3 Junnasanan Miya Diosiri egíptolaca seque tenca casa carinaminue yape israelítalaca duque se tito yalachi titiya cuwalaquisa. Junnasanan Faraonchi mantá tanlanan tenhinaminlanue Moiseri uyan tsachilaca fe min, fe poden joeque. Jerale egíptolanan yaca tsanque tenhinaminlanue.

4 Junni Faraonchi cate cacuenta quinaminnan, Moisés itsantica jominue:

—Miya Diosi itsantinae: Quitsa quepente jerale Egíptobi polechinayoe tinae tinue. 5 Junto familia cura caque naola puyalaichunae tinae. Miya, nuchi caque nao jominnan pepuyachunae tinae. Junsi titiya ilimin peyun sonalachi caque naolanan pepuyalaichunae tinae. Junsi animalilachi caque nanan pepuyachunae tinae. 6 Junnan jeralela laquichi, fudachi wareto atilatichunae tinae. Numasinantiya tsanlatituminla joto, numasinantiya mantsanlatituchunae tinae. 7 Junni Miya Diosi tenhisa carichinayoe tinae egíptolari israelítala cuwenta itolajoeque. Junni israelítalachibiri nin susu mancatiya woquituchunae tinae. Nin animali mancatiya puyatuchunae tinae tinue. 8 Junni miya, Diosi tsanquinunsi, nuchi mantá tanlari lachica jalaichunae. Lachica jato, telenhito rocailaichunae tinue lachi tsachilaca mantanjide! tito. Junnasanan nulari catsantitusanan, Egíptobi nechi manjitulajoanae tinue.

Moisés jun tsantisi, Faraonchi cate nechi duque pa manjinue. 9 Jun wanbile Miya Diosi Moisebe itsantinue: Faraón nu pacaca merátuchunae. Junnan fécari duque jele tintsan cosa quino joanae tinue Egíptobi.

10 Moisebe Aaronbe tsanque wepanato quirantsancari quinaminlanue yape Faraón quirasa. Junnasanan Miya Diosi Faraonchi tencaca merátumin suwaca jominue. Junnan israelítalaca yachi tobi nechi manheretumin jominue.