Sinaí dubi felainunca
19
1-2 Junni jerale israelítala tilanantiya chutunun tobi nenato, Refadim postobi felainue. Junni junbi nechi loto, Sinaí dubi felainue. Egíptobi nechi locale nechi peman pe inaminue; jun matenan Sinaí du catenle chudilainue. 3 Junte Moisés Diosibe tulaibi dubi lonue. Junni Miya Diosiri pato itsantinue: In fiquicanan jerale Jacóbochi alica israelítalabe pana! 4 Nulari quiracalae egíptolaca niyan quica jonunca. Junni niyan quito nulaca la ranunte tanjaca jonunca miralarae tina! tinue. Parinquichi panpebi tanjanun cuwenta jacalae tina! tinue. 5 Junni lachi tratoca meráto, jera mantailaina! Aman jerale to lachiri joe. Junni nulari laca seque meralaquitori, jerale uyan to tsachilaca fécari munatinun tsachila jolajochunae tina! tinue. 6 Nula jeralela lachi patelela cuwenta jolajochunae. Junsi aman lachi cale sen tsachila jolajochunae tina! tinue. Israelítalabe inca jera pana! tinue.7 Junni Moisés israelita mantamin unicalaca jera jasa carito, Miya Diosi jera mantacaca yalabe panue. 8 Junni israelítalari beco sonba pato, Miya Diosi jera mantacaca tsanqueyanae tilatinue. Junni Moisés israelítala pacaca Miya Diosibe manpabi jinue. 9 Junni Miya Diosiri itsantinue: Quirade! Nuchi cale duque poyo quitsabi quiraiyanae. Junto tsachilari nube pánaminca meráto, numasitiya nuca fe tennalarachunae tinue. Diosi tsantinunbi, Moiseri israelítala pacaca Miya Diosibe manan manpanue nu mantacaca tsanqueyanae tilatieque.
10 Junni Miya Diosi itsantinue: Tsachilaca amana, ayuna tenca seilaisa caride! lachi cale jochun. 11 Junni junhayuna fecári tsachilari michiito ranola joe tinue. Junto la Miya Diosi junhayuna Sinaí dute patanae tinue. Jerale tsachila quiralaquinasa patanae tinue. 12 Junto Sinaí du awinta serica molde quinola jochunae yape la junte rano órate tsachilari polelaitusa. Junsi tsachilabe itsantide! Duca jeleranola jochunae. Quelo fan, nin taquiran, quinola itochunae. Junni yaca merátuto quelo faminlari puyalaichunae tinue. 13 Junni junca merátuto taquiraniquiminlacari monantiya tedechi quinola itochunae tinue. Suchi o flechachi totenola jochunae tinue. Animali jonan, o tsachi jonan, yape jochunae; monantiya son lolaituchunae tinue. Junni wala cachica tutu quinunsi tsachilari jun dubi manlono podeilaichunae tinue.
14 Jun tsantinunsi Moiseri dubi nechi manpatato, tsachilaca tenca seilaisa carinue Diosichi cale jochun. Tsachilari yalachi tsanpaca tachilaquinue. 15 Junni Moiseri yalabe itsantinue:
—Junhayuna fecári michi ilainade! Junsi jun fecári sonalabe catsotulajona! tinue.
16 Junni peman ma tseinasa quepenanan pindabe cuntabe quinanan, jun dubi duque poyo nanhinue. Junnasa duque sonba tutu mera jominue. Junni jerale junte raminla jelechi jowinpolaquinue. 17 Jun tsanhinunbi Moiseri junte ramin tsachilaca Miya Diosibe tulaibi tanjinue. Junni du conti fecáriri tanjinue. 18 Junnasa Miya Diosiri nin quitsabi pataca jonan, Sinaí du jeralete poyo larierenaminue. Ninfubi tsanni nin poyo lonaminue. Junsi dubi jeralete wecainaminue.
19 Junnasa tutu meraticari nanni fe sonba lode lode jiniinaminue. Junni Moisés pánasaleri, Miya Diosi beco pato cunta paca tsanni tinaminue. 20 Miya Diosiri Sinaí du puntabi pataca jominue. Junni Moisebe pato, ya ranunte lade! tinue. Jun tsantinunsi, Moiseri lonue. 21 Junni Miya Diosiri Moisebe itsantinue: Manpatito, tsachilaca joqueerede! yape serica moldeca polelaitusa. Nin laca quirachique jatulajona! tina! tinue. Ya fiquica meralaquitutori, duque puyano patilaichunae tinue. 22 Junsi aman patelelanan lachi quelo faminla jotonan, yalanan tenca seinola joe lachi cale jolajochun. Tsanlaitunari, lari yalaca casticaqueyanae tinue.
23 Junni Moiseri Miya Diosibe tulanto itsantinue:
—Tsachilari natiya Sinaí duca lotulajochunae tinue. Nuri numa mantacae serica molde quisa. ¿Junsi yaca jeleralaranaque mantatucayun? tinue nuchi posto joeque.
24 Junni Miya Diosiri Moisebe itsantinue:
—Manpatitobi, Aaronbe manlalaina! tinue. Juntonan weyan patelelanan, nin israelítalanan serica moldeca poleto la ranunte lanola itochunae tinue. Merátuto tsanhiminlacari casticaqueyanae tinue.
25 Junni Moiseri manpatato, Miya Diosi paca fiquica israelítalabe jera manpolarinue.