3-5 Junni Aaronni lachi tsara sen tamochi wichinato, itsanquino jochunae: Lino cuwa tsanca quica jun tsanpacasiri pono jochunae lachi tsara sen tamobi wino podeichun. Lino camisa pun, lino na panlon pun, lino sendori quica jun, lino cora pun, quino jochunae ya tsanpa Diosichi tenchi titiya quinun tsanpa joe tito. Tsanque lino tsanpaca potosiri lachi tsara sen tamobi wino podeichunae. Aman ya tsanpaca pochinato, pipiyano jochunae tinue. Aarón yachi jutsa tenchi, yachi familialachi jutsa tenchi, nalalan unila wala manca cuwano jochunae. Junsi jerale israelítalachi jutsa tenchi unila opisa manca cuwano jochunae jera nin poto lachi cuwato. Ya opisa jerale israelítala layaito cuwaca jun jochunae. Junni israelítala ya opisa cuwanato, paluca chibocanan pecuwanola jochunae tinue yalachi jutsa tenchi.

11 Aman ya nalalan unila walari, Aaronchi tenchi jochunae tinue yachi jutsaca piyarichun. Junni Aaronni ya walaca tanjasa carito, toteto, yachi jutsaca, junsi yachi familialachi jutsaca, piyarisa carichunae. 12 Junsi insienso lucuca nin ponun tasonca cato, lachi cale tsomin mesabi nechi nin cala cato, ya tasonbi tuwale pono jochunae. Junsi insienso lucuca palu tedechinan chumile cato, jali tinranun banachi tamochi wino jochunae tinue. 13 Junbi wito, lachi postobi rato, insienso lucuca nin calabi araleno jochunae. Junni lachi cajon tapari insienso poyochi jera doichunae yape Aaronni puyatusa. 14 Junni Aaronni walachi asanca nasi cato, lachi cajon tapabi temisuchi araleno jochunae. Yo lanun nan tala siete neca cajon tapabi araleno jochunae tinue.

Junni Miya Diosi Moisebe cacuenta quinato, itsantinue: 15 Tsanquetobi, chibo mancaca tsachilachi jutsa tenchi toteto, yachi asanca jali banale tamochi tanwino jochunae tinue. Junni ya asancanan cajon tapabi araleno jochunae wala nachi asanca cuwenta. Tapabi, junsi cajon cale, araleno jochunae tinue. 16 Tsachila seiton quica jonari, o ti jutsacatiya quica jonari, ya jutsa tenchi lachi tsara sen tamonan yucapiyaca patichunae. Junni ya asancanan aralenato, lachi tsara sen tamoca jera mancasinachunae. Junsi la Diosichi cale layainun jali ya, yanan tsachilachi quitsale chuto, tsachilachi jutsa tenchi yucapiyaca patichunae. Junto yacanan jun tsanquenan asanchi mancasino jochunae tinue.

17 Aarón lachi tsara sen tamobi rasanan, monantiya ya jali yabi pewituntsan joe tinue. Yari junbi wito tsachilachi tenchi perdon panhachunae. Junni jera perdonaisa carito manlano fecári, monantiya pewino itochunae. Aman yachi jutsa tenchi, yachi familialachi jutsa tenchi, junsi jerale israelítalachi jutsa tenchi perdonaisa carito, 18 jun postobi nechi loto, la Miya Diosichi cale tsomin mesacanan casino jochunae tinue. Walachi asan nasi can, chibochican nasi can, quito, ya mesacanan ilipono jochunae. ¿Teyuncabi cachínan quiran chuco? Aman ya junpaluca cachinan quiranbi asanca ilipono jochunae tinue. 19 Junto siete neca temisuchi asanca mesabi araleno jochunae. Ya mesanan tsachilachi quitsale tsoto, yalachi jutsa tenchi yucapiyaca pejochunae. Junto asanca tsanque aralenato mancasino jochunae tinue yape lachi sen mesa manjosa.

Junni Miya Diosi Moisebe cacuenta quinato, itsantinue: 20 Junni Aaronni lachi tsara sen tamoca, junsi Diosichi cale layainun jali yaca, junsi lachi mesaca jera mancasitobi, aman manca chibo son cajominca tanjasa carino jochunae tinue. 21 Junsi yachi paluca tede chibochi misubi tale quito, israelítala jutsa quica junca jera pano jochunae culpa talarayoe tito. Ti seiton quica jonuncatiya jera pano jochunae tinue. Tsanquinasa ya jutsa chibochi misubi jera rachunae. Junto tsachi mancaca wenteto, ya jutsa pun chiboca epele tanjito eresa carino jochunae. 22 Junni chibo epe tobi topiyaca jun nenato, tsachilachi jutsacanan molanantiya chutunun postoca tanjichunae tinue.

23 Chiboca epele tanjinunbi, Aaronni lachi cale layainun jali yaca manjachunae. ¿Aman lachi tsara sen tamochi wichun lino tsanpaca pono jominuco? Aman lachi jali yaca manjato, lachi sen tamochi manwito, ya tsanpaca jera manlarito, junbinan purano jochunae tinue. 24 Junni junbinan pipiyatobi, yachi tsa tsanpaca manpoto, manan manlano jochunae. Manlatobi, ya paluca opisaca toteto, lachi cuwano jochunae manca yachi tenchi, manca jerale tsachilachi tenchi. Tsanquinari, la Diosi Aaronchi jutsacanan, junsi tsachilachi jutsacanan, jera perdonaiyanae tinue.