Diosi israelítalabe trato quinunca
24
1-2 Junni Miya Diosiri Moisebe itsantinue: Nu, Aarón, Nadab, Abiú, junsi siete chunca israelítala fe mantaminlabe lalaide! tinue. Juntonan nu mancasiri lachi fe quelole jano joe tinue. Yalari la ranunte latonan, juntonan jabilenan purainola joe. Junte telenranola joe. Yalari la ranun fecári jano itolajoe. Junsi weyan israelítalari nulabe pelano itolajoe tinue.3 Aman junni Moiseri Miya Diosi niyan tisa mantaca junca, israelítalabe jera panue. Junni yalari jeralela man parejori pato itsanlatinue:
—Chiquilari Miya Diosi jera mantaca junca quilaqueyanae tilatinue.
4 Junni Moiseri Miya Diosi pacaca jera pila chutenue. Junto aman ayuna nanchi duque quepenannan wiruito, jun du cotole Diosichi titiya cuwanun mesa quinue. Junsi chunca paluca ayancan suca junte wirucarinue Diosichi tenchi tsannayoe tito. Ya sulari manca man bolon, manca man bolon israelítalachi tenchi wirucarinue. Chunca palu bolon israelítala jonan, chunca paluca su jominue. 5 Tsanquetobi, aman nalan nalan israelítalaca mantato erenue yape animalilaca toteto nin poto Diosichi cuwalaquisa. Junsi wala nácanan Diosichi cuwalaquisa erenue Diosibe israelítalabe manse patilaichun. 6 Aman Moiseri jun animalilachi asanca quitsacari tasonbi pocato, aman man quitsacari Diosichi titiya cuwanun mesa jamo jera aralenue. 7 Junsi aman Diosi trato quica jun pilaca cato, jerale israelítala meralaquinasa pila quiranue. Junni yalari junca meráto itsantilatinue:
—Miya Diosichi jera mantaca seque meráto obedeseilaiyanae tilatinue.
8 Junni yalari tsanlatinunsi, Moiseri tasonbi pomin wala asanca cato, israelítalachibi jera arale ereto, itsantinue:
—In asanbe miintsan joe Miya Diosi nulabe in trato jera quica joeque.
9 Junsi aman Moiseri Aaronbe, Nadabe, Abiúbe, junsi siete chunca fe mantamin israelítalabe manan jun du minu manlolainue. 10 Junni junbi israelítalachi Diosica quiralaquinue. Jun quiranari Diosichi nedeleri tiyato safiro tinun suca lowa quica cuwenta jominue. Ya lowari poyo iton yoquidonan quiran jominue. 11 Junni fe mantá tan israelítalari Diosica quiraca josanan, Diosiri yalaca niyanantiya quitunue. Yalari ticatiya fin, cuchin, quinilaquinaminue Diosica quiracala jotonan.
Moisés Sinaí dubi lonunca
12 Junni Miya Diosiri Moisebe itsantinue: Nuri dubi lade! la ranun fecári. Junto junte mérana! tinue. Israelítalaca niyaque mantano jonunca paluca layun subi pila chutechinayoe tinue. Junto junca cachun mérana! tinue.
13 Junni Moisebe yabe peayudaimin Josuebe wiruilaito, Moiseri Diosichi du minu manan manlobi jilainue. 14 Junni aman jilaichinato Moiseri, fe mantá tan israelítalabe itsantinue:
—Chiquila manjano fecári intenan meralarana! tinue. Aaronbe Húribe inte nulabe purailaichunae. Junni pansile nula tala titiya problema jonari, yalabe panilaquina! tinue. Yalari ayudailaichunae tinue.
15 Junni aman tsantitobi, Moiseri du minu lonasa, jun dubi poyo doinue. 16 Junni Miya Diosiri jun Sinaí tinun dubi uraran tsen suwade patanue. Jun dubi siete ma fecári poyo doraminue. Junni debi mate Miya Diosiri poyobi nechi Moiseca otinue. 17 Junni Miya Diosi tsen suwacaca israelítalari quiranari, nin lunaminnan quiraque tsennaminue jun du jamobi. 18 Junni Moiseri jun poyobi wito dubi nantanan loniinue. Junto quepen, malon junpalu chunca ma fecári junbi chuminue.
Diosica se tinun jali yaca niyaque quino jonunca
Junni Miya Diosiri jun dubi Moisebe itsantinue: Quidoca, junsi jalica, Diosica se tinun posto quisa tinue. Junni aman israelítalari ticatiya epe cuwanola jominue Diosichi posto quichun munaranunlaca. Yalachi tenca munatenan tanjato epe cuwano jominlanue. Oro, cala, tsanpa, quido, tsenobi ponun aseite, sen chide, jaatsanlaca jera tanjano jominlanue Diosica se tinun posto quichun.