—Miya Diosi chiquilaca Egíptobi puyasa carica jomanpari, fe sen jono jomin jonhoe. Junbiri michi tsachica tato, bibuca peyale fimin jominlayoe. Nula mantimini chiquilaca in seiton toca tanjalaie tilatinue yape ano mochi puyalaisa.

4 Junni Miya Diosi Moisebe itsantinue: Jamochi nechi nulachi bibu tsanca cuwachinayoe. Israelítalari ma cura loto, jun materi fichun layalaquichunae tinue. Tsanquechinayoe miichun yala lachi mantaca meráto nenanola jonunca. 5 Junni tominco cura sota masiri ya bibu tsanca layanola jochunae. Jasaino mate layano itolajochunae. Junni jasaino ma quisinchi palu ma tenchi layanola jochunae tinue palu ma fichun.

6 Junni Moisebe Aarónberi israelítalabe itsanlatinue:

—Chiquilari nulaca larilaquitiyoe. Miya Diosi nulaca laricae. Amana quebi inasa miilaichunae tilatinue nulaca Miya Diosi Egíptobi nechi larica jonunca. 7-8 Ayuna quepenan Miya Diosi wepanato quirantsan quinunca quiralaquichunae tilatinue. Nula yaca paito panunca merán quinae tilatinue. Junni quebi chiquilachi tsachica cuwachunae tilatinue yape filaquisa. Junto quepenan cura bibu tsanca puchuicari cuwachunae tilatinue. Miya Diosi merán quinae tilatinue yaca paito palaquinunca. ¿Chiquilari mo jolajowan? nulari chiquilaca seiton curalaquisari. Nulari chiquilaca seiton curalaquitue tilatinue; Miya Diosica seiton curalaquee tilatinue.

9 Nanni inale Moisés Aaronbe pato itsantinue:

—Miya Diosi israelítala painaminlaca merán quinan, yachi cale jera jalaisa tide! tinue.

10 Junsi wanbile Aarón israelítalaca layasuwato, yalabe pánaminue. Junnasale israelítalari yalaca tannenamin poyonan tala quiraerelaquinasa, Miya Diosi jun poyobi nechi tseque erenue. 11 Junni Miya Diosi Moisebe manan manpato, itsantinue: 12 Israelítala painaminlaca meráyoe. Jun tenchi yalabe pato, itsantide! tinue. Nulari quebi inasa tsachicaca finola joe. Junsi quepenan bibu tsanca peleicari filaquichunae tide! Junto nulari miilaichunae tide! tinue la Miya Diosi joeque.

13 Junni jun quebi inasa duque colin tsanla jalainue. Israelítala chununte jeralete nenaminue. Junsi jun tobi quepenan cura tenca mánta to ataimin jominue. 14 Junni jun atan manfuinunsi, fibacan tsanini puca nacá to jamo tsominue. Yari ronto tsannan quiran jominue. 15 Junni israelítalari miitominlanue ti jonunca. Quiratobi, yala tala pato, ¿Inni ti junhun? latinue. Junnasa Moisés itsantinue:

—In bibu tsan Miya Diosi cuwaca jun alimento joe tinue. 16 Junni Miya Diosi itsanque mantaquee tinue. Ya bibu tsanca manlayalaquina! Nula jeralela nisi fino munaratotiya calaquina! Nulachi yabi niyanca tsachila chununca mito, puca cura palu litro tsansi pocalaquina! tinue.

17 Junni israelítala layalaquinato, weyanlari fe, junsi weyanlari pele, layalaquinue 18 nisi medidabe cano jonunca tennato. Junni weyanla duque caya josatiya, puchuitunue. Jun tsanquenan weyanlari nasi caya josatiya, yalachinan sequenan michi inue. Puca cura nisi fino munaranunca layaca jominlanue.

31 Junto ya finoca “maná” tilatinue. (Yalachi fiquichi “¿Ti jun?” tito, “maná” tinun joe.) Culantro ni cuwenta fiban ni jominue. Pinban jominue bibube china pibe cuwenta.

32-35 Israelítalari junpalu chunca wata fecári maná filaquinue tsachila chunun tobi manaman manfeno fecári. Canaán to linderobi feno fecári yaca filaquinue. Juntonan israelítalari manaca fino ma cajeraitusanan, Moiseri israelítalabe itsantinue:

—Miya Diosi nulaca maná nasi sesa mantanae tinue. Palu litro wino mican tsansibi tuwale maná pocalaquede! Junto selaquede! yape nulachi alicala quirano podeilaisa. Yalari quiranola joe Miya Diosi Egíptobi nechi larito tilanantiya chutunun tote itsan anoca cuwanueque miralarasa.

Junto Moisés Aaronbe itsantinue:

—Ya manaca palu litro micanca nidabi pocato, Diosichi cate chutede! yape chiquilachi alicala quirano podeilaisa.

Junni Miya Diosi Moisebe niyan tica jonunca Aarón jun tsannan quinue. Ya maná pun nidaca Miya Diosichi cajonbi ponue sechun.