Jutsa tenchi Diosichi epe cuwano jonunca
4
Miya Diosi Moisebe pato, itsantinue: 2 Israelítalabe itsanque pade! jutsa quino munaratuminnan jutsa quitori niyan quino jonunca. Pansile lachi mantaca merátuto seiton quilaquichunae tinue. 3 Junni jutsa quimin tsachiri fécari mantá tan patele jonari, duque seitochunae. Jerale israelítala culpa tan ilaichunae. Ya jutsa quimin pateleri unila wala náca lachi cuwano jochunae jutsa tenchi. Ya walari quiyan iton, sen wala jono jochunae.4 Junni jutsa quimin pateleri ya walaca Diosichi cale layainun jali ya winun fecári tanjino jochunae. Junni ya pateleri lachi cale walaca misubi tale ran tenchi toteno jochunae tinue. 5 Junsi aman ya walachi asanca cato, Diosichi sen tamochi tanwino jochunae. 6 Junsi lachi cale asanca temisuchi siete ne arale arale quino jochunae. Lachi tamochi tsanpa tinranun nanchi asan araleno jochunae. 7 Lachi yabi insienso lucu ninponun mesa puntabinan asan ilipono jochunae. Asan puchuicaca animalilaca nin poto lachi cuwanun mesa quelole foleno jochunae. Ya mesari jun yabi winun caquele tsoe.
8 Junto aman walaca peto, pecolobi mulu chuminca jera laricano jochunae tinue. 9 Chinchica palu nicanan laricano jochunae junbi chumin mulucanan. Betendebi, junsi jaquebi mulu chumincanan laricano jochunae. Chinchicabe man parejori jera laricano jochunae tinue.
10 Junto ya pateleri jun walabi nechi larica junca lachi titiya cuwanun mesabi jera ninpono jochunae tinue. 11 Junto aman wala quidoca, tsachicaca, misuca, boteca, pesilica, peca, 12 aman wala pucaleca tsachila chununle nechi tanloto, ninfu queponunle te jamo tsoreto, nin pono jochunae. Aman weyan postori quelo fetuntsan posto jochunae. Junni junbi walaca nin potuntsan jochunae tinue.