3 Lachi mantaca meráto, la mantaca junca tsanlaquinari, 4 nula suwa munarano mate suwa quisa cariyanae. Aman nula titiya waca jun, junsi ti pelelatiya, seque uwaito sen puca ilaichunae. 5 Junto aman tricoca, ubaca balelaquinato, duque numari fecári balelaquichunae. Junto duque ano fino talarachunae; junsi nulachi tobi pansi seque chuno podeilaichunae tinue. 6 Junto aman nulachi tobi seque chularato, wepanatuto pansi seque catsono podeilaichunae. La nulaca cuidaiyanae; junto aman papun animalilaca sueren, junsi nulaca pa jominlaca quera quebi jasa carituanae. 7 Nulabe pa jominlaca, nulari fe lolaichunae. Junsi quera quito nulari yalaca totelaquichunae. 8 Junto nula manteca israelítalari patsaca pa jominlaca suerelaquichunae; junsi nula patsaca israelítalari chunca mili pa jominlaca suerelaquichunae tinue. Junto nulari pa jominlaca quera quito fe lolaichunae. 9 La nulabe sen joanae tinue; junto nulaca duque serasa cariyanae. Junsi nulabe trato quicaca jera queyanae tinue.

10 Manaman trico cano ma fachunae. Juntonan man seicachi trico cayaca catalarachunae tinue. Junto matu tanun tricoca larino jochunae casan caya tricoca manseno podeichun. 11 La nulabe perato, nulaca seitolajoe tituanae tinue. 12 La nulabe numasitiya peranae. Junto nulachi Diosi joanae; aman nulari lachi tsachila jolajochunae. 13 La nulachi Miya Diosi joto, nulaca Egíptobi nechi manlaricayoe tinue yape nantari egíptolachi epe mantato tanun esclabola itolajosa. Nulari lutintsan esclabo jominlanue. Amanari la nulaca se larica jonan, lu josa nenalaratuchunae tinue. Diosi Moisebe tsantinue.

14 Diosi Moisebe cacuenta quinato, itsantinue: Juntonan aman nula la mantacaca merátuto obedeseituto, 15 laca purato lachi mantaca meralaquitunari, junsi labe trato quica juncanan quilaquitunari, 16 la nulaca itsanque casticaqueyanae tinue: Duque padeseisa carin, totemin quiyanca eren, cupara quiyanca eren, caca quiyanca eren, junsi puca cumana inun quiyanca eren, queyanae. Aman nula epenan waquelaquichunae. Ticatiya duque waca jun seicaca, nulaca pa jominlari jera josoleto filaquichunae tinue. 17 Junto la nulachi contra joanae; junnan quera quito nulaca pa jominlari fe lolaichunae. Aman nulaca pa jominlari nulaca mantalaquichunae. Aman nulaca monantiya pasuwatusanan, sujilaichunae. 18 Junto tsanque casticaquinunbi cameralaquitunari, aman siete ne fe mancasticaqueyanae tinue. 19 Junto nula tenca iton joto fe joyoe tinanan, nantari tsantisa carituanae. Junsi aman suwa quitusa cariyanae tinue yape titiya waca jun seitusa. 20 Junto nula duque tenfeto trabajaquilaquinasatiya, tinantiya seratuchunae. Junsi pelelabinan puca ituchunae tinue. Diosi Moisebe tsantinue.