2 La nulachi Miya Diosi joyoe tinue. Junto nula Egíptobi duque padeseito pacara quitusanan sonba trabajaquito chuminlaca lari nulaca se lariyoe yape nantari padeseito chularatusa. 3 Junto uyan diosi tinunlaca tennalaratuna! tinue. Lacasiri tennanola joe tinue.

4 Junni se tichun ticanantiya molde quitulajona! tinue. Nin jamobi chuminlaca, nin tote nenaminlaca, nin pibi jiminlaca, molde tina quitulajona! tinue. 5 Junsi ya moldechi cale natiya telenhito rocaitulajona! Junto lasiri nulachi tsa Diosi joyoe tinue. Junni ya moldechi cale diosieque tenhito se tilatinari, lari tsantiminlaca paito casticaqueyanae tinue. Seiton quiminlaca casticaquimin Diosi joyoe. Seiton quimin tsachilacanan, yalachi nalalacanan, nietolacanan, junsi nietolachi nalalacanan, padeseisa carimin joyoe tinue. 6 Tsan jotonan, aman laca laquirato, lachi mantaca seque meráminlacari laquirato seque ayudaimin joyoe tinue. Yalacanan, yalachi nalalacanan, nietolacanan, junsi jerale alicalacanan numasitiya seque ayudaiyanae tinue.

7 La nulachi Miya Diosi jonan, lachi mumunca natiya epe patulajona! tinue. Tsanque seitonque paminlaca sen tsachila jolajoe natiya tituanae tinue.

8 Aman tominco cura jasaino maca pansitulajona! tinue. Junto jun macari Miya Diosichi ma joeque tenhintsan jochunae tinue. 9 Aman sota ma fecári titiya quino jonari jera quintsan jochunae tinue. 10 Debi ma mantimini nulachi Miya Diosichi ma jonan, jun mate jasaino ma jochunae tinue. Junni jun jasaino mate nula mancatiya trabajaquinola itochunae tinue. Junsi nulachi naolanan, namalanan, peyunlanan, animalilanan, bare to tsachila nulabe pechuminlanan, yalanan jasaino materi tinantiya quinola itochunae tinue. 11 La Miya Diosiri sota ma fecári quito, yoquidoca quin, toca quin, lamarica quin, junsi in tote titiya jera jonunca quin quiyoe tinue. Junto la jun sota ma jera quito, debi ma jasaiyoe tinue. Junto la Miya Diosi ya debi maca bendisiquinato, In mari lachi ma jochunae tinue.

12 Junsi aman nulachi apabe ayanbeca seque respetailaina! tinue. Tsanquitori, la nulachi Miya Diosi joto cuwaca jun tobi duque unica ino fecári sonnalarachunae tinue.

13 Junsi tina tsachilaca totetulajona!

14 Uyanlachi sonalaca o uyanlachi unilalaca catulajona!

15 Natiya tarintulajona!

16 Quiranunlaca tina seitonque nene patulajona!

17 Tina uyanlachi yaca, sonaca, peyunlaca, walaca, burocanan, ni ticanantiya munaito quiratulajona! tinue.

Diosiri israelítalachi tsanque mantá cuwanue.

18 Junni jerale israelítala jun dute cunta pánaminca, pinda quinaminca quiralaquinue. Junsi tutu merará ticaca meránato, aman jun dubi nin poyo lonamincanan quiralaquinue. Junto jele tito jun dubi nechi fécari nuwiri joqueilainue. 19 Junto tsachilari tsanque jele tito, Moisebe itsanlatinue:

—Nuri chiquilabe pade! Nuri pánan, chiquilari obedeseilaiyanae latinue. Juntonan Miya Diosica chiquilabe patusa tenjalaquee. Ya patsa chiquilabe panari puyalaiichunae latinue.

20 Junni Moisés beco manpato, itsantinue:

—Natiya jeleratulajona! tinue. Miya Diosi nulaca miibi pataca joe tinue. Nulari yaca respetaito jele tilatitori, jutsa quituto nenalarachunae. Junni junca Diosi miibi pataca joe tinue.

21 Junni Miya Diosi ranunte duque poyosiri jonan nemen jominue. Junni israelítalari jelechi jabile meralarasanan, Moiseri jun poyo nanchi jiniinue.