Subi nechi pi bularinunca
17
Piyanle israelítalari Sin tinun tilanantiya chutunun postote nechi jilainue. Miya Diosi yalaca jisa mantanasa, yalari chude chude jinaminlanue. Junto Refadim tinun postote nasi chudilainue. Juntonan jun postoteri pi itominue tsachila cuchilaquisa. 2 Junnan paito, Moisebe itsanlatinue:—Pi cuwade! tilatinue cuchilaquichun.
Jun tsantilatinan, Moiseri itsantinue:
—¿Niyaito labe tsanlatinayun? Nulari tsanque painari, Miya Diosi nulaca nantari wantaituto casticaquichunae.
3 Junni tsachila duque pi muquinasa joto, Moiseca seitonque pato itsanlatinue:
—¿Ti quichun chiquilaca Egíptobi nechi lariyun? tilatinue. ¿Chiquila, chiquilachi nalala, junsi chiquilachi animalilanan yape pi mochi puyalaisa inchi tanjayun? tilatinue.
4 Tsanlatinunsi Moiseri Miya Diosibe rocaito itsantinue:
—¿In tsachilaca ti quino jowan? tinue. Wari laca su walacachi quito totenono latinae tinue.
5 Jun tsantinan, Miya Diosi Moisebe beco pato itsantinue: Israelítalachi cale poleto jide! tinue. ¿Junto Egíptobi nu toláchi pibi quechuteco? Aman ya tolacanan tanjito, 6 Horeb mumun duca jilaide! tinue. La jun dubi wa sucate nuca méranae tinue. Junni junbi fato, ya tolachi wa sucaca tolepona! tinue. Junni jun suca toleponunsi, subi nechi pi bulachunae tinue yape tsachila cuchilaquisa. Junni Moiseri Miya Diosi pacaca, jun tsannan quinue piyanle israelita bolon mantaminla quiralaquinasa.
7 Aman junte israelítala pataacala jominue. Junsi paito, ¿Miya Diosi chiquilabe peran, o iton? tito, Diosica wantaituntsancari pasuwalaquinue. Junto ya postoca Masah mumun, junsi Meriba mumun polaquinue. (Israelítalachi fiquichi wantaituntsancari pasuwacaca “masah” tinun jominue. Junsi pataacaca “meriba” tinun jominue.)