Junni aman yalari manan insienso lucuca nin pochinato, Diosichi mesabi nechi nin calaquitunue; junbisiri nin cantsan jominue. Yalari uyanchi nechi nin cato, yalachi tasonbi insienso lucuca nin polaquinue. 2 Tsanquinaminlaca Miya Diosiri paito, nin ereto, ya tsachilaca jera nin ponue. Tsanque Miya Diosichi cale puyalainue. 3 Tsanque puyalainunbi Moiseri Aaronbe itsantinue:

—We panátuto, Diosica tennana! Diosi niyan tica jonunca mantenhide! Diosiri yachibi quelo faminlaca duque respetainola joeque micariyanae ticae tinue. Jerale israelítalaca micariyanae tinue duque poden joyoeque.

Aman Moisés tsanque pánaminca meráto, Aaronni nosasaito meránue. 4 Aman junni Moiseri paluca tsachilaca jasa carinue Misaélibe Elzafánbeca. Yalari Uziélichi naola jominlanue. Uziéliri Aaronchi manpi jominue. Junni ya tsachilabe Moisés itsantinue:

—Nula jalaide! Nulachi primola Diosichi yabi puyaca junlaca manlarilaquetsan! Junsi tsachila chununle nechi dechi tanjilaide! tinue.

5 Junni yalari Diosichi yabi wito, puyaca junlaca manlarilaquinue. Ya puyaca junlari patele ponun camisa pun jominlanue. Junni yalachi primolari tsanque camisa pun cajominlacanan manlarilaquinue. Aman Moiseri tsanque manlarisa tica jominue; jun tsanquilaquinue.

6 Aman Aaronca, junsi yachi naola Eleazáribe Itamáribeca, Moiseri itsantinue:

—Nulachi familiala puyaca jonun tenchi laqui jotonan, laqui cuwenta nenalaratuna! Junsi aca paran quica iton itolajona! Laquinan junlanan quiraque tsanpaca chilelaquituna! Tsanque laquinan quiran nenalaranari, Diosi nulaca paito jerale israelítalaca casticaquichunae. Junni nulari laqui cuwenta nenanola itosanan, weyan israelítalari laqui tinilatichunae tinue Miya Diosi tsanque ninchi toteca jonun tenchi. 7 Junni nulari Diosichi cale layainun jali yabi nechi lolaituna! Puyacaca menananunca aconpanaibi jilaituna! Aman Miya Diosi patsa nulaca wenteca joe patele joto trabajaquilaquisa. Tsanque wenteca jonan, nulari menananunca quirabi jilainari, nulacanan Diosi totechunae.

Aman yalari Moisés panunca meralaquinue.