6 Junni Aaronni Egíptobi pi ponunlabi jeralete tolaca quirawonan, cototo jera loto, Egíptobi jeralete duque seraca jominlanue. 7 Junni ponelalanan, yala pone minla joto, yalanan jun tsannan quito, fécari cototo erelaquinue. 8 Junnan Faraonni Moisebe Aarónbeca tanjasa erenue. Yala jalainan, Faraonni yalabe itsantinue:

—Diosibe rocailaide! tinue yape lachibi nechi, lachi tsachilachibi nechinan cototolaca jera manheresa. Junni nuchi tsachilaca moora manhereyanae tinue yape Diosica se tito yachi ticatiya epe cuwalaquisa.

9 Junni Moiseri Faraonbe beconan pato itsantinue:

—¿Numasi nula egíptolachi tenchi Diosibe rocaisa tenjan? tinue yape cototola nulachile nechi jera manloto pibiri jera manwilaisa.

10 Junni miyari pato, ayunanan tinue.

Junni Moiseri pato itsantinue:

—Tsanhichunae tinue yape chiquilachi Miya Diosi tsannan monantiya itonunca miilaisa. 11 Junni ayunari cototola nulachite itoto, pibiri chuto nula egíptolaca nantari pasuwalaquituchunae tinue.

12 Junni Moisebe Aaronbe Faraonchi yabi nechi manlolaitobi, Moisés Diosibe rocainato itsantinue: Faraónchibi cototo ereca joto, ya cototolaca jera manlaride! tinue. 13 Junni Moisés rocainan, Miya Diosi jun tsannan quinan, cototola jeralete nenaminla jera puyalainue. 14 Junnan tsachilari cototo puyacaca jera layato dulaquinue. Junni jera petenan, jeralete duque peten puba jominue. 15 Junni Faraonni yachi problemaca jera se loyoe tito, Moisebe Aaronbe pánacaca merátuchi timin manhinue. Miya Diosi tsanhichunae tica jominue. Junni jun tsannan inue.

16 Junto Miya Diosi Moisebe manan itsantinue:

—Aaronca yachi tolaca cato jamochi jalitato, to jopobi quechutesa tide! tinue yape jera Egipto tobi to jopo mu isa.

17 Junni junca meráto, Aaronni yachi tolaca cato, to jopobi quechutenue. Junnan to jopo jera mu ito, tsachilacanan, animalilacanan finaminlanue jera Egipto tobi. 18 Junni ponelalanan pone minla joto fécari mu serawochique tenfelainatonan, podeilaitunue. Junnasa muri fécari finaminlanue tsachilacanan, animalilacanan. 19 Junni ponelalari Faraonbe pato itsanlatinue:

—In mulari Diosi ereca jun joe latinue.

Junni yala tsantinasatiya, Faraonni Moisélaca nantanancari merátuchi timin inue. Miya Diosi tsanhichunae tica jominue. Junni jun tsannan inue.

20 Junni Miya Diosi Moisebe itsantinue: Ayuna quepenanan Faraón pibi patino joe tinue. Junni nuri ayuna quepenanan junchi jito, yabe pato, Miya Diosi itsantie tina! tinue. Lachi tsachilaca manherede! yape laca se tito labe rocailaisa. 21 Junni ya miyari manheretuchi tinari, la yachibi, yabe pemantaminlachibi, junsi yachi tsachilachibi dipi, fufu titiya ereyanae tinue. Junto egíptolachi yabi jeralete dipi, fufu titiya serato egíptola chunun postotenan duque jilainachunae tinue. 22 Junni yalachibi tsanhinasa, Gosénbiri manquira quito, manca dipitiya, manca fufutiya eretuanae israelítala chununbi. Junnan miya miichunae la in Egipto tobi raeque. 23 Tsanque palu bolon suwato, lachi tsachilachibi eretuto, yachi tsachilachibiri ereyanae tinue. Junni inni ayuna tsanhichunae tie tina! tinue.

24 Junni Miya Diosi junca tsanquito, dipica, fufuca ticatiya poyonan quiran suwato erenue miyachi yabi, junsi yabe pemantaminlachi yabi, junsi jerale Egipto tobi. Junto Egipto tobi dipi, fufu jinacachinan duque yucapiyarilaquinue. 25 Junni Faraonni Moisebe Aarónbeca tanjasa erenue. Junto itsantinue:

—Nula nulachi Diosica se tibi jilaide! Juntonan in tobi nechi lolaituna! tinue. 26 Junni Moiseri miyabe pato itsantinue:

—Inte Egíptobinan ticatiya toteto Diosichi cuwato se tinan seitochunae. Chiquilari opisa, wala, ticatiya toteto Miya Diosichi cuwato se timinlayoe tinue. Junni nula egíptolari ya animalilaca duque respetaiminla joe. Nula ya animalilaca diosica cuwenta talarae. La mirayoe ya animalilaca totenaminlaca quiralaquitori, nula egíptolari chiquilaca suchi quito totelaquichunaeque. 27 Jun tenchi tinantiya chutunun to minu peman ma jito, junbi animalica toteto Miya Diosichi cuwato yaca se tinola joyoe tinue. Miya Diosi tsanquisa mantaca joe tinue.

28 Junca meráto, Faraón itsantinue:

—Junni Diosichi cuwato se tilatisa tinantiya chutunun to minu erenayoe. Juntonan nantari nuwiri jitulajona! Junsi Diosica se tito, yabe rocailainato, lachi tenchinan rocailaina! tinue.

29 Junni Moisés manpato, itsantinue:

—Inte nechi losi, Diosibe nuchi tenchinan rocaiyanae yape dipi, fufu, tilacatiya ayunanan jera manlarisa. Jera larichunae yape nuca, nube peayudaiminlacanan, junsi nuchi tsachilacanan nantari pasuwalaquitusa. Junni nuri la tsanque rocainan, nantari nene patuna! ¿Junni nu chiquilaca Miya Diosica se tilatisa ereno joco? tinue.

30 Junnan Moiseri Faraonchi yabi nechi losi, Miya Diosibe rocainue. 31 Junni Miya Diosi Moisés rocaicaca meráto, Faraónchibi dipi, fufu titiya jinaminlaca jera manlarinue. Junnan Faraonca, yabe peayudaiminlacanan, junsi yachi tsachilacanan nantari pasuwalaquitunue. 32 Junnasanan Faraonni manaman merátuchi timin ito, israelítalaca manheretunue.