14
2 Lepra bichi chunla ya quiyan tenchi quelo fatuntsan jolajochunae. Junni ya lepra bichi manseiyoeque tenhitori, itsanquinola jochunae quelo fatuntsan jomin manseichun: Ya quiyanpunca tsachi manca patelechica tanjino jochunae. 3 Junni aman ya pateleri pueblo dechi lochunae quiyanpunbe tulaichun yaca manseica jonunca quirachun. Aman ya pateleri ya lepra bichi manseica jonunca quiratori, 4 itsan cosalaca tanjasa mantachunae: Finun pichu paluca, sedro tinun chideca, lubaquin tsanpaca, junsi isopo tinun tapeca. Pichuca sonca tanjasa tichunae. 5 Junsi aman ya pateleri pi jinamin jamo pichu mancaca to nidabi totesa mantachunae.6 Junsi aman manca son pichuca can, sedro chidecanan, lubaquin tsanpacanan, junsi isopo tinun tapecanan can, quichunae. Junsi aman ya toteca jun pichu asanchi ya cosalaca jera ata suwano jochunae jun pi jamo. Junsi ya son pichucanan tsanquenan ya asanchi ata suwano jochunae. 7 Junto aman ya asanchi siete ne arale, arale quino jochunae lepra bichi chumin jomin tsachica. Tsanquetobi pateleri ya tsachica manse joe tichunae. Tsantinunbi quelo manfentsan jochunae. Junni ya son pichuca tsachila chununle nechi jabile tanjito manhereno jochunae. 8 Aman quelo fetuntsan jominnan manseica jun tsachiri yachi tsanpaca tachin, yanan pipiyan, quino jochunae. Junsi misuca jera wirisino joe aca balechun. Tsanquino joe manseichun. Junto aman israelítala chunun minu manjino podeichunae. Juntonan siete ma fecári yachi yabi chuno itochunae; urachi catsono jochunae. 9 Junsi aman siete ma fenunbi, pucalete jera wirisino jochunae misubi aca, junsi teseca, caca fulaca, junsi fuca jera balechun. Junto manaman tsanpa tachin, pipiyan, quino jochunae. Juntobi aman wari quelo fetuntsan itochunae.