Niyan quiran animalilaca fintsan jonunca
11
Miya Diosi Moisebe Aarónbeca pato, itsantinue: 2 Israelítalabe palaquina! tinue weyan animalilacari fintsan joe, weyan animalilacari fituntsan joeque. Jerale animalilale nechi, incari fintsan joe: 3 Aman newe bola jun jonari, junsi tapeca manlarito manjalito manfimin jonari, aman ya animalicari finola jochunae tinue.4 Aman itsan animalicari fino itochunae: cameyori manfimin jotonan, newe bola iton joe; tsan jonan cameyoca fituntsan joe. Nulachi tenchi fituntsan animali joe tinue.
5-6 Conori manlarito manfimin jotonan, newe bola iton joe; jun tenchi conoca fino itochunae; nulachi tenchi fituntsan animali joe tinue.
7 Aman cuchiri newe bola jun jotonan, manlarito manfitumin joe; jun tenchi cuchica fino itochunae; nulachi tenchi fituntsan animali joe.
8 Aman in animalilachi tsachicaca fituntsan jochunae, junsi jun animali puyaca junlacanan taquiratuntsan jochunae; nulachi tenchi seiton animali joe.
9 Junsi weyan pibi nenamin animalicari fino joe, junsi weyancari fino itochunae. Aman lamaribi o pibi chuminla, panpe chun, junsi liqui chun jonari, nulachi tenchi fino se jochunae tinue. 10 Panpe iton, junsi liqui iton jonari, nulachi tenchi fituntsan animali jochunae. Lamaribi o pibi nechi josatiya, ayancan o nanacan animali josatiya, nulachi tenchi fituntsan animali jochunae tinue.
45 La Miya Diosi joyoe tinue. Aman Egíptobi nechi nulaca laricayoe la nulachi Diosi jochun. Aman nulari jun tenchi jutsa quitumin jonola joe. La cuwenta jutsa quitumin jonola joe tinue.