Lebadura iton bibuca finunca
12
Junni Miya Diosiri Egipto tobi Moisebe, Aaronbe pato itsantinue: 2 In pe nulachi tenchi caque pe jochunae. Wata cura in caque pe jochunae tinue. 3 Junni jerale israelítalaca itsanque mantalaquede! tinue. In pe chunca ma josa, nula man familia cura opisa o chibo náca canola jochunae. 4 Junni narin familia jotori, manca animalica jera fino podeilaituchunae. Tsan jotori, fe quelole chuminlabe layaito filaquina! tinue. Nisi fiminla jonatiya, tsansi cuwalaquichunae tinue nisi tsachila jototiya jeralelachi cuwato. 5 Junni ya animaliri opisa o chibo na jono joe. Man wata tan, natiya quiyan iton, unila opisa o chibo jono joe tinue. 6 Junni ya opisa o chiboca in pe chunca junpalu ma jono fecári seto talarana! tinue. Junsi jun ma quebi inasa jerale israelítala cura opisa o chiboca manca manca totelaquichunae.7 Junto animalilachi asanca cato, animalica finanun ya tamolante man nanchi man nanchi, junsi tamolan jamobinan, ilipolaquichunae. 8 Junni tsachicaca ninchi asuwalaquichunae. Junni ya tsachicabe tsanban tapebe lebadura iton bibubenan filaquichunae tinue. 9 Junni ya tsachicaca natiya waracarituntsan joe. Junsi man pititiya sanaca filaquituna! Animalica pucale ninchisiri asuwaca jochunae misu, nede, tenca, jaque, ticatiya. 10 Nin man pititiya ayuna nanchi fecári puralaquituna! Nasi puchuinari, yaca nin polaquina! tinue. 11 Itsanque filaquina! Jera seica jun, sapato pun, tedebi tola tan, rato, wewe filaquina! tinue Miya Diosichi fiesta jonun tenchi. 12 Junni la jun quepen Egíptose jera familia cura caque naoca manca manca totede poleyanae. Jun tsanquenan yalachi animalichi caque náca totede poleyanae tinue. Junnunbi aman egíptola quereinun diosilari epe jolajoeque miralarachunae. La Miya Diosi tsantinayoe tinue.
13 Junni Miya Diosi capánato itsantinue: Junni ya animalichi asancari nula chunun ya tamolante ilipoca jochunae tinue. Junni Egíptobi la toteto nenasa, nulari monantiya puyatulajochunae. Asanca quirasi poleniiyanae tinue. 14 Junni in fiestari nula Miya Diosica mantenhino ma jochunae. In fiesta quino mantári apalachibi nechi naolachibinan polechunae. 15 Siete maca lebadura iton bibuca filaquichunae. Tsan jonan, nulachi yabi casale male nechi lebadura itono joe. Pansile motiya siete ma cajeraitusanan lebadura pun bibuca filaquinari, israelita tsachilachibi nechi tsanle manlarito erelaquichunae tinue.
16 Junni jun tomincote casale mate, junsi debi mate, Diosichi tenchi layailaina! Jun mate tinantiya quilaquituna! Tsan jotonan, jeralelachi ano fichun dano podeilaichunae tinue. 17 Junni lebadura iton bibu finun fiesta wata cura quinola jochunae. Lari nula jeralelaca Egíptobi nechi larichinayoe. Junni jun larica tula ma fen cura, ya fiesta quinola jochunae tinue. Apala tsanque fiesta quino mantá tato, nalalacanan jun tsanquenan micarinola jochunae. 18 Caque pete lebadura iton bibuca finola jochunae. Chunca junpalu ma quebi inasale nechi, jun penan palu chunca manca ma quebi ino fecári lebadura iton biburi filaquichunae. 19 Nulachi yabi jun siete mate lebadura itonola joe. Pansile motiya lebadura pun bibuca filaquinari, israelítalachibi nechi tsanle manlarito erelaquichunae. Uyan to tsachilaca, o israelítalacanan jun tsannan quinola jochunae. 20 Jun tenchi lebadura pun bibuca filaquituna! Nunchi chularatotiya, jun fiesta mate lebadura iton bibucari filaquina! tinue.
