Moisés nainunca
2
Junni israelítala tsantin chuno mate Levichi bolon israelita manca yachi bolon sonabenan casalaica jominlanue. 2 Junni unila nalalaca toteno mantá josanan, yalachi naola manca nainue. Ya sonari na uraran jominca quirato, peman pe fecári tsato taminue. 3 Junto nantari tsato tano podeituto, tasáca cato, asfaltobe breabechi foro nacalaca jera donue yape pi witusa. Junco tinun tapeca quica jun tasá jominue. Junsi náca junbi poto, Nilo pi fiquile junco tape chununle pibi nancarinue. 4 Junsi ya nachi soquica nasi jabile nechi quirato mérasa tinue ya na niyan ranunca quirato. 5 Junnasa nanni inale, Faraonchi nama jun pibi pipiyabi patanue. Junni yachi peyun sonalabe pi quelole nenato, junco tasá pibi nanraminca quirato, peyun sona mancaca casa erenue. 6 Junni tasáca lasito quiranari, na wareto pominue. Junni Faraonchi namari ya náca laquitito quirato, itsantinue:—In nari israelita na joe tinue.
7 Junnasa ya nachi soquiri jato, Faraonchi namabe itsantinue:
—Nube se jonari, israelita sonaca neyabi jiyanae tinue yape in nachi cu cuwato cuidaisa.
8 Faraonchi nama beconan pato itsantinue:
—Jide! tinue. Neyachin!
—In náca cato chiquechi tenchi uwasuwade! Chiqueri nu tenfeca tenchi pacara queyanae tinue.
Junca meráto, ya nachi ayanni ya náca tanjito uwasuwanue. 10 Junto uwasisinca mantanjito, Faraonchi namachi mancuwanue. Junni yari naoca cuwenta cato, Moisés mumun ponue yaca pibi nechi laricayoe tito.
Moisés Egíptobi nechi sujinunca
11 Junni Moisés uwan tsachi jotobi, yachi bolon tsachilaca quirabi jinue. Junto yachi bolon tsachilaca tenhinue trabajaquinato duque padeseilainaeque. Junni pansileri Egipto tsachi manca israelita tsachica quinaminca quiranue. 12 Junni jeralete urara quiraeretobi, monantiya itonunca quirato, junto aman Egipto tsachica toteto, tsalanbi menanue. 13 Juntonan ayuna nanchi manan jinue. Junni paluca israelítala tala quicaanaminlaca quiranue. Junto manca quicaanaminbe panhanue:
—¿Niya jonan nuchi bolon tsachicanan quinayun? tinue.
14 Junni ya israelita tsachiri beconan manpato itsantinue:
—¿Mo nucari chiquilaca mantamin suwan? ¿Egipto tsachica cuwenta toteno tenca canayun? tinue.
Junca meráto Moiseri tenhinue ya Egipto tsachica toteca jonunca jera miralaranaeque. Junto duque jele tinue. 15 Junni Faraonni Egipto tsachica toteca jonunca meráto, Moiseca totechun neyasa erenue. Junni Moiseri nosa sujito, Madián toca chubi jinue.
Junni junte opisa cuidaito chuminnan, juntenan casalainue. Junto na manca taminue.
23 Junni aman duque wata polenunbi, Egipto miya puyanue. Juntonan israelítalari epe mantato tanun esclabola cajoto, duque padeseito warenaminlanue. Junni Diosi yalaca laquiito meráto 24 mantenhinue yalachi matu tatalabe trato quica jonunca. Abrahanbe, Isaabe, Jacóbobe trato quica jominue cuidaiyanaeque. 25 Junni Diosi yalaca padeseinaminlaca quirato, ayudaino tenhinue.