechi duque pi lanue. Junnan tsachilanan junsi animalilanan pi cuchilaquinue. 12 Juntonan Miya Diosiri Moisebe Aarónbeca painue. Yalari tsachilachi pi cuwalaquiyoe tilatinue. Tencachique sonbabe pi cuwalaquinayoe tinun cuwenta patinue Diosi cuwatuca cuwenta. Jun tenchi Diosi yalaca paito itsantinue: Nulari laca tennatuminlanue. Weyan israelítalachi cate pato, laca respetaituto, seque patulajoe tinue. Junto nula palucaca casticaquinan, la nulachi cuwaca jun tobi natiya wilaituchunae. Uyan manca tsachica mantá tan suwanae tinue yape israelítalaca junbi tanwisa.

13 Ya pi lanun postote israelítala Miya Diosica paito firara tilatinue. Junto ya postoca Meriba mumun polaquinue. Jun tsan tito, firara ticaca tsantinun joe. Junte Diosi ya duque sen jonunca quirawonue.

22 Junni jerale israelítala Cades tinun postote nechi loto, Hor tinun duca jilainue. 23 Junteri edomítalachi to quelote jominue. Junni junte Miya Diosiri Moisebe Aarónbeca itsantinue: 24 Aarón inte puyano joe tinue. Junto la israelítalachi to cuwaca junbi pewituchunae. Meriba tinunte pi larinato, nula palunan laca merátucalae. Jun tenchi jun tobi pewilaituchunae tinue. 25 Nu Moisés, Aaronbe yachi nao Eleazáribeca Hor tinun du butuchi tanjide! tinue. 26 ¿Aarón duque sen tsanpa poco? patelela ponun tsanpa. Junni nu Moisés Aarón ya tsanpa ponunca larito, yachi nao Eleazárica pocarina! tinue yape yaman patele josa. Junni Aaronni jun dute puyano joe tinue.

27 Junni Moiseri Miya Diosi mantaca junca jun tsannan quito, jerale israelítala quiralaquinasa, peman ito Hor tinun dubi lolainue. 28 Junbi Moiseri Aarón ponun tsanpaca laricato, Eleazáricaman pocarinue. Jun du butuchinan Aarón puyanue. Junnan Moisebe Eleazáriberi dubi nechi manpatalainue. 29 Junni israelítalari Aarón puyaca jonunca meralaquito, peman chunca ma fecári warelaquinue laquichi.