21 Junni Miya Diosi tsantinunsi, Moisés jerale israelita unicalaca jasa tito yalabe itsantinue:
—Manjito, familia cura opisa o chibo manca canola jochunae tinue. Nulachi familiala casá ma fiesta quichun ya opisa o chiboca totelaquina! 22 Junsi labacarabi asanca pocanola joe. Junsi isopo ali tuntu quito, asanbi uncarito, tamolante man nanchi man nanchi, junsi tamolan jamobinan, ilipolaquina! Tsanquetobi, catseitusari nulachi yabi nechi mancatiya lonola itochunae. 23 Junni Miya Diosi egíptolaca totede polenato, jerale tamolante asan chun yaca quirasi poleniichunae tinue. Junni Miya Diosiri totemin anjelica nulachi yabiri totebi wisa carituchunae tinue.
24 Junni in mantaca nulanan, junsi nulachi alicalanan numatotiya respetaito polenola jochunae tinue. 25 Junni Miya Diosi nulaca casan tobi wisa cariyanae tinue. Junni nulari jun tobi witobi, wata cura casá ma fiesta quito, jun tsannan quinola jochunae opisa náca toteto, asanca ilipoto, titiya jera quito. 26 Junni nulachi nalalari niyaito tsanquiminla joinhinque panhalaquichunae. 27 Junni nulari beco manpato, casá ma fiesta quinato, Miya Diosica se tichun tsanque animalica toteto fiminlayoe tilatina! Israelítala Egíptobi cachularasanan, Diosi egíptolaca casticaquito totee tilatina! Junni egíptolaca totenato, israelítalachi yabiri tuca poleniie. Junni tsanque chiquilachi tatalaca se larie tilatina! tinue. Jun tenchi in fiestaca quiminlayoe. Nulachi nalalabe tsanque panola jochunae tinue.
Junni Moisés jera tsantinunbi, israelítalari yalachi misuca bontoito Miya Diosica se tilatinue. 28 Junto Miya Diosi Moisebe Aarónbeca tsanquisa mantaca junca, israelítalari jun tsanquenan quilaquinue.
Caque naola puyalainunca
29 Junni jun mate quitsa quepente Miya Diosiri Egíptobi familia cura caque naoca manca mancaca totenue. Junni Faraonni piyanlelaca mantamin josatiya, yachi caque naocanan totenue. Jun tsanquenan preso chuminlachi caque naocanan totenue; junsi jun tsanquenan egíptola tanun animalichi caque unila nacanan jera petotenue. 30 Junni jun quepen Faraón, junsi yabe peayudaiminla, junsi jerale egíptola cupato laquichi sonba atinaminlanue. Junni manca yatiya puyaca jun iton itominue. 31 Junnan Faraonni Moisebe Aarónbeca jasa fiqui ereto itsantinue:
—Jilaide! Nula israelítala lachi tsachilachite nechi we manjilaide! ¿Jana nulanan ticalaco? Jun tsanquenan Miya Diosica se tibi jilaide! tinue. 32 Nula titiya tanunlaca jera mancato, tanjilaide! ¿Jana tinaminlaco? Jun tsanquenan nulachi opisalaca, junsi walalaca tanjilaide! Junsi lachi tenchinan Diosibe rocailaina! tinue.
33 Junni egíptolari israelítalaca yalachi tobi nechi we manlarilaquinue yalanan jera puyalaichinayoeque tenca cato. 34 Junni israelítalari bibu quinunca caasuwaca itonca cato petanjilainue. Labacarabi capunca yalachi jalibi coloto, nanato tanjilainue. Jun bibu quinunbiri lebadura capoca itominlanue. 35 Junni Moisés mantacaca meráto, israelítalari egíptolabe calaca, óroca titiya quica junca, junsi tsanpacanan, panhalaquinue. 36 Junni Miya Diosiri egíptolaca seque cuwasa carinue jera panhacaca. Junni tsanque israelítalari Egíptobi nechi jinato, egíptolachi cosalaca duque cato manlolainue.
37 Israelítalari Ramesés pueblobi nechi jito, casale Sucot fecári jito chudilainue. Uwan unilalacasiri minari, sota patsa mili jominlanue. 38 Junsi duque uyan tsachilanan, israelita itonlanan, pejilainue. Junsi duque opisa, wala, titiya petanjilainue. 39 Junni jilaichinato, lebadura iton bibu quito filaquinue. Egíptola yalaca we erecala jonan, lebadura pun bibu quino jola itonan, lebadura iton bibusiri quito filaquinue.