25
8 Junni Miya Diosiri Moisebe itsantinue: La Diosi nulabe chuno jun sen postoca quisa carina! tinue. 9 Diosichi jali ya quinola joe. Junsi Diosichi titiya epe cuwanun mesa, tseno, cajon, titiya junbi jochunae. Junni jera titiya quinato, la niyaque mantaca jonatiya, jun tsanquenan quisa carina! tinue. 10 Acasia tinun chideca cajon manca quisa carina! Ya cajonni man metro chunca sentimetro baren, sota chunca mante sentimetro ayan foron, sota chunca mante sentimetro ayan butun jono joe tinue. 11 Junsi aman jun cajonbi tenpenan jamotenan óroca jera ocarinola joe tinue. Junsi cajon awinta oro silica caracarinola joe tinue.17 Ya cajonchi tapanan óroca quica jun jono joe tinue. Ya tapanan tsansinan baren jono jochunae. Junsi tsansinan ayan foron jochunae. 18 Junsi jun tapabi jamole paluca querubín tinun anjelilanan quiranca cuteto quisa carino joe. Ya querubín tinun anjelilacanan óroca quica jonola joe. Yalari man nanchi puntabi, manca man nanchi puntabi jonola joe tinue.
21 Cajonbi la chunca mantaca chuteto cuwaca jun suca poto, ya tapachi dono joe tinue. Ya tapate Diosi tsachilaca laquirato perdonainun posto tinun jochunae. 22 Junni lari jun cajon tsonunte nube tulaito cuenta queyanae. Jun cajonbi chumin querubínlachi quitsale nechi pánae. Nu israelítalabe ticatiya niyaque manpano jonatiya, nube junbi pánae tinue.
23 Junsi aman acasia tinun chidecanan mesa quisa carina! Yacari nue chunca mante sentimetro baren, junsi junpalu chunca mante sentimetro ayanpen, junsi sota chunca mante sentimetro ayan butun, quisa carina! tinue. 24 Junto jun mesabi jamole óroca urara jera dosa carina! tinue.
30 Lachi cuwaca jun bibuca jun mesabi lachi cale tsoreno jochunae tinue.
Junsi tsenocanan óroca quisa mantanue. Diosi Moiseca tsanque jera mantanue.