13 Junni Moisés yachi tolaca Egipto tobinan jalitanan, Miya Diosi fechi nechi wa wu quisa carinue quepen, malon. Junni ayuna nanchi quiranari, ya wuri duque isu tanjaca jominue. 14 Junni isuri Egipto tobi jera quidiinue. Numasinantiya tsancari isu itomin jominue. Junsi numasinantiya tsansi manhitochunae jun mate cuwenta. 15 Junni duque jocachinan toca quiratuntsan jominue. Junni tsancari joto, chide pelebi japisu, puca capuchuica jominca jera filaquinue. Ronto quinasa puchuica jominca jera finan, jerale Egíptobi tinantiya iton inue. Nin witabi nin chide pelebi itominue.

16 Junni Faraonni yachi peyunca we Aaronbe Moisébeca tanjasa carito itsantinue:

—Nulachi Miya Diosichi catenan, nulachi catenan jutsa quiyoe. 17 Junni nube rocainayoe tinue laca in neri perdonaisa. Junsi Miya Diosibe rocaide! yape in isu totechinaminca jera manheresa.

18 Junnan Moiseri Faraonchi yabi nechi loto Miya Diosibe rocainunsile, 19 wa wu quisa carinue. Manchi nechi jato, ya wuri jera isulaca tanjito, Mar Rojo tinunbi jera queponan, mancatiya Egíptobi iton inue. 20 Tsan josanan Miya Diosi Faraonca merátumin mansuwaca jominue. Junnan israelítalaca manheretunue.

21 Junni Miya Diosiri Moiseca itsantinue: Nuchi tedeca jalitade! tinue yape jerale Egipto tobi duque duque nemen isa.

22 Junni Moisés yachi tedeca jalitanunsile, jerale Egipto tobi nemen nemen inue. Junni peman ma fecári duque nemen jonan, 23 Egipto tsachilari quelo chumin talanan quirano podeilaitunue. Monantiya nenano podeilaitunue. Junnasanan israelítala chunun minuri tse jominue. 24 Junni Faraonni yachi peyunca Moiseca cabi ereto, tanjasa carito, itsantinue:

—Nula jeralela Egipto tobi nechi losi, Miya Diosica se tilatina! Nalalacanan petanjilaide! Juntonan opisaca, walaca tanjitulajona! tinue.

25-26 Junni Moiseri itsantinue:

—Miya, chiquila chiquilachi animalilaca jera tanjinola joyoe. Mancatiya inte puranola itoyoe. Junto junbi fetobi wentenola joyoe nun animalica Miya Diosichi nin poto cuwano se jonunca. Juntonan camiitolajoyoe nun animali jonunca. Junni miya, nunan animalilaca chiquilachi cuwano joe yape chiquilachi Miya Diosica se tito rocailaisa. Nu cuwaca jun animalilacanan nin poto Diosichi cuwanola joyoe tinue.

27 Junni Miya Diosiri Faraonchi tencaca merátumin suwaca jonan, manheretunue. 28 Junnan Faraonni itsantinue:

—Moisés, lachite nechi we manjide! Manaman laca quirabi jatuna! Manaman janaminca totesa cariyanae tinue.

29 Junni Moiseri tulan pato, tsa tinae; manaman quirabi jatuanae tinue.