Duque animalila puyalainunca
9
Junnan Miya Diosi Moisebe itsantinue: Faraónchica jito, Miya Diosi itsantie tina! tinue. Chiquila israelítalachi Diosi itsantinae tina! Lachi tsachilaca manherede! yape laca se tito rocailaisa. 2 Junni jun manheretunari, Egíptobi cachusa carinari, 3 junni Miya Diosi animalilachi duque sonban quiyan erechunae yape Diosi duque sonban joeque tenhilaisa. Junni jun quiyanchi calu, buro, cameyo, wala, junsi opisa tsanla jera puyachunae tina! tinue. 4 Junni Miya Diosi israelítalabe, egíptolaberi jun tsannan itolajoeque tenhisa carichunae. Egíptolachi animalila puyalainasanan, israelítalachiri mancanantiya puyalaituchunae tina! tinue. 5 Junca Miya Diosi ayuna tsanhichunae tie tina! tinue.6 Junni Miya Diosi tsantica joto, jun tsannan isa carinue. Egipto tsachilachi animalila jera puyalainue. Juntonan israelítalachiri mancanantiya puyalaitunue. 7 Junni Faraonni israelítalachi animalilaca quirasa erenue. Junto miinue israelítalachi animalilari mancanantiya puyaca itonunca. Juntonan Diosica merátuchi timin ito, israelítalaca manheretunue.
Duque bichi inunca
8 Junni Miya Diosi Moisebe Aarónbeca itsantinue: Nula ninfubi nechi ninfu nasi chumito, Moiseri Faraonchi cale jamochi quepona! tinue. 9 Junni ninfuri jera lucu ito, Egipto tobi jeralete arajinan, jeralelachibi bichi lachunae tinue. Tsachilachibinan, animalilachibinan bichi lachunae tinue.
10 Junni Moisebe Aaronbe ninfubi nechi ninfu cato, Faraonca quirabi jilainue. Junbi Moisés ninfuca jamochi queponue. Junni tsachilachibinan, animalilachibinan bichi jera lanue. 11 Junni ponelalari Moisebe beco pano podeilaitunue. Yalanan weyan Egipto tsachila cuwenta bichi laca jominlanue. 12 Junni Miya Diosi Faraonca merátumin isa carinue yape Moisebe Aaronbe pánanunca merátusa. Miya Diosi Moisebe paca jominue tsanhichunaeque.
Duque ronto patanunca
22 Junni Miya Diosiri Moisebe itsantinue: Nuchi tedeca jamochi jalitana! tinue yape jerale Egipto tobi ronto patasa. Tsachilachibinan, animalilachibinan patachunae. Junsi witabi pele waca chuminbinan patachunae tinue.
23 Junni Moisés yachi tedeca jamochi jalitanunsile, Miya Diosiri jerale Egipto tobi pinda, cunta quisa carito, ronto patasa carinue. 24 Junto ronto, pinda deituto patanaminue. Numasinantiya egíptolachi tobi tsancari jelelen ronto patatumin jominue. 25 Junsi ronto patato, jeralete ticatiya yucapiyarinue. Tsachilacanan, animalilacanan, junsi witabi titiya pele chuminlacanan jera yucapiyarinue. Junsi chide pele alilacanan jera colenue. 26 Junni israelítala chununbi, Gosén tinun tobiri, nin man nitiya ronto patatunue.
27 Junni Faraonni yachi peyunca erenue yape Moisebe Aarónbeca tanjasa. Junni jun jalainunbi yalabe itsantinue:
—Aman jutsa quicayoe. Miya Diosichi culpa itoe tinue. Lachi, junsi lachi tsachilachi culpa joe tinue. 28 Junni Diosibe rocailaide! yape Diosi cunta pánaminca, ronto patanaminca, deisa carisa. Tsanlaquinari, nuchi tsachilaca manhereyanae tinue. In tobi nantari chusa carituanae tinue.
29 Junni Moisés tulanto itsantinue:
—La in pueblobi nechi losi, Miya Diosibe tede jalitato rocaiyanae tinue. Junnan cunta, ronto patanonan deichunae tinue yape Miya Diosi in toca tsacumin joeque tenhilaisa. 30 Tsan josanan la mirayoe tinue nube nuchi mantá tanlabe Diosica catenhituminla joeque.
31 Junni ronto duque quito, sebada taran ica jominca, junsi lino luli ica jominca jera yucapiyarinue. 32 Junni tricobe sentenoberi casuca itonan, yucapiyaritunue.
33 Junni Moiseri Faraonbe cuenta quetobi, pueblobi nechi manloto, Miya Diosichi cale tedeca jalitato rocainue. Junnunsile cunta pánaminca, ronto patanaminca, suwa quinaminca jera mandeisa carinue. 34 Junni Faraonni junca quiratobi, manaman jutsa quinue. Yanan, yachi mantá tanlanan merátuchi timin ilainue. 35 Junni Faraonni tsanhito, israelita tsachilaca manheretuanae tinue. Nanni matunan Miya Diosi Moiseca pasa carica jominue tsanhichunaeque. Junni jun tsanquenan patinue.