Na quica jonun tenchi Diosichi titiya cuwano jonunca
12
Junni Miya Diosiri Moisebe pato, itsantinue: 2 Israelítalabe pato, itsantide! tinue. Sona manca unila na quitori, ya sona siete ma fecári quelo fetuntsan patica jochunae tinue. Tsanque patica joto, chican loto chuno jochunae uyanlabe man parejori chututo. Siete ma fecári tsanque chuno jochunae; jana pe cura luban quirato niyan quino jun, jun cuwenta jochunae. 3 Aman ochu ma tan náca numi quido puntaca porentsan jochunae israelita na joeque miichun. 4 Aman tsanquinunle nechi, yachi ayanni peman chunca peman ma fecári camérano jochunae yachi asan folenamin mandeisa. Aman in peman chunca peman ma fecári la Diosichi cosaca talano itochunae. Junsi lachi ya selabi wino podeituchunae.5 Aman yachi na sona na jonari, palu tominco fecári quelo fetuntsan patica jochunae; junte nechi sota chunca sota ma fecári lachi cosaca talano itochunae tinue yachi asan folenamin mandeisa.
6 Junto aman ya peman chunca peman ma, o sota chunca sota ma jerainunbi, unila na jonan o sona na jonan, yachi ayan lachi ticatiya epe cuwano jochunae tinue. Aman ya sonari opisa nalalanca cato, la Miya Diosichi cale layainun jali ya winun fecári tanjino jochunae. Aman ya opisari man watari tan jochunae. Junte aman ya opisaca lachi cuwato, nin pono jochunae. Junsi juweju manca o paloma manca lachi cuwano jochunae yape jutsaca perdonaisa. Junto aman in animalilaca patelechi cuwano jochunae tinue. 7 Aman ya pateleri ya animalilaca lachi cuwano jochunae ya sonachi jutsaca perdonaisa. Aman sonala na quetobi jaatsan quinari, wari quelo fetuntsan jomin manseica jochunae. Unila na o sona na quitori, jaatsan quintsan jochunae tinue. Opisa nalalanca cuwano jochunae.
8 Juntonan nachi ayanni opisa cano cala itotori, juweju paluca o paloma paluca cuwano jochunae. Mancaca la Diosichi cuwato nin pono jochunae; junsi mancaca jutsa perdonaisa cuwano jochunae tinue. Aman ya pateleri in animalilaca lachi cuwachunae yape jera perdonaisa. Junsi aman ya sonacari la Diosi perdonaica jonan, wari quelo fetuntsan jomin manseica jochunae tinue.