Tarinnun tenchi, nene panun tenchi, Diosichi niyaque epe cuwano jonunca
6
Junni Miya Diosi Moisebe pato, itsantinue: 2 Tsachi manca, manca tsachichica nene pato tarintori, lachi cale culpa tan jochunae tinue. Aman cuidaisa tsoreca junca mancuwatutori, o tarintori, o yucacuratori, culpa tan jochunae. 3 Aman titiya piyacaca fétonan fetiyoeque encanatori, junsi juraquito pánatonan nene pato jutsa quitori, culpa tan jochunae. O niyaquetiya tsachilachi mite jutsa quitori, culpa tan jochunae tinue. 4 Aman tsanque jutsa quito seiton quica jotori, aman tarinca junca mancuwano jochunae. Junsi yucacuraca fiquica manse patarin, cuidaisa tsorecaca mancuwan, piyacaca feca junca mancuwan, quino jochunae, 5-6 o titiya nene pato caya jonuncanan jera mancuwano jochunae tinue. Junsi aman culpa tenchi unila opisaca lachi cuwano jochunae tinue. Yari sen, quiyan tinantiya iton, ositori micate osintsan, jono jochunae. Ya jutsa quimin tsachiri opisaca cato, patelechica tanjino jochunae yachi culpa tenchi cuwachun.Junni ya opisa cuwanato, tarinca juncanan mancuwano jochunae. Junsi tarinca junca mancuwanato, tarincaca fécari mancuwano jochunae tinue. Aman manteca titiya tarinca jomin jotori, sotaca mancuwano jochunae. Opisaca culpa tenchi cuwanato, tarincacanan tsanque mancuwano jochunae tinue yape la Diosiri culpa piyarisa. 7 Aman ya pateleri lachi opisa cuwato, ya tsachichi ti jutsacatiya perdonaisa carichunae tinue. Diosi Moisebe tsanque jera mantanue culpa tenchi niyaque epe cuwano jonunca.